ހިޔާޓަވަރު ގެ 10 ވަނަ ފަންގިފިލާ އަށް ދިމާވި މައްސަލައެއް ހައްލުކުރަން 12 ވަނަ ފަންގިފިލާ އަށް 1 އަހަރު ފަހުން އެޗްޑީސީ އިން ސިޓީއެއް ފޮނުވައިފި
އެ ސިޓި އަކީ ތެދު މައުލޫމާތުގެ މައްޗަށް ބިނާކޮށް ލިޔެފައިވާ ސިޓީ އެއް ނޫން
ހިޔާ ޓަވަރު
ހިޔާ ޓަވަރުގެ ދިހަވަނަ ފަންގިފިލާ ގެ އެޕާޓުމަންޓް އަކަށް ދިމާވި މައްސަލައެއް ހައްލުކޮށްދިނުމަށް އެދި 12 ވަނަ ފަންގިފިލާ ގެ އެޕާޓުމަންޓް އަކަށް 1 އަހަރު ފަހުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސިޓީ އެއް ފޮނުވައިފި އެވެ.
އެޗްޑީސީގެ ސިޓީ ލިބުނު ފަރާތުން ރާއްޖެ އެމްވީ އާށް އެކަމުގެ ކަންބޮޑުވުން ހިއްސާކުރަމުން ބުނީ އެޗްޑީސީ އިން ފޮނުވި ސިޓީ އަކީ އެއްވެސް ވަރަކަށް ތެދު މައުލޫމާތު ހުރި ސިޓީ އެއް ނޫން ކަމަށާއި ދިމާވި މައްސަލަ އަކީ 12 ފުލޯއިން ދިމާވި މައްސަލައެއް ވެސް ނޫން ކަމަށެވެ. އަދި އެ މައްސަލަ އަކީ 11 ފުލޯ އިން 10 ވަނަ ފަންގިފިލާ އަށް ފެން ލީކުވާތީ 10 ވަނަ ފުލޯގައި ދިރިއުޅޭ މީހުން މިދިޔަ އަހަރުގެ ފަހުކޮޅު އެޗްޑިސީ ގައި ޖެއްސި މައްސަލައެއް ކަމަށެވެ.
އޭނާ ބުނީ އެޗްޑީސީ ގެ ސިޓީ ލިބުމުން 11 ވަނަ ފަންގިފިލާ އަށް ގޮސް އެ އެޕާޓުމަންޓް ގައި އުޅޭ މީހުންނާއި ބައްދަލުކޮށް ފެން ލީކުވޭތޯ ސުވާލު ކުރުމުން އެކަހަލަ އެއްވެސް މައްސަލައެއް ދިމާ ނުވާ ކަމަށާއި އެޗްޑީސީ އަށްވެސް މައްސަލަ ޖައްސާފައި ނުވާ ކަމަށް ބުނި ކަމަށެވެ. އެހެން ނަމަވެސް 10 ވަނަ ފަންގިފިލާ އަށް ފެން ލީކުވާތީ އެކަން ހައްލުކޮށްދީފައިވާނެ ކަމަށް އޭނާ ބުންޏެވެ.
އެޗްޑީސީން ފޮނުވި ސިޓީގެ ކޮޕީ އެއް ރާއްޖެ އެމްވީ އަށް ވަނީ ލިބިފަ އެވެ. އަދި ރާއްޖެ އެމްވީ އިން ބެލިބެލުމުން އެ ސިޓީ އަކީ ސައްހަ ސިޓީ އެއްކަން ވެސް ވަނީ އެނގިފަ އެވެ. އެ ސިޓީ އަކީ 2024 ވަނަ އަހަރުގެ ނޮވެމްބަރު މަހުގެ 14 ވަނަ ދުވަހު ލިޔެފައިވާ ސިޓީ އެކެވެ. އެހެން ނަމަވެސް 12 ވަނަ ފަންގިފިލާ ގެ އެޕާޓުމަންޓް ގައި ދިރިއުޅޭ މީހުންނަށް އެ ސިޓީ އެޗްޑީސީން ދީފައި ވަނީ 2025 ވަނަ އަހަރުގެ ޑިސެމްބަރު މަހުގެ 4 ވަނަ ދުވަހު އެވެ.
2024 ވަނަ އަހަރުގެ ނޮވެމްބަރު މަހު ލިޔެފައިވާ މި ސިޓީ ގައި ވާގޮތުން، އެ ސިޓީ ލިބޭ ތާރީހުން ފެށިގެން 15 ދުވަހުގެ ތެރޭގައި ފުލެޓުގެ ފާހާނައިން ފެން ލީކުވުމުގެ މައްސަލަ ހައްލުކުރަން ޖެހެ އެވެ. އަދި ހައްލު ނުކޮށްފި ނަމަ ފުލެޓުގެ ވެރިފަރާތާއި އެކު ވެފައިވާ އެއްބަސްވުމުގައި ވާގޮތުގެ މަތިން ފިޔަވަޅު އެޅުމުގެ އިހްތިޔާރު ލިބިގެންވާ ކަމަށް އެ ސިޓީގައި ބުނެފައިވެ އެވެ. އެހެން ނަމަވެސް އެ ފުލެޓުގެ ވެރިފަރާތުން ބުނީ 11 ވަނަ ފަންގިފިލާ ގެ އެޕާޓުމަންޓް އަކުން ކުރަންޖެހޭ މަސައްކަތެއް 12 ވަނަ ފަންގިފިލާގައި ދިރިއުޅޭ މީހުން ކުރަންޖޭ އެއްވެސް ސަބަބެއް ނުވިސްނޭ ކަމަށެވެ. އަދި އެ މައްސަލަ އަކީ މީގެ އަހަރެއް ކުރިން 10 ވަނަ ފަންގިފިލާ ގައި އުޅޭ މީހުން އެޗްޑީސީ އަށް އީމެއިލް މެދުވެރިކޮށް ޖެއްސި މައްސަލައެއް ކަމަށާއި އެ މައްސަލަ ހައްލު ވީ ފަހުން ވެސް އެތައް ދުވަހެއް ވެފައިވާ ކަމަށް އޭނާ ބުންޏެވެ.
މިކަމާއި ގުޅިގެން އެޗްޑީސީގެ ހޮޓްލައިން އަށް ގުޅުމުން ބުނީ، މިދިޔަ އަހަރުގެ އޮކްޓޫބަރު މަހު 10 ވަނަ ފަންގިފިލާ ގެ އެ އެޕާޓުމަންޓުން އެފަދަ މައްސަލައެއް ރިޕޯޓު ކޮށްފައިވާ ކަމަށެވެ. އަދި މައްސަލަ ހައްލު ކުރެވުނުތޯ ޓެކްނިކަލް ޓިމުގެ ބަހެއް ހޯދުމަށް ރާއްޖެ އެމްވީ އިން މަސައްކަތް ކުރި ނަމަވެސް އެ ޑިޕާޓުމަންޓްގެ އެއްވެސް ފަރާތަކާއި ގުޅޭގޮތް ވަނީ ނުވެފަ އެވެ.
