ބައިޑަންގެ ސަރުކާރުގައި މޫސުމަށް އަންނަ ބަދަލުތަކާ ދެކޮޅަށް މަސައްކަތް ކުރުމަށް ޖޯން ކެރީ

އެމެރިކާގެ ރައީސް ޖޯ ބައިޑަން ގެ ސަރުކާރުގައި މޫސުމަށް އަންނަ ބަދަލުތަކާ ދެކޮޅަށް މަސައްކަތް ކުރުމަށް ޖޯން ކެރީ ހަމަޖައްސައިފިއެވެ.

ކުރީގެ ރައީސް ޑޯނަލްޑް ޓްރަމްޕްގެ ސަރުކާރުގައި މޫސުމަށް އަންނަ ބަދަލު ތަކަށް މާބޮޑު ސަމާލު ކަމެއް ދީފަ ނުވި ނަމަވެސް މިހާރު އިންތިހާބުވެފައިވާ ރައީސް, ބައިޑަންގެ ސަރުކާރުގައި ދުނިޔެއަށް އަންނަ މޫސުމީ ބަދަލު ތަކަށް ހާއްސަ އިސްކަމެއް ދީގެން މަސައްކަތް ކުރާނެ ކަމަށް އެމެރިކާގެ ސަރުކާރުން ވަނީ ބުނެފައެވެ.

އެގޮތުން މޫސުމަށް އަންނަ ބަދަލުތަކާ ދެކޮޅަށް މަސައްކަތް ކުރުމުގެ ގޮތުން ހޯމަ ދުވަހު ވަނީ, ރައީސް އޮބާމާގެ ސަރުކާރުގައި ސެކެރެޓަރީ އޮފް ސްޓޭޓްގެ މަގާމު އަދާ ކުރައްވާފައިވާ ޖޯން ކެރީ ހަމަޖައްސައިފައެވެ.

ރިޕޯޓްތައް ބުނާ ގޮތުގައި ކެރީ އަކީ ކުރީގައި ވެސް މޫސުމަށް އަންނަ ބަދަލުތަކާއި ދެކޮޅަށް ވަރަށް ގިނަގުނަ މަސައްކަތް ކުރައްވާފައިވާ ބޭފުޅެކެއެވެ. އެގޮތުން މޫސުމަށް އަންނަ ބަދަލުތައް ކުޑަކުރުމަށް ދުނިޔޭގެ 200 ގައުމަކުން ޕެރިހުގައި ބޭއްވި ޕެރިސް ކޮލައިމެޓް އެގްރިމެންޓްގައި އެންމެ އިސް ރޯލެއް އަދާކޮށް މަސައްކަތް ކޮށްފައިވަނީ ޖޯން ކެރީއެވެ.

ޓްރަމްޕް ވެރިކަމުގައި ހުންނެވިއިރު ވަނީ މި އެގްރީމެންޓް އިން އެމެރިކާ ބޭރުކޮށްފައެވެ. ޓްރަމްޕް އޭރު ވިދާޅުވެފައިވަނީ ޕެރިސް އެއްބަސްވުމަކީ އެމެރިކާއަށް އެތައް ޓްރިލިއަން ޑޮލަރެއް ގެއްލިގެންދާ އަދި ވަޒީފާތައް ގެއްލި، ތެލާއި ގޭސް އަދި ބޯޓްދެލި އުފައްދާ އިންޑަސްޓްރީ މަޑުޖެހިގެންދާނެ ކަމެއް ކަމަށެވެ. ނަމަވެސް ބައިޑަން ރައީސް ކަމަށް ހޮވިވަޑައިގެންނެވި ފަހުން ވަނީ އަނެއްކާ ވެސް މި އެގްރީމެންޓް ގައި އެމެރިކާ ބައިވެރި ކުރުމަށް އެދިފައެވެ.

މަގާމަށް ހޮވިވަޑައިގަންނެވުމުން ކެރީ ކުރެއްވި ޓްވީޓެއްގައި ވިދާޅުވީ އެމެރިކާ ދެން ފެނިގެންދާނީ މޫސުމަށް އަންނަ ބަދަލުތަކަށް އަހަންމިއްޔަތު ދީގެން މަސައްކަތް ކުރާ ސަރުކާރެއް ގޮތުގައި ކަމަށެވެ. އެގޮތުން ޕެރިސް އެގްރީމެންޓްގެ މަސައްކަތް އަލުން ފަށާނެ ކަމަށާއި އެމެރިކާ އެނބުރި ރަނގަޅު މަގަށް ގެންނާނެ ކަމަށެވެ.