ޕޮލިހާއި، ވެމްކޯއަށް ހުއްޓުމެއް ނެތް، ތިންވަނަ މެޗުންވެސް މޮޅު

ވޮލީބޯޅަ އެސޯސިއޭޝަންކަޕްގެ އަންހެން ޑިވިޝަންގެ ޕޫލް ބީގައި ޕޮލިސް ކްލަބް ކުޅުނު ތިންވަނަ މެޗުވެސް ކާމިޔާބުކޮށްފިއެވެ.

ރަނގަޅު ފޯމްގައި އޮތް ޕޮލިސް ކްލަބް ތިންވަނަ މެޗު ކާމިޔާބުކުރީ ހާފްލައިން ލިންކޭޖާ ވާދަކޮށް 3-1 ސެޓުންނެވެ. މެޗުގެ ސެޓްތައް ޕޮލިސް ކްލަބުން ގެންދިޔައީ 25-8, 25-3, 23-25, އަދި 25-5 ނެވެ. މެޗުގެ މޮޅު ކުޅުންތެރިއަކީ ޕޮލިސް ކްލަބްގެ ކަމަނަ ބިސްތާއެވެ. ގްރޫޕް ސްޓޭޖްގައި ޕޮލިހަށް ބާކީ އޮތީ ވޮލީބޯލް ޔޫތް ނިއުޖެނެރޭޝަންއާ ވާދަކުރާ މެޗެވެ. އެމެޗު ކުޅޭނީ އަންނަ ހޮނިހިރު ދުވަހުގެރެއެވެ.

މުބާރާތުގެ ޕޫލް އޭގައި ވެމްކޯވެސް ކުރިއަށްދަނީ މޮޅުވުމުގެ ސިލްސިލާގައެވެ. ވެމްކޯ ތިންވަނަ މެޗު ކާމިޔާބުކުރީ ހިންމަފުށި ވިކްޓޯރިއަސް ކްލަބާ ވާދަކޮށް ސީދާ ތިން ސެޓުންނެވެ. މެޗުގެ ސެޓްތައް ވެމްކޯއިން ގެންދިޔައީ 25-7, 25-11, އަދި25-4 ނެވެ. މެޗުގެ މޮޅު ކުޅުންތެރިއަކީ ވެމްކޯގެ އައިޝަތު މާޖިދާއެވެ. ވެމްކޯއަށް ބާކީ އޮތީ ކްލަބް ވޮލީބޯލްއާ ވާދަކުރާ މެޗެވެ.