ޗައިނާގެ ވެރިރަށް ބެއިޖިން އިން ފެންނަމުންދާ ކޮވިޑް-19ގެ ކޭސްތަކުގެ އަދަދު ވަރަށް ބޮޑަށް ދަށަށް ދާން ފަށާފައިވާކަމަށް ބެއިޖިން މުނިސިޕަލް ގަވަމެންޓްގެ ތަރުޖަމާން ޝޫ ހެޖިއަން ވިދާޅުވެއްޖެއެވެ.
އާދިއްތަ ދުވަހު ނޫސްވެރިންނާ ބައްދަލުކުރައްވާ ވާހަކަދައްކަވަމުން ޝޫ ވަނީ ޖެހި ޖެހިގެން ހަތް ދުވަހު ބެއިޖިން ގައި ކޮވިޑް-19ގެ ކޭސްތައް ފެންނަ ވަރު ވަރަށް ބޮޑަށް ދަށަށް ގޮސްފައިވާކަމަށް ވިދާޅުވެފައެވެ. މިއީ ބައްޔާ ދެކޮޅަށް އެޅެމުންދާ ހަރުދަނާ ފިޔަވަޅުތަކުގެ ސަބަބުން ކަމަށް ޝޫ ފާހަގަކުރެއްވިއެވެ.
ޝޫ ވަނީ އެއް މަސް ދުވަހު ކޮވިޑާ ހަނގުރާމަ ކުރުމަށްފަހު މިހާރު ބެއިޖިން ގައި ކޭސްތައް މިވަނީ ފާހަގަކޮށްލެވޭ ވަރަށް ދަށަށް ދާން ފަށާފައިވާކަމަށް ވިދާޅުވެފައެވެ. އޭނާ ވަނީ ކޭސްތައް ފެންނަ ވަރު އަލުން އަނބުރާ ކޮންޓްރޯލް ކުރެވިފައިވާ ކަމަށާއި ސަރުކާރުން ބަންދުކޮށް ކޮންޓްރޯލް ކުރަމުންދާ ސަރަހައްދުތައް ފިޔަވާ އެހެން ސަރަހައްދުތަކުން އައު ކޭސްތައް މިހާރު ނެފެންނަ ކަމަށްވެސް ވިދާޅުވެފައެވެ.
މިހާރު ކޭސްތައް ކޮންޓްރޯލް ކުރެވިފައި ހުރި ނަމަވެސް ކުރިއަށް އޮތްތާގައި ކޭސްތައް އިތުރުވުމުގެ ފުރުސަތު އޮތުމުން އެކަމަށް ސަމާލުވެގެން ތިބުމަށް އިލްތިމާސްކުރައްވާފަވެއެވެ.
ހޮނިހިރު ދުވަހު ބެއިޖިން އިން ރިޕޯޓުކޮށްފައި ވަނީ 19 ކޭސް އެވެ. އާދިއްތަ ދުވަހު ހަތް ކޮވިޑް-19 ކޭސް ރިޕޯޓް ކޮށްފައިވާއިރު، އޭޕްރިލް 22ން އާދިއްތަ ދުވަހަށް އެސިޓީން ރިޕޯޓުކޮށްފައި ވަނީ 1،730 ކޭސްއެވެ.
