އީސްޓަރ ސަންޑޭ ފާހަގަކުރަމުން ދަނިކޮށް ލަންކާއަށް ޓެރަރިސްޓް ހަމަލާ ދިނުމުގައި ބައިވެރިވި ކަމަށް ތުހުމަތުކުރެވޭ ޓެރަރިސްޓުންގެ ހަތް ބިލިޔަން ރުޕީސް މުދަލާއި، 140 މިލިޔަން ރުޕީސްގެ ފައިސާ ލަންކާގެ ސީއައިޑީ ފުލުހުން ހޯދާފައިވާ ކަމަށް އެ ގައުމުގެ ފުލުހުންގެ ތަރުޖަމާނު ރުވަން ގުނަސޭކަރު ވިދާޅުވެއްޖެއެވެ.

އެ ގައުމުގެ މީޑިޔާތަކަށް ދެއްވި އިންޓަރވިއުއެއްގައި ގުނަސޭކަރު ވިދާޅުވެފައި ވަނީ އޭގެ ތެރެއިން ދެ ބައިކުޅަ އެއްބައި ފައިސާ ސީއައިޑީގެ ބެލުމުގެ ދަށުގައި ހުރިއިރު، އަނެއް ބައި ފާއިސާތައް ހުރީ އެކި ބޭންކް އެކައުންޓްތަކައް ޑިޕޮޒިޓްކޮށްފައި ކަމަށެވެ.

"ބޮމުގެ ހަމަލާގައި ބައިވެރިވި ކަމަށް ޝައްކު ކުރެވޭ 73 މީހުންނާއި ސީއައިޑީ އާއި ޓެރަރިސްޓް އިންވެސްޓިގޭޝަން ޑިޕާރޓްމަންޓް ދަނީ ސުވާލުކުރަމުން،" ގުނަސޭކަރު ވިދާޅުވެފައި ވެއެވެ.

ޓެރަރިސްޓް ހަމަލާގައި ބައިވެރިވި ކަމަށް ޝައްކު ކުރެވޭ 73 މީހުންގެ ތެރެއިން 54 މީހުން މި ވަގުތު ތިބީ ލަންކާގެ ސީއައިޑީގެ ބެލުމުގެ ދަށުގައި ކަމަށާއި، އޭގެ ތެރޭގައި ހަތް އަންހެނުން ހިމެނޭ ކަމަށް ގުނަސޭކަރު ވަނީ ވިދާޅުވެފައެވެ. ގުނަސޭކަރު ވިދާޅުވީ ބާކީ ތިބި 19 މީހުން ޓެރަރިސްޓް އިންވެސްޓިގޭޝަން ޑިޕާޓްމަންޓް (ޓީއައިޑީ) ގެ ބެލުމުގައި ދަށުގައި ތިބި އިރު އޭގެ ތެރޭގައި ދެ އަންހެނުން ހިމެނޭ ކަމަށެވެ.

އީސްޓަރ ސަންޑޭގައި ލަންކާގައި ދިން ހަމަލާގައި 260 އަށް ވުރެ ގިނަ މީހުން މަރުވެފައިވާ އިރު، އޭގެ ތެރޭގައި 40 އަށް ވުރެ ގިނަ ކުޑަކުދިންނާއި ބޭރުގެ ގައުމުތަކަށް ނިސްބަތްވާ 36 މީހަކު ހިމެނެއެވެ. މި ހަމަލާތަކާއި ގުޅިގެން ލަންކާ ފުލުހުން ކުރިޔަށް ގެންދާ އޮޕަރޭޝަންގައި 100 އަށް ވުރެ ގިނަ މީހަކު ވަނީ ހައްޔަރުކޮށްފައެވެ.