ޖުނެއިދު ސިފައިންގެ ކްލަބްގެ ކެޕްޓަންކަމުން ކޯޗުކަމަށް!
ޖުނެއިދު ކުރިން ހުރީ އެސިސްޓެންޓް ކޯޗަކަށް
ސިފައިންގެ ކްލަބްގެ ކެޕްޓަން ޖުނެއިދު ތަށްޓެއް އުފުލާލަނީ
ދިވެހި ސިފައިންގެ ކްލަބްގެ ވޮލީ ޓީމްގެ ހެޑް ކޯޗަކަށް އެކްލަބްގެ އެންމެ ކާމިޔާބު ކެޕްޓަން އަބުދުالله ޖުނެއިދު ހަމަޖައްސައިފިއެވެ. މިސީޒަންގައި ސިފައިންގެ ފިރިހެން ވޮލީ ޓީމް ނިކުންނާނީ ޖުނެއިދުގެ އިރުޝާދުގެ ދަށުންނެވެ.
ޖުނެއިދުއަކީ ފަނަރަ ވަރަކަށް އަހަރު ސިފައިންގެ ކްލަބަށް ކުޅެ, އެންމެ ގިނަ ދުވަހު އެޓީމްގެ ކެޕްޓަންކަން ކުރި ކުޅުންތެރިޔާއެވެ. ކުޅުން ހުއްޓާލުމަށްފަހު ފަހުން ފެނުނީ ޤައުމީ ވޮލީ ޓީމްގެ އެސިސްޓެންޓް ކޯޗެއްގެ އިތުރުން މެނޭޖަރުގެ ޒިންމާވެސް އުފުލަމުން ދިޔަތަނެވެ. އަދި ސިފައިންގެ ޓީމްގައިވެސް އެސިސްޓެންޓް ކޯޗެއްގެ ޒިންމާ އައީ އަދާކުރަމުންނެވެ.
މިއީ ޖުނެއިދު ބޮޑު ޓީމެއްގެ ހެޑް ކޯޗުކަން ކުރާ ފުރަތަމަ ފަހަރެވެ. މީގެކުރިން އޭނާ އިރުޝާދުދީފައިވަނީ ސްކޫލް އަދި ކޮލެޖް ތަކުގެ ޓީމްތަކަށެވެ.
ހަމައެކަނި އޮފީސް މުބާރާތްތަކުގައި ސިފައިންގެ ކްލަބަށް ވާދަކުރެވޭގޮތަށް އޮތް އިރުންފެށިގެން ސިފައިންގެ ކްލަބަށް ކުޅެމުން އައި ޖުނެއިދު ބުނީ ހެޑް ކޯޗުކަމަކީ އޭނާ އުއްމީދުކުރިކަމެއް ނޫންކަމަށެވެ. ބޮޑަށް ބޭނުންވީ ކުޅުންތެރިން އުފެއްދުމުގެ މަސައްކަތްކުރަން ކަމަށް އޭނާ ބުންޏެވެ.
ސިފައިންގެ ކްލަބްގައި އޭނާއާއެކު ކުޅުނު ކުޅުންތެރިން އަދިވެސް އެބަތިއްބެވެ. އޭގެތެރެއިންވެސް އެންމެ މުހިއްމު ކުޅުންތެރިއަކީ އަހުމަދު އަބުދުލްކަރީމް (ލޯންގޭ) އެވެ. ލޯންގޭއާއެކު ސިފައިންގެ ކްލަބާއި, ޤައުމީ ޓީމަށްވެސް ޖުނެއިދު ވަނީ ކުޅެފައެވެ. ޖުނެއިދު ބުނީ މިއަހަރު ސިފައިންގެ ޓީމާއެކު ރަނގަޅު ކާމިޔާބީއެއް ހޯދޭނެކަމަށް ޤަބޫލުކުރާކަމަށެވެ.
