ދެ ކޮންޓެއިނަރު ސިނގިރޭޓް ވަގަށް ނެގި މައްސަލަ: ހައްޔަރުކުރި 5 ވަނަ މީހާގެ ވަނަވަރު އާއްމުކޮށް، ޝަރީއަތް ނިމެންދެން ބަންދުކޮށްފި
ތިލަފުށީގައި ޚާއްސަ އޮޕަރޭޝަނެއް ހިންގައި، ވަގަށް ނަގާފައިވާ 2 ކޮންޓެއިނަރުގެ ބައިތަކެއް ހޯދާފައިވޭ
ދެ ކޮންޓެއިނަރު ސިނގިރޭޓް ވަގަށް ނެގި މައްސަލާގައި ހައްޔަރުކުރި ހަސަން އަބްދުއްރަހްމާން
މޯލްޑިވްސް ކަސްޓަމްސް ސަރވިސްއިން ހިފަހައްޓާފައި ހުރި 2 ކޮންޓެއިނަރު ސިނގިރޭޓް ވަގަށް ނެގި މައްސަލައާ ގުޅިގެން ހައްޔަރުކުރި 5 ވަނަ މީހާގެ ވަނަވަރު އާއްމުކޮށް، ޝަރީއަތް ނިމެންދެން ބަންދުކޮށްފިއެވެ.
ބުދަ ދުވަހު ފުލުހުން ބުނީ، މި މައްސަލައާ ގުޅިގެން 21 އޮކްޓޫބަރު 2025 ވަނަ ދުވަހުގެ ރޭ އިތުރު މީހަކު ހައްޔަރުކޮށްފައިވާ ކަމަށެވެ.
އެއީ ލިންކް / ކ.ތުލުސްދޫ، 52 އަހަރުގެ ހަސަން އަބްދުއްރަހްމާން އެވެ.
ފުލުހުން ބުނީ، ހަސަން އަބްދުއްރަހްމާންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ޝަރީއަތް ނިމެންދެން ބަންދުކުރުމަށް އަމުރުކޮށްފައިވާ ކަމަށެވެ.
މީގެ އިތުރުން ފުލުހުން ބުނީ، މި މައްސަލައިގެ ތަހުގީގުގެ ތެރެއިން 19 އޮކްޓޫބަރު 2025 ވަނަ ދުވަހު ތިލަފުށީގައި ހިނގި ބަލައި ފާސްކުރުމުގެ އޮޕަރޭޝަނެއްގައި ތިލަފުށީގެ ގިނަ ސައިޓްތަކެއް ބަލައި ފާސްކޮށްފައިވާ ކަމަށެވެ. މި އޮޕަރޭޝަންގެ ތެރެއިން، ވަގަށް ނަގާފައިވާ 2 ކޮންޓެއިނަރުގެ ބައިތައް ހޯދައި އެތަކެތި ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން ބުނެއެވެ.
26 އޭޕްރީލް 2025 ވަނަ ދުވަހު މޯލްޑިވްސް ކަސްޓަމްސް ސަރވިސްއިން ހިފަހައްޓާފައި ހުރި 2 ކޮންޓެއިނަރު ސިނގިރޭޓް މޯލްޑިވްސް ޕޯޓްސް ލިމިޓެޑް، ހުޅުމާލެ އިންޓަރނޭޝަނަލް ޓާރމިނަލްގައި ބަހައްޓާފައި ހުއްޓާ ވަގަށް ނަގާފައިވާ މައްސަލަ ފުލުހުންނަށް ހުށަހަޅާފައިވަނީ 9 އޮކްޓޫބަރު 2025 ގައެވެ.
މި މައްސަލައާ ގުޅިގެން ހައްޔަރުކޮށްފައިވަނީ މިފްކޯގެ ޖެނެރަލް މެނޭޖަރު މުއާޒް އަލީ، ލޮޓަސް ފިހާރައިގެ ވެރިޔާ އަހުމަދު އާރިފް، އެޕޯލޯ ހޯލްޑިންގްސްގެ ވެރިޔާ މުހައްމަދު ވަހީދު އަދި ކަސްޓަމްސްގެ ސުޕްރިންޓެންޑެންޓް ޒިވާރު އިސްމާއިލްއެވެ.
ރާއްޖޭގެ ތާރީޚުގައި ހިނގި މިބާވަތުގެ އެންމެ ބޮޑު ވައްކަމާ ގުޅިގެން މި މައްސަލައިގައި ޝާމިލުވާކަމަށް ތުހުމަތުކުރެވޭ ކަސްޓަމާއި، އެމްޕީއެލްގެ ބައެއް މުވައްޒަފުން ސަސްޕެންޑް ކޮށްފައިވާއިރު، މައްސަލާގެ ތަހުގީގަށް މިހާތަނަށް 12 މީހަކު ފުރުން މަނާކޮށްފައިވެއެވެ.
ނަމަވެސް މި މައްސަލާގެ އަޑީގައި ސަރުކާރުގެ ބޮޑު ހިމެނޭ ކަމަށާއި، މައްސަލާގެ ތަހުގީގު ވަކި ދިމާލަކަށް އަނބުރާލުމަށް މި ސަރުކާރުން ވަރަށް ބޮޑަށް މަސައްކަތް ކުރާ ކަމަށް ސަރުކާރާ އިދިކޮޅު ފަރާތްތަކުން ދަނީ ތުހުމަތު ކުރަމުންނެވެ.
