ސްރީލަންކާގައި ވަގުތީ ސަރުކާރެއް އެކުލަވާލުމުގެ ބޭނުމެއް ނެތް ކަމަށް އެގައުމުގެ ބޮޑުވަޒީރު މަހިންދަ ރާޖަޕަކްސަ ވިދާޅުވެއްޖެއެވެ.

ސްރީލަންކާގެ އިގުތިސާދީ ހާލާތު ގޯސްވެ ކުރިމަތިވެފައިވާ ގޮންޖެހުންތަކާއެކު ސަރުކާރުގެ އިސްތިއުފާއަށް ގޮވާލާ އެތައް މިލިއަން ބަޔަކު އެގައުމުގައި ދަނީ މުޒާހަރާކުރަމުންނެވެ. މި މުޒާހަރާތަކުގެ ބައިވެރިން ރާޖަޕަކްސަ ސަރުކާރުގެ އިސްތިއުފާއަށް ގޮވާލަމުންދާއިރު، ވަގުތީ ސަރުކާރެއް އެކުލަވާލުމަށްވެސް ވަނީ ގޮވާލާފައެވެ.

ވަގުތީސަރުކާރެއް އެކުލަވާލުމާ ގުޅޭގޮތުން ވާހަކަދައްކަވަމުން، ބޮޑުވަޒީރު މަހިންމަ ރާޖަޕަކްސަ ވަނީ އެކަމަށް އެމަނިކުފާނު ތާއިދު ނުކުރައްވާކަން ހާމަކުރައްވާފައެވެ. އެގޮތުން ތަފާތު ސިޔާސަތުތައް ގެންގުޅުއްވާ ބޭފުޅުން އެއްވެ ސަރުކާރެއް އެކުލަވާލުމުގެ ބޭނުމެއް ނެތް ކަމަށް އެމަނިކުފާނު ވަނީ ވިދާޅުވެފައެވެ. އަދި ވަގުތީ ސަރުކާރެއް އެކުލަވާލަން ޖެހިއްޖެ ހާލަތެއްގައި އެކަން ކުރައްވާނީ އެމަނިކުފާނުގެ ލީޑަރޝިޕްގެ ދަށުން ކަމަށް ބޮޑުވަޒީރު މަހިންދަ ވަނީ ވިދާޅުވެފައެވެ.

އޭޕްރިލް މަހުގެ ކުރީކޮޅުން ފެށިގެން ސްރީލަންކާގެ ސަރުކާރާ ދެކޮޅަށް އަޑުއުފުލާ މުޒާހަރާ ކުރާ މީހުންގެ އަދަދު އިތުރުވެފައިވާއިރު، ގައުމަށް މިހާރު ދިމާވެފައިވާ ހާލަތުން އަރައިގަނެވެންދެން ކެއްތެރިވާން ޖެހޭކަމަށްވެސް ބޮޑުވަޒީރު މަހިންދަ ވަނީ ވިދާޅުވެފައެވެ.

މީގެ އިތުރުން އެމަނިކުފާނުގެ އިސްތިއުފާއަށް ބަޔަކު ގޮވާލާކަމެއް އެނގިވަޑައިނުގަންނަވާ ކަމަށާއި، އެމަނިކުފާނުގެ އިސްތިއުފާއަށް ބަޔަކު ގޮވާލާނަމަ އެއީ ވަރަށް މަދު ބައެއްކަމަށްވެސް ބޮޑުވަޒީރު މަހިންދަ ވަނީ ވިދާޅުވެފައެވެ.

ސްރީލަންކާގެ މަޖިލީހުގައި ހިމެނޭ ސަރުކާރު ކޯލިޝަންގައި ހިމެނިވަޑައިގެންނެވި 40 މެމްބަރުން ވަނީ ކޯލިޝަނުން ވަކިވެވަޑައިގެންފައެވެ. އަދި މި މެމްބަރުން ދަނީ މަޖިލީހުގައި ހިމެނޭ ހުރިހާ ޕާޓީއެއް އެކުލެވޭ ގުޅިފައިވާ ވަގުތީ ސަރުކާރެއް އެކުލަވާލުމަށް ގޮވާލަމުންނެވެ.