އޭޕްރީލް މަހަށް ތާވަލްކޮށްފައިވާ ލޯކަލް ކައުންސިލް އިންތިހާބުގެ ރީރެޖިސްޓްރޭޝަނަށް ވަރަށް އަވަހަށް ހުޅުވާލާނެ ކަމަށާއި ރީރަޖިސްޓްރޭޝަނަށް އެކަށީގެންވާ މުއްދަތެއް ދޭނެ ކަމަށް އިލެކްޝަންސް ކޮމިޝަނުން ބުނެފި އެވެ.
މިކަމާ ގުޅޭ ގޮތުން މައުލޫމާތު ދެއްވަމުން އިލެކްޝަންސް ކޮމިޝަނުގެ މެންބަރު އަހްމަދު އަކްރަމް ވިދާޅުވީ ރީރަޖިސްޓްރޭޝަނަށް ވަރަށް އަވަހަށް ހުޅުވާލާނެ ކަމަށާއި އެކަމަށް މިހާރު މަސައްކަތްކުރަމުން އަންނަ ކަމަށެވެ.
މީގެ އިތުރުން އަކްރަމް ވިދާޅުވީ ލޯކަލް ކައުންސިލްގެ އިންތިހާބުގެ ކެންޑިޑޭޓުންގެ ޝަރުތުތަކަށް މަޖީލީހުން ބަދަލުތަކެއް ގެނެސް ބިލެއް ފާސްކޮށްފައިވާ އިރު އެ ބިލް ގާނޫނަކަށް ވެގެންދާ ހިސާބުން ފެށިގެން ގާނޫނުން ރައްޔިތުންނަށް ލިބޭ ފުރުސަތުތައް ދެވިގެންދާނެ ކަމަށެވެ.
އިންތިހާބުގެ ތާރީހުގެ ގޮތުގައި އެންމެ ފަހުން ކަނޑައަޅާފައިވާ ދުވަސް ބަދަލު ނުވާ ކަމަށާއި ރައްޔިތުންގެ މަޖިލީހުން މިދިޔަ ހަފްތާގައި ގެނައި ބަދަލުތަކާ ގުޅިގެން އިންތިހާބު ފަސް ވެދާނެކަން އަދި ނޫންކަން ވެސް ބުނަން ނޭންގޭ ކަމަށް އޭނާ ވިދާޅުވި އެވެ.
އިލެކްޝަންސް ކޮމިޝަނުން މިހާރު އިންތިހާބު ބޭއްވުމަށް ނިންމާފައިވަނީ އޭޕްރިލް މަހުގެ 15 ދުވަހެވެ.
ޖެނުއަރީ މަހުގެ 14 ވަނަ ދުވަހު ބޭއްވުމަށް ނިންމާފައި އޮތް ކައުންސިލް އިންތިހާބު ދެ މަސް ދުވަހަށް ފަސްކުރީ ޕީޕީއެމްގެ މުސްތަޝާރު، ރައީސް އަބްދުﷲ ޔާމީން ފެކްޝަނުން ސިވިލް ކޯޓަށް ހުށަހެޅި މައްސަލައާ ގުޅިގެންނެވެ. ކައުންސިލް އިންތިހާބު ފަސް ކޮށްފައިވަނީ ވަކި ބަޔަކަށް މަންފާތަކެއް ހޯދައި ދިނުމަށް ކަމަށް އެމްޑީޕީ އާއި ޕީޕީއެމްގެ މައުމޫން ޕެކްޝަނުން ވެސް ދަނީ ބުނަމުންނެވެ. އެހެން ނަމަވެސް އިލެކްޝަންސް ކޮމިޝަނުން ބުނެފައި ވަނީ އެފަދަ އެއްވެސް ކަމެއް ނުހިނގާ ކަމަށާއި ކޮމިޝަނުން އަބަދުވެސް މަސައްކަތް ކުރަނީ މިނިވަން އިންސާފުވެރި އިންތިހާބެއް ބޭއްވުމަށް ކަމަށެވެ.
