އެޗްޑީސީ އަށް އަމިއްލަ ފަރާތްތަކުން ދައްކަން ޖެހޭ މަހަކަށް ވުރެ ގިނަ ދުވަސްވީ ފައިސާގެ އަދަދު 1.8 ބިލިއަން ރުފިޔާ އަށް!

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށް އަމިއްލަ ފަރާތްތަކުން ޖުރިމަނާ އާ އެކު ދައްކަން ޖެހޭ މަހަކަށް ވުރެ ގިނަ ދުވަސްވީ ފައިސާގެ އަދަދު 1.8 ބިލިއަން ރުފިޔާ އަރާ ކަމަށް އިތުބާރުހުރި މަސްދަރަކުން މައުލޫމާތު ލިބިއްޖެ އެވެ.

މައުލޫމާތު ލިބިފައިވާ ގޮތުގައި އަމިއްލަ އެއް ކުންފުންޏަކުން ގާތްގަނޑަކަށް 430 މިލިއަން ނުދައްކާ އޮތް އިރު، 344 މިލިއަން ދައްކަން ޖެހޭ ކުންފުންޏަކާއި، 150 މިލިއަނަށް ވުރެ ގިނަ ފައިސާ އެޗްޑީސީ އަށް ދައްކަން ޖެހޭ ކުންފުންޏަކާ، 100 މިލިއަން ދައްކަން ޖެހޭ ކުންފުންޏެއް މީގެ ތެރޭގައި ހިމެނެއެވެ.

މީގެ އިތުރުން 76 މިލިއަނާއި 10 މިލިއަނާއި ދެމެދުގެ އަދަދެއް އެޗްޑީސީ އަށް ދައްކަން ޖެހޭ 17 ކުންފުނި މީގެ ތެރޭގައި ހިމެނޭކަން ފާހަގަ ކުރެވިފައެވެ.

މަހަކަށް ވުރެ ގިނަ ދުވަސްވެފައިވާ 571 ފަރާތުގެ ޕޭމަންޓް އެޗްޑީސީ އަށް ނުލިބި ހުރި އިރު މީގެ ތެރޭގައި ނަން ހިނގާ ބޮޑެތި އަމިއްލަ ކުންފުނިތަކާއި އަމިއްލަ ފަރާތްތައް ވެސް ހިމެނެއެވެ.

ގިނަ އަދަދެއްގެ ފަރާތްތަކުން އެޗްޑީސީ އަށް ދައްކަން ޖެހޭ ފައިސާ ނުދައްކާ ހުރި އިރު ހަމަ އެކަނި ޖުރިމަނާގެ ގޮތުގައި ވެސް ގިނަ އަދަދެއްގެ ފައިސާ ކުންފުންޏަށް ލިބެން ޖެހޭކަން ފާހަގަ ކުރެވެއެވެ.

އެޗްޑީސީ އަށް އެންމެ ބޮޑު އާމްދަނީ އެއް ލިބެނީ ބިން ވިއްކައިގެންނާއި ބިން ކުއްޔަށް ދީގެންނެވެ. ކުންފުންޏަށް ލިބެން ޖެހޭ ފައިސާ ނުލިބި ގިނަ ދުވަސްތަކެއް ވެފައިވާ މައްސަލައިގައި އެޗްޑީސީގެ ވެރިން ރައްޔިތުންގެ މަޖިލީހުގެ މާލިއްޔަތު ކޮމިޓީ އަށް ވެސް ވަނީ ހާޒިރު ކޮށްފައެވެ.