އަދީބަށް އެކަށީގެންވާ ބޭސްފަރުވާ ލިބެންޖެހޭނެކަމަށް ޝެއިހު އިމްރާންވެސް ގޮވާލައްވައިފި!
އިމްރާނު އެގޮތަށް ގޮވާލެއްވީ އޭނާގެ ގާނޫނީ ވަކީލު އަދި އަދާލަތު ޕާޓީގެ ނައިބު ރައީސް އަލީ ޒާހިރު މެދުވެރިކޮށް
އަދާލަތު ޕާޓީގެ ލީޑަރު ޝެއިހު އިމްރާން
ކުރީގެ ނާއިބު ރައީސް އަހުމަދު އަދީބުއަށް އެކަށީގެންވާ ބޭސްފަރުވާ ފޯރުކޮށްދިނުމަށް 12 އަހަރުގެ ޖަލުހުމުމެއްގައިވާ އަދާލަތު ޕާޓީގެ ލީޑަރ ޝެއިހް އިމްރާން އަބްދުﷲ ވެސް ގޮވާލައްވައިފި އެވެ.
އިމްރާން އެގޮތަށް ގޮވާލައްވާފައިވާކަން ދޭހަވާގޮތަށް، އަދާލަތު ޕާޓީގެ ނާއިބު ރައީސް އަދި ޝެއިހް އިމްރާންގެ ގާނޫނީ ވަކީލު އަލީ ޒާހިރު ކުރެއްވި ޓްވީޓެއްގައި ވިދާޅުވީ 2015 ވަނަ އަހަރު އިދިކޮޅު ފަރާތްތަކުން މޭޑޭގައި މުޒާހަރާގައިވެސް އިމްރާން ވިދާޅުވެފައިވަނީ އަދީބަށް ދެރައެއް ލިބޭކަށް އަދި ދެރައެއް ދޭން ވެސް ބޭނުން ނުވާ ކަމަށެވެ. އަދީބު އޭރު ހުންނެވީ ސަރުކާރުގެ ތެރޭގައި ކަމަށާއި މިއަދު ޖަލުގައި ހުންނެވި އިރު އަމުދުން ދެރައެއް ލިބެން އެދިވަޑައިނުގަންނަވާ ކަމަށެވެ. އިންސާނިއްޔަތުކަމުގެ ގޮތުން ބެލި ނަމަވެސް އަދީބަށް ވެސް އެކަށީގެންވާ ބޭސްފަރުވާ ލިބެން ޖެހޭނެ ކަމަށެވެ.
ރައީސް ޔާމީން ވެރިކަމަށް ގެނައުމުގައާއި ރައީސް ޔާމީންގެ ސަރުކާރުގެ އެންމެ ބަސްވިކޭ ބޭފުޅެއްގެ ގޮތުގައި އިސްސަފުގައި މަސައްކަތްކުރެއްވި އަދި މިހާރު 33 އަހަރުގެ ޖަލު ހުކުމެއްގައިވާ އަދީބުގެ ބޭސްފަރުވާގެ މައްސަލައިގައި ދައުލަތުގެ ކަމާބެހޭ އިދާރާތަކުން އަދީބަށް އެ ފުރުސަތު ފޯރުކޮށްނުދޭކަމަށް އަދީބާއި އޭނާގެ އާއިލާއިން ވަނީ ބުނެފަ އެވެ.
އަދީބަށް އެކަށީގެންވާ ބޭސްފަރުވާ ފޯރުކޮށްދިނުމަށް މީގެކުރިން، ކުރީގެ ރައީސް ރައީސް މައުމޫން އަބްދުލްގައްޔޫމާއި ކުރީގެ ރައީސް މުހައްމަދު ނަޝީދު ވެސް ވަނީ ގޮވާލައްވާފަ އެވެ. މީގެއިތުރުން، އިދިކޮޅު ހުރިހާ ސިޔާސީ ޕާޓީތަކެއްގެ އިސް ސަފުގައި ހަރަކާތްތެރިވާ ބޭފުޅުންނާއި ރައްޔިތުންގެ މަޖިލީހުގެ ވެސް ގިނަ މެމްބަރުން ގެންދަވަނީ އަދީބަށް ބޭސްފަރުވާ ފޯރުކޮށްދޭންޖެހެކަމަށް ވިދާޅުވެ އެކި ޕޯސްޓްތައް ސޯޝަލް މީޑިއާގައި ހިއްސާ ކުރައްވަމުންނެވެ.
