އާރަށު ހިޔާނަތް: ދައުލަތާއި ދިފާއަށް އެރި އޮޅުމެއްގެ ސަބަބުން މުހިއްމު ފުރުސަތެއް ގެއްލިއްޖެ
25 މެއި 2022 | ބުދަ 06:26އެންމެ ފަހުން އަޑުއެހުމެއް ބާއްވާފައިވަނީ 11 އޭޕްރީލް 2022 ގައި
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ކުރިއަށްދޭ
ފެލިދެއަތޮޅު އާރަށް ތަރައްޤީކުރުމަށް ހިންގި މުއާމަލާތުގެ ތެރެއިން, މަޤާމުގެ ނުފޫޒު ބޭނުންކޮށްގެން ރިޝްވަތު ނެގި މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުންތައް ކުރިއަށް ގެންދަނީ ކުރީގެ ރައީސް އަބްދުﷲ ޔާމީނާއި، މި މައްސަލައިގައި ރިޝްވަތު ދިނުމުގެ ކުށުގެ ދައުވާ އުފުލާފައިވާ ޔޫސުފް ނައީމްގެ މައްސަލަވެސް އެކުއެކީގައެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 11 އޭޕްރީލް 2022 ގައެވެ. އެ ދުވަހުގެ އަޑުއެހުމުގައި މައްސަލަ ބައްލަވާ ގާޒީ އަހުމަދު ޝަކީލު ވަނީ މި މައްސަލައިގެ ދައުވާތައް މަދަނީ މިންގަނޑުން ކުރިއަށް ގެންދެވޭނެކަމަށް ކަނޑައަޅުއްވައި، ޝަރީއަތުގެ ކުރީގެ ހުށައެޅުންތަކަށް ފުރުސަތު ދެއްވާފައެވެ.
އެ ދުވަހު ގާޒީ ވަނީ 15 ދުވަހުގެ މުއްދަތެއް ދައުލަތާއި ދިފާއަށްވެސް ދެއްވާފައެވެ. އަދި 15 ދުވަސް ގުނާނީ މާނަ ކުރުމުގެ ހަމަތައް ބަޔާންކުރާ ޤާނޫނުގެ ދަށުންކަމަށް ގާޒީ އެ ދުވަހު ވިދާޅުވިއެވެ.
ބުދަ ދުވަހުގެ އަޑުއެހުން ފައްޓަވަމުން މައްސަލަ ބައްލަވާ ގާޒީ ވަނީ ހުށައެޅުންތައް ހުށައެޅުއްވީ ޤާނޫނުގައި ބަޔާންކުރާ މުއްދަތުގެ ތެރޭގައިތޯ ސުވާލެއް އަމާޒު ކުރައްވާފައެވެ. އެ ސުވާލުގެ ޖަވާބުގައި ދައުލަތުން ބުނީ، ދައުލަތުގެ ހުށައެޅުންތައް ހުށައަޅާފައިވާނީ މާނަ ކުރުމުގެ ހަމަތައް ބަޔާންކުރާ ޤާނޫނުގެ 35 ވަނަ މާއްދާގެ (ހ) އަދި (ށ) ގައި ބަޔާން ކުރާ މުއްދަތަށް ކަމަށެވެ.
އެ މާއްދާގެ (ހ) އަދި (ށ) ގައި ބަޔާންކުރަނީ ފުރުސަތު ދެއްވި ދުވަހާއި، މުއްދަތު ހަމަވާ ދުވަސް ނުގުނާނެ ކަމަށެވެ. އަދި ވަކި ކަމެއް ކުރަން އޮތް އެންމެ ފަހު ތާރީޚަކީ ރަސްމީ ބަންދު ދުވަހަކަށްވާނަމަ، އެ ކަމެއް ބަންދު ދުވަހާއި ވިދިގެން އަންނަ ރަސްމީ ބަންދު ނޫން ދުވަހު ކުރެވިދާނެ ކަމަށެވެ.
އެހެންނަމަވެސް އެ މާއްދާގެ (ނ) ގައި ބަޔާންކޮށްފައިވަނީ 7 ދުވަހަށް ވުރެ ދިގު ނޫން މުއްދަތެއްގެ ތެރޭގައި ކުރަންޖެހޭ ކަންކަން ކޮށްފިކަން ކަށަވަރު ކުރުމުގައި އެ 7 ދުވަހުގެ ތެރޭގައި ހިމެނޭ ރަސްމީ ބަންދު ދުވަސްތައް ނުހިމެނެނޭ ކަމަށެވެ. ޝަރީއަތުގެ ކުރީގެ ހުށައެޅުންތަކަށް ދެއްވާފައިވަނީ 15 ދުވަހުގެ މުއްދަތެކެވެ. ވީއިރު، މިއީ 7 ދުވަހުގެ މުއްދަތެއްގެ ތެރޭގައި ނިންމަންޖެހޭ ބާވަތުގެ ކަމެއް ނޫނެވެ.
ނަމަވެސް ދައުލަތާއި ދައުވާލިބޭ ފަރާތްތަކުން މުއްދަތު ގުނާފައިވަނީ އެ ދެމެދަށް އައި ފިތުރު އީދުގެ ޗުއްޓީގެ މުއްދަތަށްވެސް ބަލާފައެވެ.
އެ ނުކުތާ ދައުލަތުންވެސް ފަހުން ވަނީ ޤަބޫލުކޮށްފައެވެ. އެގޮތުން ދައުލަތުން މުއްދަތު ގުނާފައިވަނީ ރަނގަޅަށް ނޫންކަމަށް ދައުލަތުގެ ވަކީލުވެސް ޤަބޫލު ކުރެއްވިއެވެ. ދައުލަތުން ވަނީ އެ ކަން ދައުލަތަށްވެސް "ކައްސާލީކަމަށް" ވިދާޅުވެފައެވެ.
ރައީސް ޔާމީނުގެ ފަރާތުންވެސް، ޔޫސުފް ނައީމްގެ ފަރާތުންވެސް ހުށައެޅުންތައް ހުށައަޅުއްވާފައިވަނީ ހަމަ އެގޮތަށް މުއްދަތު ގުނައިގެންނެވެ.
ވުމާއެކު، މައްސަލަ ބައްލަވާ ގާޒީ ވަނީ ޝަރީއަތުގެ ކުރީގެ ހުށައެޅުންތަކަށް ދެވިފައިވާ މުއްދަތުގެ ތެރޭގައި ހުށައެޅުމެއް ހުށައަޅުއްވާފައިނުވާތީ، އެ ހުށައެޅުންތައް ބަަލައިނުގެންނެވުމަށް ނިންމަވާފައެވެ.
ގާޒީ ޝަކީލު ވިދާޅުވާ ގޮތުގައި ޖިނާއީ އިޖުރާއަތުގެ ޤާނޫނުގެ 117 ވަނަ މާއްދާގެ ދަށުން ދައުވާލިބޭ ފަރާތްތަކާ ސުވާލުކޮށް، ދެވެން އޮތް އެންމެ ދިގު މުއްދަތުކަމަށްވާ 15 ދުވަސް ޝަރީއަތުން ވަނީ ދީފައެވެ. އެ މުއްދަތުގެ ތެރޭގައި ހުށައެޅުން ހުށަނާޅައިފިނަމަ އިތުރު ފުރުސަތެއް ނުދެވޭނެކަމަށް އެ މާއްދާގެ (ނ) ގައި ސާފުކޮށް ބަޔާންކޮށްފައިވާއިރު، އެހާ ސާފުކޮށް އޮތްކަމެއް އޮޅިގެން ނުވާނެކަމަށް ގާޒީ ވިދާޅުވިއެވެ.
ވުމާއެކު، ދެން މި މައްސަލައިގައި އޮންނާނީ ޝަރީއަތް ފެށުމެވެ. އެގޮތުން 2 ޖޫންގައި މި މައްސަލައިގެ ޝަރީއަތް ފަށައި، އިފްތިތާޙީ ބަޔާން އިއްވެވުމަށް ގާޒީ ވަނީ ތާވަލު ކުރައްވާފައެވެ. ގާޒީ ވިދާޅުވީ ޝަރީއަތް ފައްޓަވާނީ މައްސަލަ ލައިވްކޮށްގެން ކަމަށެވެ.
