2009 ވަނަ އަހަރަށްފަހު ފުރަތަމަ ފަހަރަށް ޕާކިސްތާނަށް ދާން ސްރީލަންކާ ގައުމީ ކްރިކެޓް ޓީމު އެއްބަސްވެއްޖެއެވެ.
ޕާކިސްތާނުގައި ކުޅޭ ޓީ ޓުވެންޓީ އިންޓަނޭޝަނަލް ކްރިކެޓް މުބާރާތުގައި ސްރީލަންކާ އަދި ޕާކިސްތާން ވާދަކުރާ މެޗު އޮންނާނީ މި މަހު 29 ވާ އާދީއްތަ ދުވަހުއެވެ. މި މެޗު ކުޅުމަށް ހަމަޖެހިފައިވަނީ ލާހޯރް ގައްޒާފީ ސްޓޭޑިއަމްގައެވެ.
މުބާރާތްތަކަށް ޕާކިސްތާނަށް ދިއުން ޓީމުތަކުން ހުއްޓާލީ ބަޑީގެ ހަމަލާއެއްގައި ހަ ފުލުސް އޮފިސަރުން މަރާލައި، ސްރީލަންކާގެ ބައެއް ކްރިކެޓް ކުޅުންތެރިން އަދި ކޯޗުންން ޒަހަމްވި ހާދިސާއަށްފަހުއެވެ.
ސްރީލަންކާއިން ޕާކިސްތާނަށް ދިޔުމަށް އެއްބަސްވީ ދެގައުމުގެ ސަރުކާރުން ކުރިޔަށް ގެންދިޔަ މަޝްވަރާއަށްފަހު، ސަލާމަތީކަންކަން އިތުރަށް ވަރުގަދަކުރުމަށް އެއްބަސްވުމުންނެވެ.
މިދިޔަ މަހު ޕާކިސްތާނުން ވަނީ ޓުވެންޓީ ޓުވެންޓީގެ ތިން މެޗެއް ހޮސްޓްކޮށްފައެވެ. އެ ހުރިހާ މެޗެއްވެސް ކުޅެފައިވަނީ ވަރަށް ބޮޑަށް ސަލާމަތީކަންކަން ވަރުގަދަކުރުމަށްފަހުއެވެ.
