ވިހި އަހަރަށްފަހު މައިކް ޑީން ކަށިގަނޑު ދޫކޮށްލައިފި

އިނގިރޭސި ޕްރިމިއަރ ލީގުގެ ރެފްރީކަން ކުރަމުން އައި މައިކް ޑީން 20 އަހަރަށްފަހު ރެފްރީކަން ހުއްޓާލައި، ކަށިގަނޑު ދޫކޮށްލައިފިއެވެ.

މައިކް ރެފްރީކަން ކުރުން ހުއްޓާލީ އުމުރުން 53 އަހަރުގައެވެ. ރެފްރީއެއްގެ ގޮތުގައި މަސައްކަތްކުރި 20 އަހަރުގެ ތެރޭގައި މައިކް ވަނީ 560 މެޗުގެ ރެފްރީކަން ކޮށްފައެވެ. އަދި އެ މެޗުތަކުގައި ޖުމުލަ 114 ރަތް ކާޑު ދައްކާފައިވެއެވެ.

މައިކް ރެފްރީކަމުގެ ކެރިއަރު ފަށާފައިވަނީ 1985 ވަނަ އަހަރުއެވެ. އޭނާ ވަނީ ނޮދަން ޕްރިމިއަރ ލީގުގެ ރެފްރީކަން ކޮށްފައެވެ. އޭގެ ފަހުން 1995 ވަނަ އަހަރު މައިކް ވަނީ އިނގިރޭސި ފުޓުބޯޅަ ލީގުގެ އެސިސްޓެންޓް ރެފްރީކަން ކޮށްފައެވެ. އޭގެ ދެ އަހަރު ފަހުން 1997 ވަނަ އަހަރު އޭނާ ވަނީ ފުލް ރެފްރީންގެ ލިސްޓަށް ޕްރޮމޯޓުވެފައެވެ.

ޕްރިމިއަރ ލީގުގެ ރެފްރީއެއްގެ ގޮތުގައި 2000 ވަނަ އަހަރު މައިކް ވަނީ ސެލެކްޓް ގްރޫޕް އޮފް ރެފްރީސްއަށް ހަމަޖައްސާފައެވެ. ސެލެކްޓް ގްރޫޕް އޮފް ރެފްރީސްއަކީ ޕްރޮފެޝަނަލް ގޭމް މެޗް އޮފިޝަލްސް ލިމިޓެޑްގެ ފަރާތުން އެކުލަވާލާ، ރެފްރީންނާއި އެސިސްޓެންޓް ރެފްރީންގެ ޕެނަލްއެކެވެ. އޭގެ ފަހުން 2003 ވަނަ އަހަރު މައިކް ވަނީ ފީފާގެ އިންޓަރނޭޝަނަލް ރެފްރީންގެ ލިސްޓުގައި ހިމެނިފައެވެ.

އޭގެ ފަހުން 2004 ވަނަ އަހަރު އާސެނަލާއި މެންޗެސްޓަރ ޔުނައިޓެޑް ބައްދަލުކުރި އެފްއޭ ކޮމިއުނިޓީ ޝީލްޑް މެޗުގެ ރެފްރީއަކަށް ހުރީ ވެސް މައިކެވެ. 2006 ވަނަ އަހަރު އޮތް އެފްއޭ ކަޕްގެ ފައިނަލް މެޗުގެ ރެފްރީއަކަށް މައިކް ހަމަޖެއްސިއެވެ. ނަމަވެސް، އިނގިރޭސި ވިލާތުގެ ފުޓުބޯޅަ އެސޯސިއޭޝަނުން ވަނީ މައިކްގެ ބަދަލުގައި އެހެން ރެފްރީއަކު އެ މެޗަށް ހަމަޖައްސާފައެވެ. އޭގެ ދެ އަހަރު ފަހުން 2008 ވަނަ އަހަރުގެ އެފްއޭ ކަޕްގެ ފައިނަލްގައި މައިކް ވަނީ ރެފްރީކަން ކޮށްފައެވެ.

މައިކް އެންމެ ފުރަތަމަ އިންޓަނޭޝަނަލް މެޗެއްގެ ރެފްރީކަން ކޮށްފައިވަނީ 2004 ވަނަ އަހަރުއެވެ. އެއީ އެ އަހަރު ނެދަލޭންޑްސްއާއި އަޔަލޭންޑް ބައްދަލުކުރި އެކުވެރިކަމުގެ މެޗެއްގައެވެ. މައިކް ވަނީ ޔޫރޮޕާ ލީގުގެ ރެފްރީކަންވެސް ކޮށްފައެވެ. އެގޮތުން 2010 ވަނަ އަހަރުގެ ސެޕްޓެމްބަރު މަހުގެ 30 ވަނަ ދުވަހު ޑޯޓްމަންޑާއި ސެވިއްޔާ ކުޅުނު ޔޫރޮޕާ ލީގުގެ ގްރޫޕް ސްޓޭޖް މެޗުގައި ރެފްރީކަން ކުރީ މައިކެވެ. މީގެ އިތުރުން މައިކް ވަނީ ޔޫރޯގެ ކޮލިފައިންގ މެޗުތަކުގައި ވެސް ރެފްރީކަން ކޮށްފައެވެ. ޔޫރޯގެ ކޮލިފައިންގގައި އޭނާ އެންމެ ފުރަތަމަ ރެފްރީކަން ކުރި މެޗަކީ 2008 ވަނަ އަހަރުގެ ޔޫރޯ ކޮލިފައިންގެ މެޗެކެވެ. އެއީ ގްރޫޕް އެފްގައި އައިސްލޭންޑާއި ލެޓްވިޔާ ބައްދަލުކުރި މެޗެވެ.

އުމުރުން 45 އަހަރުވުމާއެކު މައިކް ވަނީ ފީފާގެ އިންޓަނޭޝަނަލް ރެފްރީންގެ ލިސްޓުން 2013 ވަނަ އަހަރު ރިޓަޔަރކޮށްފައެވެ.