ވޮލީއަށް ގެނައި ބޮޑު ބަދަލާއެކު ފެންނަމުންދާ މަންޒަރުތަކުން ރަން މެޑަލެއް އެޅުމާ ދިމާލަށް ދެވޭކަމުގެ އިހްސާސް ކުރެވޭ ކަމަށް ޔޫތު މިނިސްޓަރު އަޙުމަދު މަޚުލޫފް ވިދާޅުވެއްޖެއެވެ.
މިނިސްޓަރު މަޚުލޫފް މިހެން ވިދާޅުވީ ވީއޭއެމް ސީޒަން ޑްރާފްޓްގައި ބައިވެރިވެ ވަޑައިގެން ދެއްކެވި ވާހަކަފުޅުގައެވެ. މިނިސްޓަރު ވިދާޅުވީ ވޮލީން ރަނގަޅު ނަތީޖާއެއް ނެރުމަށް ތަފާތު ވާހަކަ ދެއްކިއްޖެކަމަށާއި، ބައިވަރު ކަންކަން ކުރެވިއްޖެ ކަމަށެވެ. އޭގެ ތެރޭގައި ފުރަތަމަ ފަހަރަށް ރާއްޖޭގެ ޤައުމީ ވޮލީ ޓީމުތައް ޔޫރަޕުގައި ކޭމްޕް ކުރުމާއި، މީގެ ކުރިން ދުވަހަކުވެސް ބައިނަލްއަގުވާމީ އެކުވެރިކަމުގެ މެޗު ނުކުޅޭ ވަރަށް މެޗު ކުޅެވިއްޖެކަަމަށެވެ. އަދި ރާއްޖޭގެ އެކި ސަރަހައްދުތަކުގައި 50 އަށްވުރެ ގިނަ އައުޓް ޑޯ ވޮލީ ކޯޓުތަކުގެ މަސައްކަތް ކުރިއަށްދާ ކަމަށެވެ. މީގެ އިތުރުން އިންޑޯގެ 10 ވަރަކަށް ވޮލީ ކޯޓުގެ މަސައްކަތް ކުރެވޭކަމަށެވެ. އަދި މާލޭގައި ޓްރެއިނިން އިންޑޯ ސެންޓަރެއްގެ މަސައްކަތް ކުވެމުންދާ ކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ މިކަންކަމުގެ ސަބަބުން ވޮލީގައި ބޭނުންވާ ނަތީޖާގައި އަތް ޖައްސާލެވެން އުޅޭހެން ހީވި ނަމަވެސް، އެ ހިސާބަށް އަދި ނުދެވޭކަމަށެވެ. މިނިސްޓަރު ވިދާޅުވީ އެ ހިސާބަށް ވާސިލްވުމަށް ވީއޭއެމްގެ ރައީސް މުހައްމަދު ރަނޭޝް އާއި ޓީމުން ބުނަނީ ލީގުގެ ވާހަކަ ކަމަށެވެ. މިނިސްޓްރީން ފުޓުބޯޅައިގެ ކުލަބްތަކަށް ފައިސާ ދޭއިރު، ވޮލީގައި ވެސް އެކަން ކޮށްދިނުމަށް ތަކުރާރުކޮށް އެދޭ ވާހަކައެވެ.
އެހެންވީމާ، އެކަންކަން ރޭވިގެން މިއަދު މިތަނުގައި އަޅުގަނޑުމެން މިހެން ތިބިއިރު، މިތަނުން މި ފެންނަ މަންޒަރަކީ އަޅުގަނޑު ގަބޫލުކުރަނީ އިރާދަކުރެއްވިއްޔާ ކުރިއަށް އޮތް ސެންޓްރަލް ޒޯން މުބާރާތުގައި ވެސް، އަންނަ އަހަރު އޮންނަ ސާފް ގޭމްސްގައި ވެސް، އިންޑިއަން އައިލެންޑް އޯޝަން ގޭމްސްގައި ވެސް މެޑަލެއް އެޅުމާ ދިމާލަށް ދެވޭ ކަހަލަ އިހުސާސެއް އަޅުގަނޑަށް އެބަ ކުރެވޭ.ޔޫތު މިނިސްޓަރު މަޚުލޫފް
މީގެ އިތުރުން މިނިސްޓަރު ވިދާޅުވީ ކުޅުންތެރިންނާއި ކޯޗުންނަށް މިނިސްޓަރުގެ އިތުބާރު އޮތް ކަމަށެވެ. ލީގު ނިމިގެން ވެސް ކުރިއަށް އޮތް ސެންޓްރަލް ޒޯންއާ ހަމައަށް ދިޔުމަށް ދެން ކުރަންވީ ކޮންކަމެއްތޯ ބަލަމުންދާ ކަމަށް މިނިސްޓަރު ވިދާޅުވިއެވެ. އަދި މިނިސްޓަރު ވިދާޅުވީ ބޭނުންވާ ނަތީޖާއާ ހަމައަށް ދިޔުމަށް ސަރުކާރުން ދޭން ޖެހޭ ހުރިހާ އެއްބާރުލުމަކާއި އެހީތެރިކަމެއް ދޭނެ ކަމަށެވެ. މީގެ އިތުރުން މިނިސްޓަރ ވަނީ ކުޅިވަރު ކުރިއެރުވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ދެއްވާ އެހީތެރިކަމާއި އެއްބާރުލުމަށް ޝުކުރު އަދާކުރައްވާފައެވެ. އަދި ސޯޝަލް ކައުންސިލްގެ ރައީސްގެ ހައިސިއްޔަތުން ރައީސުލްޖުމްހޫރިއްޔާގެ ނައިބު ފައިސަލް ނަސީމް ދެއްވާ އެހީތެރިކަމާއި އެއްބާރުލުމަށް ވެސް ޝުކުރު އަދާ ކުރައްވާފައެވެ. ވޮލީން ގެންނަން ބޭނުންވާ ބަދަލު ގެނައުމަށް ވިއޭއެމުން ކުރާ މަސައްކަތަށް ވެސް މިނިސްޓަރު ވަނީ ޝުކުރު އަދާކޮށްފައެވެ.
އިތުރަށް މިނިސްޓަރު ވިދާޅުވީ މިއަހަރުގެ ލީގަކީ ކާމިޔާބު އަދި ފުރިހަމަ ލީގަކަށް ވާނެ ކަމަށް އުންމީދުކުރާ ކަމަށެވެ. އަދި މިހާރު ސޯޝަލް ސެންޓަރު ފިނިވާނެ ކަމަށާއި، ވީހާވެސް ގިނަ މީހުން ކޮންމެ ރެޔަކު ސޯޝަލް ސެންޓަރު ފުރާލަދީ، ކުޅުންތެރިން ދައްކާ ރީތި ކުޅުން ބަލާލަން އެންމެހައި ރައްޔިތުންނަށް ދައުވަތު ދެއްވާކަމުގައެވެ.
