ނޭމާ ގެނައުމުގެ ވާހަކެއް ނުދައްކަން: ޒަވީ

ބާސެލޯނާއަށް ކުރިން ކުޅުނު ބްރެޒިލްގެ ފޯވާޑް ނޭމާ ޖޫނިއާ އަލުން އެ ކުލަބަށް ގެނައުމުގެ އެއްވެސް ވާހަކަތަކެއް ނުދައްކާ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.

ނޭމާއާ ގުޅޭ ގޮތުން ވާހަކަ ދައްކަމުން ޒަވީ ބުނީ ނޭމޭއަކީ ކޮންޓްރެކްޓެއްގައި ހުރި ކުޅުންތެރިއެއް ކަމަށެވެ. އެހެންކަމުން އެއީ ޖަވާބު ދޭން ވަރަށް އުނދަގޫ ސުވާލެއް ކަމަށް ޒަވީ ބުންޏެވެ. މީގެ އިތުރުން ޒަވީ ބުނީ އެ ކުޅުންތެރިންނަކީ އެމީހުންގެ ބައެއް ނޫން ކަމަށެވެ. ޒަވީ ބުނީ ލެވެންޑޯސްކީއާ ބެހޭ ގޮތުން ސުވާލުކުރުމުން ވެސް ޖަވާބު ދޭން އުނދަގޫވާ ކަމަށެވެ.

ޒަވީ ބުނީ ކުރެވޭނެ ކަންކަމާއި ނުކުރެވޭނެ ކަންކަމަށް ބަލަން ޖެހޭނެ ކަމަށެވެ. އަދި ނޭމާއާ މެދު އޭނާގެ އެއްވެސް ހިތް ނުތަނަވަސް ކަމެއް ނެތް ކަމަށް ޒަވީ ބުންޏެވެ. އަދި ތެދަށް ވާހަކަ ދައްކާނަމަ ނޭމާ އަލުން އަނބުރާ ބާސާއަށް ގެނައުމުގެ އެއްވެސް ވާހަކައެއް ނުދައްކާ ކަަމަށް ޒަވީ ވަނީ ބުނެފައެވެ.

ސަންޓޮސްގައި ހުރުމަށްފަހު ނޭމާ ބާސާއަށް ބަދަލުވީ 2013 ވަނަ އަހަރުއެވެ. އޭނާ ވަނީ ބާސާއަށް 186 މެޗު ކުޅެދީ 105 ލަނޑު ޖަހާފައެވެ. އޭގެ ފަހުން 2017 ވަނަ އަހަރު އޭނާ ޕީއެސްޖީއަށް ބަދަލުވީ ދުނިޔޭގެ ރެކޯޑު އަދަދަކަށެވެ. އޭނާ ވަނީ މިހާތަނަށް ޕީއެސްޖީއަށް 144 މެޗު ކުޅެދީ 100 ލަނޑު ޖަހާފައެވެ. އަދި އޭނާ ވަނީ 60 ލަނޑު ޖެހުމަށް އެހީތެރިވެދީފައެވެ. ނޭމާ ވަނީ ޕީއެސްޖީއާއެކު މިހާތަނަށް 11 ތައްޓެއް ހޯދާފައެވެ.