ރާޖީވް ގާންދީ އަވަހާރަކޮށްލި ހާދިސާގައި ކުށް ސާބިތުވި މީހަކު ސުޕްރީމް ކޯޓުން ދޫކޮށްލައިފި

އިންޑިޔާގެ ކުރީގެ ބޮޑުވަޒީރު ރާޖީވް ގާންދީ އަވަހާރަކޮށްލި ހާދިސާގައި ކުށް ސާބިތުވެފައިވާ މީހަކު އެގައުމުގެ ސުޕްރީމް ކޯޓުން ދޫކޮށްލައިފިއެވެ. އޭޖީ ޕެރާރިވަލަން ދޫކޮލާފައިވަނީ އާޓިކަލް 142ގެ ދަށުން ސުޕްރީމް ކޯޓަށް ލިބޭ ބާރުގެ ދަށުން ކަމަށް ޚަބަރުތައް ބުނެއެވެ. އިންޑިޔާގެ ސުޕްރީމް ކޯޓުން ބުނެފައިވަނީ، އޭނާ ދޫކޮށްލީ އޭނާގެ ބަލި ހާލަތަށާއި، ރަނގަޅު އަޚްލާގަށް ބެލުމަށްފަހު ކަމަށެވެ. މީގެއިތުރުން، ބަންދުގައިހުރެ އޭނާވަނީ ކިޔަވައި، މަތި ފާސްތަކެއް ހާސިލްކޮށްފައެވެ. އެހެންކަމުން އެއީވެސް އޭނާ ދޫކޮށްލުމަށް ބާރަކަށް ވިކަމަށް ރިޕޯޓްތައް ބުނެފައިވެއެވެ.

2015 ވަނަ އަހަރުން ފެށިގެން އޭނާ ގެންދަނީ މައާފް ދީ ޖަލުން މިނިވަން ކޮށްދިނުމަށް އެދި އެކި އިދާރާތަކަށް އާދޭސް ހުށަހަޅަމުންނެވެ. އަދި މިއަހަރުގެ މާރޗް މަހު ސުޕްރީމްކޯޓުން އޭނާވަނީ ކަފާލާތުގެ ދަށުން މިނިވަން ކޮށްފައެވެ.

ރާޖީވް ގާންދީ އަވަހާރަ ކޮށްލީ 1991 ވަނަ އަހަރުގެ މޭމަހުގެ 21 ވަނަ ދުވަހު ޓެމިލް ނާޑޫގެ އަވަށަކަށް ކުރެއްވި ދަތުރު ފުޅެއްގައި، މީހަކު އަމިއްލަ ހަށިގަޑުގައި ބޮން ހަރުކޮށްގެން ދިން ހަމަލާއެއްގައެވެ. ހަމަލާދިން މީހާ، ދާނޫ ރާޖަރަތިނަމްއަކީ ލިބަރޭޝަން ޓައިގަރސް އޮފް ޓެމިލް އީލާމްއަށް ނިސްބަތްވާމީހެކެވެ. މިހަމަލާގައި ރާޖީވް ގާންދީއާއި ދާނޫ ހިމެނޭ ގޮތުން 16 މީހުން މަރުވެފައިވާއިރު، 45 މީހުންނަށް އެކިވަރުގެ އަނިޔާތައް ލިބިފައިވެއެވެ.

ހަމަލާއާ ގުޅިގެން ފެށުނު ޝަރީއަތުގައި، އޭރު އުމުރުން 19 އަހަރުގެ އޭޖީ ޕެރާރިވަލަން ހައްޔަރުކުރެވުނެވެ. އެއީ ހަމަލާ ރާވައި ހިންގުމުގައި އިސްކޮށްހުރި ސިވަރަސަންގެ އެދުމަށް، 9 ވޯލްޓްގެ ދެ ބެޓެރި ގަނެދިންކަމުގެ ކުށުގައެވެ. މި ދެ ބެޓެރިއަކީ ރާޖީވް ގާންދީ އަވަހާރަކޮށްލުމަށް ގޮއްވާލި ބޮމުގައި ހަރުކުރި ދެ ބެޓެރި ކަމަށްވެއެވެ. އެއާއެކު ސީބީއައިއިން ވަނީ އޭނާއާދެކޮޅަށް ދައުވާކޮށްފައެވެ.

އެޝަރީއަތް ކުރިޔަށް ގޮސް 1998 ވަނަ އަހަރު ދަށުކޯޓަކުން ޕެރާރިވަލަންއާއެކު 28 މީހެއްގެ މައްޗަށް މަރުގެ ހުކުމް އިއްވިއެވެ. ނަމަވެސް ސުޕްރީމް ކޯޓުގައި އިސްތިއުނާފުކޮށް، މީގެ ތެރެއިން 19 މީހުން މިނިވަން ވެފައިވެއެވެ. ބާކީ ތިބި މީހުންގެ ތެރެއިން ޕެރާރިވަލަން ހިމެނޭހެން ހަތަރު މީހެއްގެ މައްޗަށް އިއްވުނު މަރުގެ ހުކުމް ދެމެހެއްޓުމަށް ސުޕްރީމް ކޯޓުން ނިންމިއިރު، އެހެން މީހުންގެ މަރުގެ ހުކުމް ބަދަލުކުރީ އުމުރު ދުވަހުގެ ޖަލު ހުކުމަކަށެވެ.

އެކި ގޮތްގޮތުން ކުރި މަސައްކަތުގެ ނަތީޖާއެއްގެ ގޮތުން ޕެރާރިވަލަންގެ މަރުގެ ހުކުންވެސް 2014 ވަނަ އަހަރު ސުޕްރީމް ކޯޓުން ވަނީ އުމުރު ދުވަހުގެ ޖަލު ހުކުމަކަށް ބަދަލު ކޮށްފައެވެ.