އެސޯސިއޭޝަން ކަޕް: ހިންމަފުއްޓާއި ކުލަބް އީގަލްސް މޮޅުވެއްޖެ

އެސޯސިއޭޝަން ކަޕްގައި މިރޭ ހިންމަފުށި ވިކްޓޯރިއަސް ސްޕޯޓްސް ކުލަބާއި ކުލަބް އީގަލްސް ކުޅުނު މެޗުން ދެ ޓީމު މޮޅުވެއްޖެއެވެ.

ޒުވާނުންގެ މަރުކަޒުގެ އެތެރޭ ހޯލުގައި މިރޭ ކުޅުނު ފުރަތަމަ މެޗުގައި ހިންމަފުށި ނިކުތީ އަލްމާ ސްޕޯޓްސް ކުލަބާ ދެކޮޅަށެވެ. މި މެޗު ސީދާ ތިން ސެޓުން ކާމިޔާބުކުރީ ހިންމަފުއްޓެވެ. މެޗުގެ ސެޓުތައް އެ ޓީމުން ހޯދީ 17-25، 23-25 އަދި 19-25 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ހިންމަފުށީގެ ފާތިމަތު ރާޝިދާއެވެ.

މިރޭ ކުޅުނު ދެ ވަނަ މެޗުގައި ކުލަބް އީގަލްސް ނިކުތީ ކުލަބް ހާފް ލައިން ލިންކޭޖާ ދެކޮޅަށެވެ. މި މެޗު ފަސޭހަކަމާއެކު ސީދާ ތިން ސެޓުން ކާމިޔާބުކުރީ އީގަލްސްއެވެ. އީގަލްސް އިން މެޗުގެ ސެޓުތައް ހޯދީ 12-25، 06-25 އަދި 13-25 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ އީގަލްސްގެ ފާތިމަތު މަޒިއްޔާއެވެ.

މުބާރާތުގެ ކުޅުން މާދަމާ ރޭ ވެސް އޮންނާނެއެވެ. މާދަމާ ރޭގެ ފުރަތަމަ މެޗުގައި ކުލަބް ވޮލީބޯލް ނިކުންނާނީ ޔޫތު ނިއު ޖެނަރޭޝަނާ ދެކޮޅަށެވެ. އަދި މާދަމާ ރޭގެ ދެ ވަނަ މެޗުގައި ވޮލީބޯލް ޔޫތު ނިއު ޖެނަރޭޝަނުން ނިކުންނާނީ ދިވެހި ސިފައިންގެ ކުލަބާ ދެކޮޅަށެވެ.

ޕޫލް އޭގެ އެއް ވަނަ މަގާމުގައި އޮތީ ކުޅުނު ދެ މެޗުން ލިބުނު ހަ ޕޮއިންޓާއެކު ކުލަބް ވެމްކޯއެވެ. ދެ ވަނައިގައި އޮތް ކުލަބް ވޮލީބޯލްއަށް ވެސް ދެ މެޗުން ލިބެނީ ހަ ޕޮއިންޓެވެ. ތިން ވަނަ މަގާމުގައި އޮތް ހިންމަފުއްޓަށް ތިން މެޗުން ލިބެނީ ހަ ޕޮއިންޓެވެ. އެ ޓީމު ވަނީ ކުޅުނު ތިން މެޗުގެ ތެރެއިން އެއް މެޗުން ބަލިވެފައެވެ. ހަތަރު ވަނަ އަދި ފަސް ވަނައިގައި އޮތް ޔޫތު ނިއު ޖެނަރޭޝަނާއި އަލްމާ ސްޕޯޓްސް ކުލަބަށް އެއްވެސް ޕޮއިންޓެއް ލިބިފައެއް ނުވެއެވެ.

ޕޫލް ބީގެ އެއް ވަނަ މަގާމުގައި އޮތީ ޕޮލިހެވެ. އެއީ ކުޅުނު ދެ މެޗުން މޮޅުވެ ހަ ޕޮއިންޓު ހޯދައިގެންނެވެ. ދެ ވަނަ މަގާމުގައި އޮތް ކުލަބް އީގަލްސް އަށް ވެސް ލިބެނީ ހަ ޕޮއިންޓެވެ. އެ ޓީމު ވަނީ ކުޅުނު ތިން މެޗުގެ ތެރެއިން ދެ މެޗުން މޮޅުވެ، އެއް މެޗުން ބަލިވެފައެވެ. ޕޫލްގެ ތިން ވަނަ މަގާމުގައި ތިން ޕޮއިންޓާއެކު އޮތީ ވޮލީބޯލް ޔޫތު ނިއު ޖެނަރޭޝަނެވެ. އެ ޓީމު ވަނީ ކުޅުނު ދެ މެޗުގެ ތެރެއިން އެއް މެޗުން މޮޅުވެ، އެއް މެޗުން ބަލިވެފައެވެ. ދިވެހި ސިފައިންގެ ކުލަބް އޮތީ ކުޅުނު ދެ މެޗުގެ ތެރެއިން އެއް މެޗުން މޮޅުވެ، އެއް މެޗުން ބަލިވެ ލިބުނު ތިން ޕޮއިންޓާއެކު ހަތަރު ވަނައިގައެވެ. މި ޕޫލްގެ ފުލުގައި އޮތް ކުލަބް ހާފް ލައިން ލިންކޭޖަށް އެއްވެސް ޕޮއިންޓެއް ނުލިބެއެވެ.