ކާޑު ހިފައިގެން ދަނިކޮށް ފަރަށް އެރިި ކޮޅުވެއްޓި ފުންކޮށްފި

އުތުރުގެ އަތޮޅުތަކަށް ކާޑު ހިފައިގެން ދަނިކޮށް ފަރަށް އެރި އެސްޓީއޯގެ ކޮޅުވެއްޓި ފުންކޮށްފި އެވެ.

އެމްއެންޑީއެފްގެ މީޑިއާ އޮފިޝަލް އިބްރާހިމް އާޒިމް ވިދާޅުވި ކޮޅުވެއްޓި ފަރަށް އެރި ކަމުގެ މައުލޫމާތު ލިބިފައި ވަނީ މިއަދު ހެނދުނު 9:00ގައި ކަމަށާއި މިއަދު މެންދުރެއްހާއިރު ކޮޅުވެއްޓި ފުންކޮށްފައިވާ ކަމަށެވެ.

އެ ކޮޅުވެއްޓި ދިޔައީ ބ. އޭދަފުއްޓަށް ކާޑު ހިފައިގެންނެވެ. ހުވަފެންފުށީ ރިސޯޓް ކައިރީގައި އޮންނަ ފަރަކަށް ކޮޅުވެއްޓި އެރީ ރޭ މެންދަމު 2:00 ހާއިރުއެވެ.

މި ކޮޅު ވެއްޓިއަކީ އެސްޓީއޯގެ "ކަނޑިހާ" ނަމަކަށް ކިޔާ ކޮޅުވެއްޓިއެކެވެ.

މި ކޮޅުވެއްޓީގައި އޭދަފުށި، ކުޅުދުއްފުށި އަދި ހޯރަފުއްޓަށް ގެންދާ 2000 ބަސްތާ ކާޑު ހުރިކަމަށް މައުލޫމާތު ލިބެއެވެ.

މިކަމާ ގުޅިގެން އަދި އެސްޓީއޯގެ ބަހެއް ލިބިފައެއް ނުވެއެވެ.

މިހދިސާގައި އެއްވެސް މީހަކަށް ގެއްލުމެއް ލިބިފައިނުވާ ކަމަށާއި އަދި މުދަލަށް ވެސް ގެއްލުމެއް ލިބިފައިނުވާ ކަމަށް އެމްއެންޑީއެފުން ބުންޏެވެ. ކޮޅުވެއްޓީގައި ތިބީ ހުސް ދިވެހިންނެވެ.