ކ. ތިލަފުށީގައި ލޮރީއެއް ދަށުވެ، ސީރިއަސް އަނިޔާތަކެއް ލިބުނު މީހާއަށް ވޯޑުގައި ފަރުވާ ދެމުންދާ ކަމަށް އައިޖީއެމްއެޗުން ބުނެފިއެވެ.

ހޮނިހިރު ދުވަހު ރާއްޖެއެމްވީއަށް އައިޖީއެމްއެޗްގެ މީޑީއާ އޮފިޝަލް ވިދާޅުވީ ލޮރީއެއް ދަށުވެ، އަނިޔާ ލިބުނު 53 އަހަރުގެ ފިރިހެނަކަށް ފަރުވާ ދެމުންދާ ކަމަށާއި، މިހާރު ފަރުވާ ދެމުންދަނީ ވޯޑުގައި ކަމަށެވެ. ނަމަވެސް ލިބުނު އަނިޔާގެ ތަފްސީލު އަދި މިހާރުގެ ހާލަތު ހާމަކޮށްފައިނުވެއެވެ.

މިހާދިސާއާ ރިޕޯޓު ފުލުހުންނަށް ލިބިފައިވަނީ 11 ސެޕްޓެންބަރު 2025 ވަނަ ދުވަހުގެ މެންދުރު 2:15 ހާއިރުއެވެ.

ފުލުހުން ބުނީ، ތިލަފުށީގައި އެކްސްކެވޭޓަރެއް ކައިރީގައި މަސައްކަތް ކުރަން ހުރި މީހެއްގެ ގައިގައި ލޮރީއަކުން ޖެހި ވެއްޓި، އެމީހާގެ ގައިމަތިން ލޮރީ ގޮސްފައިވާ ކަމަށެވެ. މި އެކްސިޑެންޓުގައި އަނިޔާވެފައިވަނީ ސްރީލަންކާ ފިރިހެނަކަށް ކަމަށާއި، އެމީހާއަށް އައިޖީއެމްއެޗްގައި ދަނީ ފަރުވާ ދެމުންދާއިރު، އެމީހާއަށް ސީރިއަސް އަނިޔާތަކެއް ވެފައިވާ ކަމަށެވެ.

މީގެ އިތުރުން ފުލުހުން ބުނީ، މިމައްސަލައާ ގުޅިގެން ލޮރީ ދުއްވި މީހާ ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، ލޮރީ ވަނީ ޓޯ ކޮށްފައިވާ ކަމަށެވެ. އަދި މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ އިންޑިއާގެ ރައްޔިތެއް ކަމަށްވާ، 28 އަހަރުގެ ވިގްނޭޝް އަންނަދުރާއި އެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.