ކޮންގްރެސްގެ ކުރިން ގޮފި އުފެއްދުމުގެ ފުރުސަތު އެމްޑީޕީން ހުޅުވާލައިފި
11 ޖޫން 2017 | އާދީއްތަ 04:59އަންނަމަހުގެ 16 ގެ ކުރިން ގޮފިތައް ހަދަން ޖެހޭ
އެމްޑީޕީ ޤައުމީ މަޖިލީހުގެ ތެރެއިން
މިއަހަރު އެމްޑީޕީން ބޭއްވުމަށް ހަމަޖެހިފައިވާ ކޮންގްރެސްގެ ކުރިން ގޮފިތައް ފުރިހަމަ ކުރުމާއި އާ ގޮފި ހެދުމުގެ ފުރުސަތު އެޕާޓީން ހުޅުވާލައިފިއެވެ.
އެމްޑީޕީން ބުނީ 2017 ވަނަ އަހަރުގެ ސެޕްޓެމްބަރުމަހު 15 އިން 17 އަށް ބޭއްވުމަށް ހަމަޖެހިފައިވާ އެޕާޓީގެ 4 ވަނަ ކޮންގްރެސްގައި ބައިވެރިވުމުގެ ފުރުޞަތު ލިބިގެންވާ ޕާޓީގެ ގޮފިތަކުގެ ރައީސުން ކަނޑައެޅުމަށްޓަކައި މިހާރު ރަޖިސްޓްރީކުރެވިފައިވާ ގޮފިތައް ފުރިހަމަކުރުމަށާއި އަލަށް ގޮފި ހެދުމަށް އެދޭ ފަރާތްތަކަށް އެ ފުރުޞަތު އަންނަ މަހުގެ 16 އާ ހަމައަށް ހުޅުވާލެވިފައިވާކަމަށެވެ. އެމުއްދަތުގައި އަލަށް އުފައްދާ ގޮފިތަކާއި މިހާރުވެސް ރަޖިސްޓްރީކުރެވިފައިވާ ގޮފިތަކުގެ މެމްބަރޝިޕް ފުރިހަމަކުރުމަށްފަހު ހުށަހެޅޭ ގޮފިތައް ޕާޓީގެ އިދާރާއިން ޗެކްކުރުމަށްފަހު އުފައްދާ އަދި ފުރިހަމަކުރާ ގޮފިތައް އެފަރާތްތަކަށް އަންގަމުންދާނެ ކަމަށާއި އެއަށްފަހު ގޮފީގެ ހިންގާ ކޮމިޓީ އިންތިޚާބުކުރުމަށް އެގޮތްޕަކަށް އަންގާނެ ކަމަށްވެސް އެމްޑީޕީން ވަނީ ބުނެފައެވެ.
އެމްޑީޕީން ބުނީ އެކޮންގރެސްގައި ބައިވެރިވެވޭނީ އަންނަމަހުގެ 16ގެ ކުރިން އުފައްދައި އަދި 31 ޖުލައި 2017 ގެ ކުރިން ހިންގާ ކޮމިޓީ އިންތިޚާބުކުރާ ގޮފިތަކުގެ ރައީސުންނަށް ކަމަށެވެ.
