"ރާއްޖެޓީވީ ހުންނާކަށް ރައީސް ޔާމީން ބޭނުންފުޅެއް ނުވޭ"
ރާއްޖެޓީވީ އެކި ފަހަރުމަތިން މިލިއަނުން ޖޫރިމަނާ ކޮށްފައިވޭ
ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި މުއާޒް ބައިވެރިވެވަޑައިގަންނަވަނީ
ރާއްޖެޓީވީ ހުންނާކަށް ކުރީގެ ރައީސް އަބްދުﷲ ޔާމީނު ބޭނުންފުޅެއް ނުވާކަމަށް އެމަނިކުފާނުގެ ތަރުޖަމާނު އިބްރާހިމް މުއާޒް ވިދާޅުވެއްޖެއެވެ.
ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން މުއާޒް ވިދާޅުވީ، ރާއްޖެޓީވީ އޮތުމަށް ރައީސް ޔާމީނު ބޭނުންފުޅު ނުވާ ކަމަށެވެ.
މުއާޒް ވިދާޅުވީ، ރާއްޖެޓީވީއާ ވާދަކުރާނެ ބަޔަކު އުފެއްދުމަށް ރައީސް ޔާމީނު ވަރަށް މަސައްކަތް ކުރެއްވި ކަމަށެވެ.
އޭރު ބްރޮޑްކާސްޓިންގ ކޮމިޝަން މެދުވެރިކޮށް އެތައް ފަހަރެއްގެ މަތިން ރާއްޖެޓީވީ ޖޫރިމަނާ ކޮށްފައިވާއިރު، ރައީސް ޔާމީނު ބްރޮޑްކާސްޓިންގ ކޮމިޝަން ކޮންޓްރޯލް ކުރައްވަމުން ގެންދެވިކަމަށްވެސް އޭނާ ވިދާޅުވިއެވެ.
އޭރުވެސް ކޮމިޝަނުން އެކި ކަންކަމުގައި ރައީސް އޮފީހަށް ގުޅާކަން މުއާޒް ފާހަގަ ކުރެއްވިއެވެ. ރައީސް ޔާމީނަކީ މިނިވަން މުއައްސަސާތަކަށް އަތް ނުފޯރުއްވާ ބޭފުޅެކޭ ވިދާޅުވެވެން ނެތްކަމަށް އެމަނިކުފާނުގެ ތަރުޖަމާނު މި ޕްރޮގްރާމްގައި ވިދާޅުވިއެވެ.
ރާއްޖެޓީވީގެ އުމުރުން 11 އަހަރު ނިމިދިޔަ ޑިސެމްބަރު މަހުގެ 15 ވަނަ ދުވަހު ވެފައިވާއިރު ރާއްޖެޓީވީއަކީ އެތައް ގޮންޖެހުންތަކެއް ކުރިމަތިވެފައިވާ ޓީވީ ސްޓޭޝަނެކެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި ރާއްޖެޓީވީއަށް އެކި ކަހަލަ ގޮންޖެހުންތައް ކުރިމަތިވެފައިވެއެވެ.
2013 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހުގެ ރޭ މެންދަމު ރާއްޖެޓީވީ އޭރު ހިންގަމުންދިޔަ ބީކޭޓީ ބިލްޑިންގ ގައި ރޯކޮށްލާފައިވާއިރު، މިޖަރީމާއާ ގުޅިގެން 11.65 މިލިއަން ރުފިޔާގެ ގެއްލުން ރާއްޖެޓީވީއަށް ލިބުނެވެ. އެހެންނަމަވެސް، އޭރު ދައުލަތުގެ އިދާރާތަކުން އިންސާފު ހޯދުމަށް ކުރި އެއްވެސް މަސައްކަތެއް ކާމިޔާބުވެފައެއް ނުވެއެވެ.
އޭގެ އިތުރުން، ރާއްޖެޓީވީ އެކި ފަހަރުމަތިން މިލިއަނުން ޖޫރިމަނާކޮށްފައިވާއިރު، ރާއްޖެޓީވީގެ ނޫސްވެރިން ބަންދުކޮށް ކޯޓުތަކުގައި ނޫސްވެރިންގެ މައްޗަށް ދައުވާވެސް އުފުލާފައިވެއެވެ.
