ޗެކް ރިޕަބްލިކުންވެސް މަންކީޕޮކްސް ފެނިއްޖެ
24 މެއި 2022 | އަންގާރަ 16:42ހުޅަނގުގެ ގިނަ ގައުމުތަކަކުން މިހާރު ދަނީ މަންކީޕޮކްސްގެ ކޭސްތައް ފެންނަމުން
މަންކީޕޮކްސް
ޗެކް ރިޕަބްލިކުން މަންކީޕޮކްސްގެ ކޭހެއް ފެނިފައިވާކަމަށް އެގައުމުން ރިޕޯޓުކޮށްފިއެވެ.
ޗެކް ރިޕަބްލިކްގެ އޮފިޝަލުންނާ ހަވާލާދީ ރޮއިޓަރސް އިން ރިޕޯޓުކޮށްފައިވާގޮތުން, އެގައުމުގެ މަންކީ ޕޮކްސްގެ ފުރަތަމަ ކޭސް ފެނިފައިވަނީ އަންގާރަ ދުވަހުއެވެ. އެއީ ބެލްޖިއަމްގެ ފެސްޓިވަލަކަށް ދިއުމަށްފަހު އެގައުމަށް އައި އަންހެނެއްގެ ގައިން ކަމަށް ރިޕޯޓުތައް ބުނެއެވެ.
ޗެކް ރިޕަބްލިކްގެ އިންފެކްޝަސް މެޑިސިން ސޮސައިޓީގެ ހެޑާ ހަވާލާދީ ރިޕޯޓުކޮށްފައިވާ ގޮތުން، ޕްރޭގުގެ ސެންޓްރަލް މިލިޓަރީ ހޮސްޕިޓަލްގައި އޭނާއަށް ދަނީ ފަރުވާދެމުންނެވެ.
އެގައުމުގެ ނެޝަނަލް އިންސްޓިޓިއުޓް އޮފް ޕަބްލިކް ހެލްތުން ހިއްސާކޮށްފައިވާގޮތުން، ބައްޔަށް ޓެސްޓުކުރި ތިން މީހުންގެ ތެރެއިން އެކަކުގެ ސާމްޕަލް ވަނީ ޕޮޒިޓިވްވެފައެވެ. އަނެއް ދެ ސާމްޕަލް ޓެސްޓުކުރުމުގެ މަސައްކަތްކުރަމުންދާއިރު މި ސާމްޕަލްތަކުގެ ފައިނަލް ނަތީޖާ ލިބޭނީ އަންނަ ހަފުތާގައިކަމަށް ވަނީ ބުނެފައެވެ.
ހުޅަނގުގެ ގިނަ ގައުމުތަކަކުން މިހާރު ދަނީ މަންކީޕޮކްސްގެ ކޭސްތައް ފެންނަމުންނެވެ.
