ހިޔާ ފްލެޓްތަކުގައި، އިރުއޮއްސި 6އާ ހެނދުނު 8އާ ދެމެދު، އަޑުގަދަވާކަހަލަ މަސައްކަތެއް ނުކުރެވޭނެ
ކުރިން އޮންނަނީ ރޭގަނޑު 10ގެ ފަހުން، އަޑުގަދަވާ ޒާތުގެ މަސައްކަތްނުކުރެވޭ ގޮތަށް
ހިޔާ ފްލެޓް
ހިޔާ ފްލެޓްތަކުގައި އިރުއޮއްސި 6ން ފެށިގެން ހެނދުނު 8 ޖެހުމާ ހަމައަށް, އަޑުގަދަވާ ކަހަލަ އެއްވެސް މަސައްކަތެއްކުރުމަކީ މަނާކަމެއް ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.
އެކަމާގުޅިގެން އެޗްޑީސީން ބުނީ، ހިޔާ ފްލެޓްތަކުގައި ގިނަ އަދަދެއްގެ ބަޔަކު ދިރިއުޅެމުންދާތީ ފްލެޓްގެ އެތެރޭގެ މަސައްކަތްކުރުމުގެ ގަޑިތަކަށް ބަދަލުގެނައުމަށް ނިންމާފައިވާކަމަށެވެ. ކުރިން އޮންނަނީ ރޭގަނޑު 10ގެ ފަހުން، އަޑުގަދަވާ ޒާތުގެ މަސައްކަތްނުކުރެވޭ ގޮތަށެވެ.
ފްލެޓްތަކުގައި މަސައްކަތްކުރާއިރު އަވައްޓެރި ފްލެޓްތަކަށް ދަތިނުވާނެހެން މަސައްކަތްކުރުމަށް އެޗްޑީސީން ވަނީ އިލްތިމާސްކޮށްފައެވެ.
މިހާރު އެޗްޑީސީން ހަދަމުން އަންނަ ސަރވޭއިން ދައްކާގޮތުން, 4500ށްވުރެ ގިނަ އާއިލާ މިހާރު ހިޔާ ފްލެޓަށް ދިރިއުޅުން ބަދަލުކޮށްފައިވާކަމަށް އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވަނީ މީގެކުރިން ވިދާޅުވެފައެވެ. އެގޮތުން މިހާރު 20،000ށްވުރެ ގިނަ މީހުން އެތަނުގައި ދިރިއުޅޭނެކަމަށް ސުހައިލް ވިދާޅުވިއެވެ.
ހިޔާ ފްލެޓްތައް ހަވާލުކޮށްފައިވަނީ ފިނިޝިންގ މަސައްކަތް ނުނިންމައެވެ. އެހެންކަމުން ފްލެޓްތަކަށް މީހުން ބަދަލުވަމުން އަންނަނީ އެމަސައްކަތް ކުރުމަށްފަހުއެވެ. ހިޔާ ފްލެޓްތަކުގައި ދިރިއުޅޭ ރައްޔިތުން ކުލި ދެއްކުމުގައި ކުރާ އެންމެ ބޮޑު ޝަކުވާއަކީވެސް ތަނުގެ ފިނިޝިންގ މަސައްކަތް އަމިއްލަ ޚަރަދުގައި ކުރަންޖެހިފައި އޮތްއޮތުމެވެ.
