އެސޯސިއޭޝަން ކަޕް: ވެމްކޯ އަދި ޕޮލިސްވެސް މޮޅުވެއްޖެ

އެސޯސިއޭޝަން ކަޕްގެ އަންހެން ޑިވިޝަންގައި ރޭ ކުލަބް ވެމްކޯ އާއި ޕޮލިސް ކުލަބް ކުޅުނު މެޗުން ދެ ޓީމު ވެސް މޮޅުވެއްޖެއެވެ.

ޒުވާނުންގެ މަރުކަޒުގެ އެތެރޭ ހޯލުގައި ރޭ ކުޅުނު ފުރަތަމަ މެޗުގައި ކުލަބް ވެމްކޯ ނިކުތީ ޔޫތު ނިއު ޖެނަރޭޝަންއާ ދެކޮޅަށެވެ. ފަސޭހަކަމާއެކު ވެމްކޯއިން އެ މެޗު ކާމިޔާބުކުރީ ސީދާ ތިން ސެޓުންނެވެ. މެޗުުގެ ސެޓުތައް އެ ވެމްކޯއިން ހޯދީ 07-25، 07-25 އަދި 08-25 ންނެވެ. މެޗުގެ މޮޅު ކުޅުންތެރިޔާއަަށް ހޮވުނީ ވެމްކޯގެ ޖޫޒަން ޒަރީރުއެވެ.

ދެ ވަނަ މެޗުގައި ބައްދަލުކުރީ ޕޮލިސް ކުލަބާއި ދިވެހި ސިފައިންގެ ކުލަބެވެ. މި މެޗުގެ ސެޓުތަކުގެ ކުޅުން ދިޔައީ ވާދަވެރިކޮށެވެ. ފޯރި ގަދަ މި މެޗު ޕޮލިހުން ކާމިބުކުރީ ސީދާ ތިން ސެޓުންނެވެ. މެޗުގެ ސެޓުތައް ޕޮލިހުން ހޯދީ 15-25، 29-31 އަދި 19-25 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޕޮލިހުގެ ހައްވާ ރާޝިދާއެވެ.

މުބާރާތުގެ ކުޅުން މިރޭ ވެސް ކުރިއަށް ދާނެއެވެ. މިރޭގެ ފުރަތަމަ މެޗުގައި ބައްދަލުކުރާނީ އަލްމާ ސްޕޯޓްސް ކުލަބާއި ހިންމަފުށި ވިކްޓޯރިއަސް ސްޕޯޓްސް ކުލަބެވެ. އަދި ދެ ވަނަ މެޗުހައި ބައްދަލުކުރާނީ ކުލަބް އީގަލްސް އާއި ކުލަބް ހާފް ލައިން ލިންކޭޖެވެ.