ސަފާރީތަކުގެ ކަންބޮޑުވުންތައް ގިނަވެ އެންމެ ފަހުން ސަފާރީތައް އެޗްޑީސީ އަށް ދާން ނިންމައިފި އެވެ.

ރާއްޖެ އެމްވީ އަށް މައުލޫމާތުދެއްވަމުން، ޔޮޓް އެސޯސިއޭޝަންގެ ރައީސް އަހުމަދު ވިޝާމް ވިދާޅުވީ މީގެ ކުރިން އެޗްޑީސީގެ މެނޭޖިންގ ޑިރެކްޓަރ ބްރިގޭޑިޔަރ ޖެނެރަލް (ރޓ) ޢަލީ ޒުހައިރު އާއި ބައްދަލުކުރުމަށް ހަމަޖެހިފައި އޮތީ އާދިއްތަ ދުވަހު ހެނދުނު 10:00ގައި ކަމަށެވެ. އެ ބައްދަލުވުމުގައި 156 ސަފާރީ ތަމްސީލްކުރުމަށް ހަމަޖެހިފައި ވާއިރު އޭގެ ތެރެއިން ޔޮޓް އެސޯސިއޭޝަނުން ރިޕްރެޒެންޓް ކުރަނީ 58 ސަފާރީ ކަމަށް އޭނާ ވިދާޅުވި އެވެ. ނަމަވެސް އެމްޑީ ބިޒީކޮށް އުޅުއްވާތީ އާދިއްތަ ދުވަހު މެންދުރުގެ ވަގުތަކަށް އެ ބައްދަލުވުން ފަސްކޮށްފައިވާ ކަމަށަް އޭނާ ވަނީ ވިދާޅުވެފަ އެވެ.

ހައުސިން ޑިވެލޮޕްމަންޓް ކޯޕަރޭޝަނުން ވަނީ 04 ނޮވެމްބަރ 2025ގައި ސަފާރީ އުޅަނދުތައް އެޅުމަށް، ގުޅީފަޅާއި، ތިލަފުށި އަދި ކުޑަގިރި އިން ސަރަހައްދު ތަކެއް ފާހަގަކޮށް އެސަރަހައްދު ތަކުގައި ސަފާރީ އެޅުމަށް އަންގާފަ އެވެ. އެހެން ނަމަވެސް އެ އެންގުމާއި އެކު އެއް ކަރުދާސް ކުރެވިފައިވާ ޗާޓް އަކީ 30 އޮކްޓޯބަރ 2025 ގައި އެ ކުންފުނިން ކުރި ޢިއުލާންގައި އެއް ކަރުދާސް ކުރެވިފައިވާ ޗާޓްގައިވާ ސަރަހައްދަށް ބަދަލުގެނެސް އިތުރު ސަރަހައްދެއް އިތުރުކުރެވިފައިވާ ޗާޓެއްކަން ފާހަގަކޮށްލެވެ އެވެ.

އެހެންކަމުން މިކަމުގެ ސަބަބުން ސަފާރީތަކުން ވަނީ ނުރުހުން ފާޅުކޮށްފަ އެވެ. ބުރާސްފަތި ދުވަހު މޯލްޑިވްސް ޔޮޓް އެސޯސިއޭޝަނުން ނެރުނު ބަޔާނެއްގައި ބުނެފައި ވަނީ އެޗްޑީސީގެ އިއުލާނާއި ގުޅިގެން ސަފާރީތަކަށް ވަރަށް ބޮޑު ނުތަނަވަސްކަމެއް ލިބިފައިވާ ކަމަށެވެ.

މިއީ ހެޔޮ ނިޔަތުގައި ޙަޤީޤަތުގައި ވެސް މަސައްކަތްކުރަން ބޭނުންވާ ސަރަހައްދު އެކަނި ހުސްކުރުމުގެ ބޭނުމުގައި ކުރެވުނު އިޢުލާނެއް ނަމަ އެސަރަހައްދު އޮންނާނީ 30 އޮކްޓޯބަރ 2025ގައި އިޢުލާންގައި ވެސް ހިމެނިފަ ކަމަށް ސަފާރީތަކުން ޤަބޫލު ކުރެ އެވެ.

މީގެ އިތުރުން ކުއްލިއަކަށް ދެ ދުވަސްތެރޭގައި މުޅި ފަޅު ހުސްކުރުމަށް އެންގުމުން އެކަމާއި މެދު ސަފާރީތަކުން ދަނީ ކަންބޮޑުވުން ފާޅުކުރަމުންނެވެ. ރާއްޖެ އެމްވީ އަށް މައުލޫމާތު ދެއްވަމުން ވިޝާމް ވިދާޅުވީ ސަފާރީތައް ހުޅުމާލެ ފަޅުން އެހެންފަޅަކަށް ގެންދާ އިރު ސަފާރީ ގެންގޮސް ބަހައްޓާ ފަޅަކާއި އާރުޓީއެލް ފެރީފަދަ ޚިދުމަތަކުން ގުޅާލެވެން ޖެހޭ ކަމަށެވެ.

އަދި އެކަމަށްޓަލާ ލުއިފަސޭހަގޮތް ތަކެއް ހޯދިގެން ނޫނީ ވަކި މުއްދަތެއް ނޭގި ކަނޑުމަތީގައި ސަފާރީތައް އަޅާފައި ބޭއްވުމަކީ ކަންބޮޑުވުމެއް ކަމަށް އޭނާ ވިދާޅުވި އެވެ.

"މިއީ އުނދަގޫ، ޚަރަދުބޮޑު، އަދި މޫސުމީ ތަފާތު ގެއްލުމާއި ކުރިމަތިލާންޖެހޭ ކަމެއް." އޭނާ ވިދާޅުވި އެވެ.

ޔޮޓް އެސޯސިއޭޝަންގެ ބަޔާނުގައި އިތުރަށް ބުނެފައި ވަނީ މިހާރު ނިންމާފައިވާ ގޮތަށް ޢަމަލު ކުރުމުގެ ބަދަލުގައި ވަކި ތަރުތީބަކުން ހުޅުމާލޭ ފަޅުތެރޭގައި ހުރި އުޅަނދުތައް އަތުރާލެވިއްޖެނަމަ ސަފާރީތަކުގެ ގޮތުގައި އޮޕަރޭޓްކުރާ 167 ސަފާރީގެ ތެރެއިން އެކިއެކި ބޭނުމަށް ހުޅުމާލެފަޅަށް ވަންނަން ބޭނުންވާ ސަފާރީތަކަށް ޖާގައޮންނާނެ ކަމުގައި ދެކޭ ކަމަށެވެ.

އެހެންކަމުން އެ ޖަމިއްޔާގެ ފަރާތުން އެދިފައި ވަނީ ޖަމިއްޔާގެ މެމްބަރުންގެ އިތުރުން ސަފާރީ އުޅަނދުތައް ދުއްވާ އެހެން ފަރާތްތަކުގެ ޙައްޤުތައް ވެސް ނުގެއްލޭ ގޮތަށް އެއްވެސް ފަރާތެއް ބާކީނުކޮށް އެޗްޑީސީ އާއި ސަރުކާރުގެ ކަމާއިބެހޭ އިދާރާތަކުން ގުޅިގެން މަސައްކަތްކޮށް އަވަސްހައްލެއް ހޯދާ ދިނުމަށެވެ.