އެކި ބޭނުންތަކަށް އުފައްދާ ރޮބޮޓުތަކަށް އަބަދުވެސް ޚާއްސަ ސަމާލުކަމެއް ލިބޭއިރު، މިފަހަރު ރޮބޮޓު ފެންނަމުން މިދަނީ ބަދިގޭގެ މަސައްކަތުގައި އުޅޭތަނެވެ.

ޔުނިވަރސިޓީ އޮފް ކެމްބްރިޖްގެ އިންޖިނިޔަރުންގެ އުއްމީދަކީ ބަދިގޭގެ މަސައްކަތުގައި އަތްގާތްކޮށްލަ ދިނުމުގެ އިތުރުން، ރޮބޮޓަކީ ކާއެއްޗެހީގެ ރަހަބެލުމުގެ ޤާބިލުކަންވެސް ލިބިފައިވާ އެއްޗަކަށް ހެދުމަށެވެ. މިސާލަކަށް ރަހަ ހެޔޮވަރުކޮށްލައި، ކާތަކެތި މީރުކޮށްލުމަށް ލޮނުހެޔޮވަރު ކޮށްލަންވީ މިންވަރު ރޮބޮޓުގެ ޒަރިއްޔާއިން ދެނެގަނެވުމަކީ އެ އިންޖިނިޔަރުންގެ މަޤްސަދެވެ.

އެކަން ޓެސްޓު ކުރުމަށްޓަކައި ކެމްބްރިޖްގެ ލެބޯޓަރީއެއްގައި ވަނީ ޚާއްސަ އެކްސްޕެރިމެންޓުތަކެއް ކުރިއަށް ގެންގޮސްފައެވެ. އެގޮތުން "ސްކްރޭމްބަލްޑް އެގްސް" އާއި ޓޮމާޓޯ އެއްކޮށްގެން ހަދާފައިވާ ޑިޝްއެއްގެ ލޮނު ހެޔޮވަރު ކޮށްލުމަށް ވަނީ ރޮބޮޓުގެ އުކުޅުތައް ބޭނުންކޮށްފައެވެ.

އެކަން ކުރާ ގޮތަށް ބަލާއިރު، ޑިޝްގެ އެކި ހިސާބުތަކުގައި ރޮބޮޓްގެ އަތުގެ ކުރީގައިވާ ސެންސަރ-ޕްރޯބަކުން ޖައްސަމުން ގެންދެއެވެ. އަދި ލޮނު ރަހަ ފަދަ އެކި ރަހަތަށް ހުރި މިންވަރު ކޮމްޕިއުޓަރުގެ ޑާޓާތަކަށް އެއްކޮށްދެއެވެ.

އިންޖިނިޔަރުން ބުނާ ގޮތުގައި އެމީހުން ބޭނުންވަނީ ރަހަބެލުމުގެ ނިޒާމު މަސައްކަތް ކުރާ ގޮތް މިހާރަށްވުރެ ބޮޑަށް ދެނެގަނެ، ރޮބޮޓުގެ އުކުޅުތައް އިތުރަށް ވަރުގަދަކުރާށެވެ.

ކުރިއަށް އޮތް ތަނުގައި އިތުރު އުކުޅުތައް ބޭނުންކޮށްގެން މި އެކްސްޕެެރިމެންޓް އިތުރަށް ފުޅާކުރުމަށް އިންޖިނިޔަރުން ދަނީ މަސައްކަތް ކުރަމުންނެވެ.