100 ކިލޯގެ ޑްރަގް މައްސަލައިގައި ހިމެނޭ ދެ ބިދޭސީންގެ މައްޗަށް އުފުލާފައިވާ ދައުވާތަކުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ލިބޭ 2 ބިދޭސީންގެ ބައި ކުރިއަށް ގެންދަނީ ވަކިންނެވެ.
އެ ދެމީހުންގެ މައްޗަށް އުފުލާފައިވާ ދައުވާއާއި ގުޅިގެން އެންމެ ފަހުން އަޑުއެހުމެއް ބާއްވާފައިވަނީ 21 މާރޗު 2022 ގައެވެ. އެ އަޑުއެހުމުގައި އެ ދެމީހުންގެ ވަކީލު އިބްރާހިމް ސިޔާމް ވަނީ މައްސަލައިގެ ދައުވާއަށް ޖަވާބުދާރީވުމަށްޓަކައި ބޭނުންވާ ބައެއް އިތުރު ލިޔެކިޔުންތައް ހުރިކަން ފާހަގަކޮށް، މަދުވާ ލިޔެކިޔުންތަކުގެ މައުލޫމާތު ދައުލަތާއި ހިއްސާ ކުރައްވާފައެވެ. އަދި ދައުލަތުންވެސް ވަނީ ދިފާއަށް ދޫކުރެވެން ހުރި ލިޔެކިޔުންތައް 5 ދުވަހުގެ މުއްދަތެއްގެ ތެރޭގައި ދޫކުރައްވާނެކަމަށް ވިދާޅުވެފައެވެ.
ބުދަ ދުވަހުގެ އަޑުއެހުމުގައި ކުރިއަށް ގެންދިޔައީ ދައުވާ އިއްވުމާއި ދައުވާއަށް ޖަވާބުދާރީ ވުމުގެ ބައެވެ. އެގޮތުން ދެމީހުންގެ މައްޗަށްވެސް މި މައްސަލައިގައި އުފުލާފައިވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ. ދައުވާ ސާބިތުވެއްޖެނަމަ އުމުރަށް ޖަލަށް ލުމާއެކު، 1 ލައްކަ ރުފިޔާއާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރާނެއެވެ.
އެދެމީހުންގެ މައްޗަށް ދައުވާ އިއްވާފައިވާއިރު، ދެމީހުންވެސް ވަނީ ދައުވާއަށް އިންކާރު ކޮށްފައެވެ. ވުމާއެކު، ދައުލަތުން ވަނީ ދެމީހުންގެ މައްޗަށް ހެކި ހުށައަޅާފައެވެ.
އެ ދެމީހުންގެ ފަރާތުން ދިފާއީ ހެކި ހުށައެޅުއްވުމަށް ގާޒީ ވަނީ މުއްދަތެއް ދެއްވާފައެވެ. އެއަށްފަހު ދެން ކުރިއަށް ގެންދިޔައީ މި މައްސަލައިގެ ބަންދު މުރާޖައާ އަޑުއެހުމެވެ.
ބަންދު މުރާޖައާގައި ދައުލަތުން ބުނެފައިވަނީ އެ ދެމީހުން ދޫކޮށްލައިފިނަމަ ފިލައިގެން ދިއުމުގެ އިޙްތިމާލު އޮތްކަމަށެވެ.
އޭގެ އިތުރުން، އެ ދެމީހުން ކަފާލާތުގެ ދަށުން ދޫކޮށްލެއްވުމަށް ދިފާއީ ވަކީލު އެދިލައްވާފައިވީނަމަވެސް، ޖިނާއީ އިޖުރާއަތުގެ ޤާނޫނުގެ 63 ވަނަ މާއްދާގެ ދަށުން ބަލާއިރު މަސްތުވާތަކެތި ޓްރެފިކް ކުރުމުގެ މައްސަލަތަކަކީ ކަފާލާތުގެ ދަށުން ދޫކޮށްލެވޭ ބާވަތުގެ މައްސަލަތަކެއް ނޫންކަމަށްވެސް ދައުލަތުގެ ވަކީލު ވިދާޅުވިއެވެ.
މި އަޑުއެހުމުގައި ދިފާއީ ވަކީލު އިބްރާހިމް ސިޔާމް ވަނީ ސުވާލެއް އުފައްދަވާފައެވެ. އެގޮތުން މި މައްސަލައިގައި ހިމެނޭ ދިވެހިން ދޫކޮށްލާފައިވާއިރު، ހަމައެކަނި ދެ ބިދޭސީން ބަންދުކޮށްފައި ތިބެނީ ކީއްވެތޯ ދިފާއުން ވަނީ ސުވާލުކޮށްފައެވެ.
އެކަމާ ގުޅޭގޮތުން ދައުލަތުން ބުނީ، އެމީހުން ދޫކޮށްލައިފިނަމަ ރާއްޖެ ދޫކޮށް ފިލައިގެން ދިއުމުގެ އިޙްތިމާލު އެބައޮތް ކަމަށެވެ. އަދި ޤާނޫނީ ގޮތުން ބެލެނިވެރި ފަރާތެއް ނެތް ޙާލަތުގައި އެމީހުން ކޯޓަށް ހާޒިރު ނުކުރެވިދާނެކަމަށްވެސް ދައުލަތުގެ ވަކީލު ވިދާޅުވިއެވެ.
މައްސަލަ ބައްލަވާ ގާޒީ ދީބާނާޒް ފަހުމީ ނިންމެވީ މިވަގުތަށް އެމީހުންގެ ބަންދުގެ ޙާލަތަށް ބަދަލު ގެންނަންޖެހޭ ތަނެއް ނެތް ކަމަށެވެ. ގާޒީ ދީބާނާޒް ވަނީ މި މައްސަލައިގައި ދިފާއުން ހުށައަޅާފައިވާ ހުށައެޅުމުގައި ހިމެނެނީ ހަމައެކަނި އެމީހުންގެ ވާކްޕާމިޓް ކަމަށް ވިދާޅުވެ، އިތުރު ލިއެކިއުންތައް ހުށައަޅުއްވައިފިނަމަ އެމީހުންގެ ބަންދާމެދު ނިންމި ގޮތް ބަދަލު ކުރެއްވުމުގެ ފުރުސަތެއް އޮތްކަމަށް ވިދާޅުވެފައެވެ.
އެމީހުން ރާއްޖޭގައި އުޅެމުންދާއިރު އެމީހުން ތިބީ ކޮން ސްޕޮންސަރޝިޕެއްގެ ދަށުންތޯއާއި، އެމީހުންގެ ޕާސްޕޯޓާއި، ރާއްޖޭގައި ހޭދަކޮށްފައިވާ މުއްދަތާއި، ޑީއެމް މޮބިންގެ ފަރާތުން މީހަކު ޖާމިނު ކުރަން އެދޭއިރު އެއީ އާއިލީ ގޮތުން ކޮން ގުޅުމެއް އޮތް މީހެއްކަން އެނގޭނެ ލިއުމެއް ފަދަ އިތުރު ލިއުންތައް ހުށައަޅައިފިނަމަ، އެ ނިންމެވުމާމެދު އަލުން ވާހަކަ ދައްކައި، އިތުރު ގޮތެއް ނިންމެވުމުގެ ފުރުސަތުވެސް އޮތްކަން ގާޒީ އަމިއްލަފުޅަށް އަޑުއެހުމުގައި ވިދާޅުވިއެވެ.
