ތިލަފުށީ ލޮރީ އެކްސިޑެންޓްގައި ހައްޔަރުކުރި މިީހާ ހެކިނެތުމުން ދޫކޮށްލައިފި
ލޮރީގެ ދަށުން ޖެހި ސްރީލަންކާ މީހާއަށް ސީރިއަސް އަނިޔާތަކެއް ލިބި ހޮސްޕިޓަލުގައި ފަރުވާދެމުންދޭ
ތިލަފުށީގައި ބޭނުންކުރާ ލޮރީ އެއް؛ ތިލަފުށީގައި ލޮރީއެއް ދަށުވެ ބިދޭސީއަކަށް ވަނީ ސީރިއަސް އަނިޔާތަކެއް ލިބިފަ
ކ. ތިލަފުށީގައި ހިނގި ނުރައްކާތެރި ލޮރީ އެކްސިޑެންޓެއްގައި ބިދޭސީއަކަށް ލިބުނު ސީރިއަސް އަނިޔާތަކާ ގުޅިގެން ހައްޔަރުކޮށްފައިވާ ލޮރީ ޑްރައިވަރު، ހެކިނެތުމުގެ ސަބަބުން ކޯޓުން ދޫކޮށްލައިފިއެވެ.
މި މައްސަލައިގައި ހައްޔަރުކޮށްފައިވަނީ އިންޑިއާގެ ރައްޔިތެއް ކަމަށްވާ 28 އަހަރުގެ ވިގްނޭޝް އަންނަޑުރާއީއެވެ. އޭނާ ހައްޔަރުކޮށްފައިވަނީ އެކްސިޑެންޓް ހިނގުމަށްފަހު، އަނިޔާވި މީހާއަށް އެހީތެރިކަމެއް ފޯރުކޮށްނުދީ އެ ސަރަހައްދުން ފިލި ކަމުގެ ތުހުމަތުގައެވެ. ނަމަވެސް ފުލުހުންގެ ފަރާތުން މި ތުހުމަތާ ގުޅޭ އެއްވެސް ހެއްކެއް ކޯޓަށް ހުށަހަޅާފައިނުވާތީ، އޭނާ ދޫކޮށްލުމަށް ކޯޓުން ވަނީ ނިންމާފައެވެ.
ފުލުހުން މަޢުލޫމާތު ދީފައިވާ ގޮތުގައި، މި ހާދިސާ ހިނގާފައިވަނީ 11 ސެޕްޓެންބަރު 2025 ވަނަ ދުވަހުގެ މެންދުރު 2:15 ހާއިރުއެވެ. އެކްސްކެވޭޓަރެއް ކައިރީގައި މަސައްކަތްކުރަމުންދިޔަ ސްރީލަންކާގެ ރައްޔިތެއްގެ ގައިގައި ލޮރީން ޖެހި ވެއްޓި، އޭނާގެ ގައިމަތިން ލޮރީ ގޮސްފައިވާ ކަމަށް ފުލުހުން ބުނެއެވެ.
އެކްސިޑެންޓްގައި އަނިޔާވި ސްރީލަންކާގެ ރައްޔިތާއަށް ވަނީ ސީރިއަސް އަނިޔާތަކެއް ލިބިފައެވެ. މިވަގުތު އޭނާއަށް އިންދިރާ ގާންދީ މެމޯރިއަލް ހޮސްޕިޓަލުގައި ފަރުވާ ދެމުންދާ ކަމަށް ފުލުހުން މަޢުލޫމާތު ދީފައިވެއެވެ.
ފުލުހުންގެ ފަރާތުން މި މައްސަލައިގެ ތަހުގީގު މިހާރުވެސް ކުރިއަށްދާ ކަމަށާއި، އިތުރު މަޢުލޫމާތު ލިބުމުން ހިއްސާކުރާނެ ކަމަށް ބުނެފައިވެއެވެ.
