ތިލަފުށީ ލޮރީ އެކްސިޑެންޓްގައި އަނިޔާވި މީހާގެ ގޮހޮރު ބުރިވެފައިވާކަން އައިޖީއެމްއެޗަށް އެނގުނީ ދެ ދުވަސް ފަހުން!

ރާއްޖޭގައި ސިއްހީ އިހުމާލުން ވަރަށް ގިނަ ހާދިސާތައް ހިނގައެވެ. އިހުމާލުން މީހުންގެ ފުރާނަ ގޮސްފައިވާ ކަމަށް އެތައް އާއިލާއަކުން ތުހުމަތުތައް ކޮށްފައިވެއެވެ. އެންމެ ބޮޑަށް މިތުހުމަތުތައް އަމާޒު ވަނީ ވެސް ސަރުކާރުގެ މައި ހޮސްޕިޓަލް އައިޖީއެމްއެޗްއަށެވެ.

އެގޮތުން އަނެއްކާ ވެސް އައިޖީއެމްއެޗްގެ އިހުމާލުން މީހެއްގެ ފުރާނަ މިވަނީ ނުރައްކަލަކަށް ހުށަހެޅިފައެވެ. މިފަހަރު މަރާ ހަނގުރާމަ ކުރަމުންދަނީ ރާއްޖޭގައި މަސައްކަތް ކުރަމުންދިޔަ ސްރީލަންކާގެ ރައްޔިތެކެވެ.

މިމަހުގެ 11 ވަނަ ދުވަހު މެންދުރުފަހު ގާތްގަނޑަކަށް 2:15 ހާއިރު ކ.ތިލަފުށީގައި ހިނގި ނުރައްކާތެރި އެކްސިޑެންޓުގައި ސީރިއަސް އަނިޔާތަކެއް ލިބުނު ލަންކާގެ ރައްޔިތަކަށް އައިޖީއެމްއެޗުގައި ދަނީ ފަރުވާ ދެމުންނެވެ. އެކްސްކެވޭޓަރެއް ކައިރީގައި މަސައްކަތް ކުރަމުންދިޔަ އެމީހާގެ ގައިގައި ލޮރީން ޖެހި ވެއްޓި، އޭނާގެ ގައިމަތިން ލޮރީ ގޮސްފައިވާ ކަމަށް ފުލުހުން ބުނެއެވެ.

އެމީހާގެ ހާލަތާ ގުޅޭގޮތުން މިމަހުގެ 13 ވަނަ ދުވަހުގެ ހެނދުނު އައިޖީއެމްއެޗްގެ މީޑިއާ އޮފިޝަލް ވިދާޅުވެފައިވަނީ އޭނާއަށް ފަރުވާ ދެމުންދަނީ ވޯޑުގައި ކަމަށެވެ. އާއްމު ގޮތެއްގައި ވޯޑުގައި ފަރުވާ ދެމުންދަނީ ހާލު ސިރިއަސް ނޫން މީހުންނަށެވެ.

އެހެންކަމުން އެމީހާގެ ހާލު ސްޓޭބަލް ކަމަށް ގިނަ ބަޔަކު ގަބޫލުކުރިއެވެ.

ނަމަވެސް މިމީހާ މަސައްކަތް ކުރަމުންދިޔަ ކުންފުނި، އިކުއިވި ޕްރައިވެޓް ލިމިޓެޑުގެ ފަރާތުން ރާއްޖެއެމްވީއަށް ކިޔައިދިން ގޮތުގައި އެމީހާ މިހާރު އޮތީ ވެންޓިލޭޓަރުގައެވެ.

މިމަހުގެ 11 ވަނަ ދުވަހުގެ މެންދުރުފަހު މިހާދިސާ ހިނގުމާއެކު ފަރުވާ ދިނުމަށް އައިޖީއެމްއެޗް އަށް ގެނައި ނަމަވެސް އޭނާގެ ގޮހޮރު ބުރިވެފައިވާކަން އެނގުނީ މިމަހުގެ 13 ވަނަ ދުވަހުގެ ރޭގެ ވަގުތެއްގައެވެ. އެނގުމާއެކު އޮޕަރޭޝަނެއްކޮށް ގޮހޮރުން ބައެއް ބުރިކޮށްލާފައިވާ ކަމަށް އެކުންފުނިން ބުނެފައިވެއެވެ.

އެކްސިޑެންޓުގައި އެމީހާގެ ގޮހޮރު ބުރިވެފައިވާ ކަމަށާއި، ހަށިގަނޑަށް ނަޖިސް ބޭރުވެ، ސިއްހީ ގިނަ މައްސަލަތައް ކުރިމަތިވެ ހާލު އިތުރަށް ގޯސްވި ކަމަށް ޑޮކްޓަރުންނާ ހަވާލާދީ ކުންފުނިން ބުނެފައިވެއެވެ. އަދި ގޮހޮރު ބުރިވިކަން އެހާ ލަހުން ދެނެގަނެވިފައިވާތީ، އެމީހާއަށް ފަރުވާ ދިނުމުގައި ހޮސްޕިޓަލްގެ އިހުމާލު ވަރަށް ބޮޑު ކަމަށް ތުހުމަތުކޮށްފައިވެއެވެ.

މިއަދު އެމީހާ ދަނީ މަރާ ހަނގުރާމަ ކުރަމުންނެވެ. ހާލު ކްރިޓިކަލްވެ، ފަރުވާ ދެމުންދަނީ ވެންޓިލޭޓަރުގައެވެ.

ބޭރު މީހަކަށްވުމާއެކު ދޭންޖެހޭ ސަމާލުކަން ދީފައިނުވާ ކަމާއި، މިހާރު އެމީހާގެ ސިއްހީ ހާލަތާއި ގުޅިގެން ހޮސްޕިޓަލުން ޕޮރޮސީޖަރ ކުރިއަށް ގެންދިޔަ ގޮތުގެ ރިޕޯޓަކަށް ކުންފުނިން ވަނީ އެދިފައެވެ. އަދި އިތުރު މައުލޫމާތު ލިބުމުން ހިއްސާ ކުރާނެ ކަމަށް ވެސް އިކުއިވި ކުންފުނީގެ ފަރާތުން ބުނެފައިވެއެވެ.

ކުންފުނީގެ މިތުހުމަތުތަކާއި ގުޅިގެން އައިޖީއެމްއެޗްގެ މީޑީއާ އޮފިޝަލަށް ގުޅުމުން ވިދާޅުވީ މިމަހުގެ 13 ވަނަ ދުވަހުގެ ހެނދުނު ވެސް އެމީހާއަށް ފަރުވާ ދެމުންދިޔައީ ވޯޑުގައި ކަމަށެވެ. އިތުރަށް ބަލަންޖެހޭ ކަންކަން ބެލުމަށްފަހު މައުލޫމާތު ހިއްސާ ކުރާނެ ކަމަށް އޮފިޝަލް ވިދާޅުވެފައިވެއެވެ.

މިހާދިސާގައި ލޮރީ ދުއްވި ސޮނީ ހާޑްވެއަރ ކުންފުނީގައި މަސައްކަތް ކުރާ 28 އަހަރުގެ ވިގްނޭޝް އަންނަދުރާއި އެކްސިޑެންޓު ހިނގުމާއެކު އެހީތެރިކަން ފޯރުކޮށްނުދީ ފިލިކަމުގެ ތުހުމަތުގައި ހައްޔަރުކުރި އެވެ. ނަމަވެސް ހެކި ނެތުމުގެ ސަބަބުން ކްރިމިނަލް ކޯޓުން އޭނާ ވަނީ ދޫކޮށްލާފައެވެ.

މި މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުނެއެވެ.