ލިވަޕޫލްގެ ޑިފެންޑަރުން ޖޯސެފް ގޮމޭޒަށް ލިބުނު އަނިޔާއަކީ އެހާ ސީރިއަސް އަނިޔާއަކަށް ނުވޭނެ ކަމަށް އުންމީދުކުރާ ކަމަށް އެ ޓީމުގެ ކޯޗު ޔާގަން ކްލޮޕް ބުނެފިއެވެ.

ގޮމޭޒަށް އަނިޔާވެފައިވަނީ އިނގިރޭސި ޕްރިމިއާ ލީގުގައި ރޭ ސައުތެމްޓަނާއި ދެކޮޅަށް ކުޅުނު މެޗުގައެވެ. އެއާއެކު އޭނާ ވަނީ ބަދަލުކޮށްފައެވެ. އޭނާގެ ބަދަލުގައި ޖޯޑަން ހެންޑަސަން ވަނީ ކުޅެން އަރުވާފައެވެ. އޭނާ ބަދަލުކުރީ ފަޔަށް ލިބުނު އަނިޔާއަކާ ގުޅިގެންނެވެ.

މެޗަށް ފަހު ކްލޮޕް ބުނީ ލިވަޕޫލްގެ ނަސީބުވެސް ރަނގަޅީ ކަމަށެވެ. ގޮމޭޒަށް އަނިޔާވެފައިވާ ކަމަށާއި ނަމަވެސް، އަދި މާ ބޮޑު ގޯހެއް ފެންނަން ނެތް ކަމުގައެވެ. މީގެ އިތުރުން ގޮމޭޒް ޑްރެސިން ރޫމުގައި އިން ވަގުތު އޭނާއާ ވާހަދަ ދެކެވުނު ކަމަށާއި، އޭނާ ހުރީ ރަނގަޅު މޫޑެއްގައި ކަމަށް ކްލޮޕް ބުންޏެވެ. އަދި އިތުރު އެއްޗެއް ބުނެވޭނީ އޭނާގެ ފައިގެ ސްކޭނެއް ހެދުމަށްފަހު ކަމަށެވެ.

ރޭގެ މެޗަށް ކްލޮޕް ނެރެފައިވަނީ ޒުވާން ޓީމެކެވެ. ލިވަޕޫލްގެ ފުލް 11 ގެ ބަދަލުގައި ރޭގެ މެޗު ކްލޮޕް ފެށީ 9 ބަދަލަކާއެކުއެވެ. ރޭގެ މެޗުގައި މުޙައްމަދު ޞަލާހާއި، ސަޑިއޯ މާނޭ އަދި ފަދަ މުހިންމު ކުޅުންތެރިން ފެނިފައެއް ނުވެއެވެ. އެފްއޭ ކަޕްގެ ފައިނަލް މެޗުގައި ލިބުނު އަނިޔާއެއްގެ ސަބަބުން ސަލާހުއާއި ވެންޑައިކު ބަދަލުކުރިއެވެ. ނަމަވެސް ކްލޮޕް ބުނީ މި ދެ ކުޅުންތެރިންނަށް މާބޮޑު އަނިޔާއެއް ނުވާކަމަށާއި، ޗެމްޕިއަންސް ލީގުގެ ފައިނަލަށް ސަލާހު ވެސް އަދި ވެންޑައިކު ވެސް ފިޓުވާނެކަމަށެވެ.

އޭގެ ކުރިން ޕްރިމިއާ ލީގުގައި ހޮނިހިރު ދުވަހު ވޮލްވާހެމްޕްޓަނާ ދެކޮޅަށް ކުޅޭ މެޗުގައި ވެސް މި ދެ ކުޅުންތެރިން ފެންނާނެކަމަށް ކްލޮޕް ބުންޏެވެ.