ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ) އިން ކުރިއަށްގެންދާ ތަހުޤީޤަކަށް ލަންކާގެ ކުރީގެ ބޮޑުވަޒީރު މަހިންދަ ރާޖަޕަކްސާގެ ބަޔާނެއް ނަގައިފިއެވެ.
ޑެއިލީ މިރޯ ނޫހުން ރިޕޯޓުކޮށްފައިވާ ގޮތުގައި ސީއައިޑީން މި ބަޔާން ނަގާފައިވަނީ ބުދަ ދުވަހުގެ ވަގުތެއްގައެވެ. އެއީ މެއި މަހުގެ 9 ވަނަ ދުވަހު ލަންކާގެ ކޮލުޕިތިޔާ އާއި ގޯލް ފޭސް ގްރީންގައި ހިނގާދިޔަ ހަމަނުޖެހުންތަކާއި ގުޅިގެންނެވެ. އެއީ ސަރުކާރާ ދެކޮޅަށް މުޒާހަރާކުރާ މީހުންނާ ސަރުކާރަށް ތާއީދުކުރާ މީހުންނާ ދެމެދު ހިނގި ހަމަނުޖެހުންތަކެކެވެ.
މި ހަމަނުޖެހުންތަކުގައި ސަރުކާރަށް ތާއީދު ކުރާ ފަރާތްތަކުން ވަނީ ސުލްޙަވެރިކަމާއެކު އިހުތިޖާޖުކުރަމުން ދިޔަ ފަރާތްތަކާ ދެކޮޅަށް ބާރުގެ ބޭނުންކޮށްފައެވެ.
ފުލުހުންނާ ޙަވާލާދީ އެ ނޫހުން ރިޕޯޓުކޮށްފައިވާ ގޮތުގައި ބަޔާން ނެގުމަށް ސީއައިޑީން ގާތްގަނޑަކަށް 3 ގަޑިއިރު ހޭދަކޮށްފައިވެއެވެ. އެގޮތުން ބަޔާން ނަގާފައިވަނީ ކޮލަމްބޯގައި މަހިންދަ ރާޖަޕަކްސާ ދިރިއުޅުއްވާ ގެކޮޅުގައިކަމަށް ރިޕޯޓުތައް ބުނެއެވެ.
މީގެ ކުރިން ސީއައިޑީން ވަނީ ލަންކާ ސަރުކާރުގެ ކުރީގެ ކެބިނެޓް މިނިސްޓަރުންނާއި، ނަމާލް ރާޖަޕަކްސާގެ ބަޔާންވެސް ނަގާފައެވެ.
