ބައިޑަންގެ ސީކްރެޓް ސަރވިސްގެ ދެ އެޖެންޓުން ދެކުނުކޮރެއާގައި މާރާމާރީ ހިންގުމުގެ ސަބަބުން އަނބުރާ ގައުމަށް ފޮނުވާލައިފި
21 މެއި 2022 | ހޮނިހިރު 03:00ސީކްރެޓް ސަރވިސްގެ އެޖެންޓުން މީގެކުރިންވެސް މިފަދަ އަމަލުތައް ބޭރު ގައުމުތަކުގައި ހިންގާފައިވޭ
އެމެރިކާގެ ރައީސް ޖޯ ބައިޑަން ދެކުނު ކޮރެއާއަށް ވަޑައިގަންނަވަނީ
އެމެރިކާގެ ރައީސް ޖޯ ބައިޑަން އޭޝިޔާގެ ބައެއް ގައުމުތަކަށް ކުރައްވާ ދަތުރުފުޅާ ދިމާކޮށް ދެކުނު ކޮރެއާގައި ހަރަކާތްތެރިވި ސީކްރެޓް ސަރވިސްގެ ދެ އެޖެންޓުން އަނބުރާ ގައުމަށް ފޮނުވާލައިފިއެވެ.
ބައިޑަން ދެކުނު ކޮރެއާއަށް ވަޑައިގަތުމުގެ އެއް ދުވަސްކުރިން ދެ އެޖެންޓުން އަނބުރާ އެމެރިކާއަށް ފޮނުވާލާފައިވަނީ، މަސްތުގެ ހާލަތުގައި ތިބެގެން މާރާމާރީ ހިންގުމާގުޅިގެންނެވެ.
ޔޮންގްސަން ޑިސްޓްރިކްޓްގެ ޕޮލިސް އޮފިޝަލަކު ރޮއިޓަރސްއާ ވާހަކަދައްކަވަމުން ވިދާޅުވީ، އެއް އެޖެންޓަކު ހައްޔަރުކުރީ ބުރާސްފަތި ދުވަހުގެ ހެނދުނުގެ ވަގުތެއްގައި ޓެކްސީއެއްގެ ކަންތަކުގައި މާރާމާރީ ހިންގައިގެން ކަމަށެވެ. އެމެރިކާގެ އޮފިޝަލް ވިދާޅުވީ މި އެޖެންޓުގެ ކަންތައް ދެކުނު ކޮރެއާގެ އޮފިޝަލުން ތަހުގީގުކުރާކަމަށެވެ. އަދި އަނެއް އެޖެންޓު ކުރި ކަންތައް ތަހުގީގު ނުކުރާކަމަށް އޮފިޝަލް ވިދާޅުވިއެވެ.
ސީކްރެޓް ސަރވިސްގެ ސްޕޯކްސްޕަރސަން އެންތަނީ ގުގްލިއާމީ ވިދާޅުވީ، އެސަރވިސްގެ ދެ މުވައްޒަފަކު އޮފް ޑިޔުޓީގައި ގާނޫނާ ޚިލާފުކަމެއް ކޮށްފައިވާކަމުގެ މައުލޫމާތު ލިބިފައިވާކަމަށެވެ. އަދި އެ ދެ މުވައްޒަފުންނަށް އަނބުރާ ގައުމަށް އައުމަށް އަންގާފައިވާކަމަށާއި، މިހާދިސާއާ ގުޅިގެން ބައިޑަންގެ ދަތުރުފުޅަށް އެއްވެސް ހުރަހެއް އެޅިފައިނުވާކަމަށެވެ.
މެއި 20ން 24ށް ދެކުނު ކޮރެއާއާއި ޖަޕާނަށް ކުރައްވާ ދަތުރުފުޅެއްގައި ބައިޑަން ވަނީ ހުކުރު ދުވަހު ދެކުނު ކޮރެއާއަށް ވަޑައިގަންނަވާފައެވެ. މާރާމާރީގެ މި ހާދިސާ ހިނގާފައިވަނީ ބައިޑަން މިދަތުރުފުޅުގައި ހުންނަވާ ހޮޓެލްގެ ބޭރުގައެވެ.
ދެކުނު ކޮރެއާގެ ފުލުހުން، މިހާދިސާގައި ހިމެނޭ އެޖެންޓުންގެ ނަމެއްވެސް އަދި މިހާދިސާގެ އިތުރު ތަފްސީލެއް ދީފައެއްނުވެއެވެ.
ސީކްރެޓް ސަރވިސްއަކީ އެމެރިކާގެ ރައީސްއާއި ވައިޓް ހައުސްގެ ސެކިޔުރިޓީ ކަންކަން ބަލަހައްޓާ އެޖެންސީއެވެ. މީގެކުރިންވެސް ސީކްރެޓް ސަރވިސްގެ އެޖެންޓުން މިފަދަ އަމަލުތައް ބޭރު ގައުމުތަކުގައި ހިންގާފައިވެއެވެ.
