ރައީސް ނަޝީދު ދެއްކެވި ވާހަކަފުޅާ ގުޅިގެން އަނދުން ހުސައިން ސިޔާސީ ޑްރާމާ ކުޅުއްވާކަމުގެ ތުހުމަތު
ކޮމިޓީން ފުރަތަމަ މަޝްވަރާ ކުރައްވާފައިވަނީ 12 މެއި 2022 ގައި ބޭއްވެވި ބައްދަލުވުމުގައި
ހެންވޭރު ދެކުނު ދާއިރާގެ މެންބަރު ޙުސައިން ޝަހީމް ފޮނުއްވާފައިވާ ސިޓީއާ ގުޅޭގޮތުން ކޮމިޓީގެ ލަފާއަކަށް އެދިފައިވާ މައްސަލަ، ރައްޔިތުންގެ މަޖިލީހުގެ ޢާންމު ކޮމިޓީއިން ދިރާސާކުރުން
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން) އާ ގުޅުވައި ރައީސް ނަޝީދު ދެއްކެވި ވާހަކަފުޅާ ގުޅިގެން ރައްޔިތުންގެ މަޖިލީހުގެ އާންމު ކޮމިޓީއަށް އޭނާގެ ފަރާތުން ހުށަހަޅާފައިވާ މައްސަލައާ ގުޅޭގޮތުން ކޮމިޓީގެ ދެވަނަ ބައްދަލުވުން ކުރިއަށް ގެންގޮސްފިއެވެ.
މި މައްސަލައާ ގުޅިގެން ކޮމިޓީން ފުރަތަމަ މަޝްވަރާ ކުރައްވާފައިވަނީ 12 މެއި 2022 ގައި ބޭއްވެވި ބައްދަލުވުމުގައެވެ. އެ ބައްދަލުވުމުގައި އަނދުން ހުސައިން ފޮނުއްވާފައިވާ ސިޓީއާއި ގުޅޭގޮތުން ކޮމިޓީގެ ލަފާއަކަށް އެދި ހުށައަޅާފައިވާ މައްސަލަ ވަނީ ދިރާސާ ކޮށްފައެވެ. އާންމު ކޮމިޓީއަށް ހުށައެޅިފައިވަނީ އެ ސިޓީއާ ގުޅިގެން މަޖިލީހުގެ ސެކްރެޓޭރިއޭޓަށް ލަފައެއް އެރުވުމެވެ.
މި ސިޓީގައި ވިދާޅުވެފައިވަނީ، ރައީސް ނަޝީދަށް އަމާޒުކޮށް، ދީނީ ހަރުކަށި ފިކުރުގެ ބަޔަކުކަމަށް ތުހުމަތު ކުރެވޭ ބަޔަކު ދިން ބޮމުގެ ހަމަލާގެ ފަހަތުގައި އަނދުން ހުސައިންގެ ބައިވެރިވުމެއް އޮތްކަމަށް ދޭހަވާ ގޮތަށް އެއްވެސް އަސާސެއް ނެތް ތުހުމަތުތަކެއް ރައީސް ނަޝީދު ކުރައްވާފައިވާކަމަށެވެ.
އެގޮތުން ރައީސް ނަޝީދު މި ތުހުމަތުތައް ކުރައްވާފައިވަނީ 8 މެއި 2022ގައި ރައްޔިތުންގެ މަޖިލީހުގެ ވަޓްސްއަޕް ގްރޫޕުގައި ދެއްކެވި ވާހަކަފުޅެއްގައިކަމަށް ވަނީ ވިދާޅުވެފައެވެ.
އަނދުން ހުސައިން ވަނީ އެ ވާހަކަފުޅުތަކަކީ އޭނާގެ ހައްޤުތަކާއި އިމްތިޔާޒުތަކަށް އުނިކަން އަންނާނެފަދަ ވާހަކަތަކެއްކަމަށް ވިދާޅުވެ, އެ މައްސަލަ ކަމާބެހޭ އިދާރާތަކަށް ހުށައެޅުއްވުމަށް ނިންމަވާފައިވާކަން ހާމަކުރައްވާފައެވެ.
އަދި މި މައްސަލަ ކަމާބެހޭ އިދާރާތަކަށް ހުށައެޅުމަށްޓަކައި 8 މެއި 2022 ވަނަ ދުވަހުގެ 19:01އާ 20:26އާ ދެެމެދު ރައްޔިތުންގެ މަޖިލީހުގެ ވަޓްސްއަޕް ގްރޫޕަށް ފޮނުއްވާފައިވާ އެންމެހާ މެސެޖުތަކުގެ ކޮޕީ ލިބޭނެގޮތް ހައްދަވައިދެއްވުމަށް މަޖިލީހުގައި ވަނީ އެދިވަޑައިގެންފައެވެ.
ރައްޔިތުންގެ މަޖިލީހުގެ ވަޓްސްއަޕް ގްރޫޕަށް ރައީސް ނަޝީދު ފޮނުއްވި މެސެޖެއްގައި އަނދުން ހުސައިނަށް ބޮޑެތި ތުހުމަތުތަކެއް ކުރައްވައި ވިދާޅުވީ، ރައީސް ނަޝީދަށް ދެވުނު ހަމަލާގެ ރޭވުންތައް ފޮރުވުމުގައި އޭނާ ސަރުކާރަށް ވާގިވެރިވަމުންދާ ކަމަށެވެ.
ކޮމިޓީން ގޮތެއް ނިންމެވުމުގެ ކުރިން އެކަމާ ގުޅިގެން ބަލަންޖެހޭ ކަންކަން އިތުރަށް ބައްލަވައި، މި މައްސަލަ އިތުރަށް ދިރާސާ ކުރެއްވުމަށް ކޮމިޓީން އެ ދުވަހު އޮތީ ނިންމާފައެވެ.
އެކަމާ ގުޅޭގޮތުން އަންގާރަ ދުވަހު ކުރިއަށް ދިޔަ ކޮމިޓީ ބައްދަލުވުމުގައި ކޮމިޓީގެ މުޤައްރިރު، ހެންވޭރު ހުޅަނގު ދާއިރާގެ މެމްބަރު ޙަސަން ލަތީފް ވިދާޅުވީ، އެފަދަ ގޮތަކަށް މަޖިލީހުގެ ވަޓްސްއަޕް ގްރޫޕަށް ފޮނުވާ މެސެޖަކާއި ގުޅިގެން މީގެ ކުރިން މައުލޫމާތު ދެވިފައިވޭތޯ އިދާރީ ގޮތުން ޗެކު ކުރައްވާފައިވާ ކަމަށެވެ. ނަމަވެސް މިފަދަ ވަޓްސްއަޕް ގްރޫޕެއް ފުރަތަމަ އުފައްދާފައިވަނީވެސް 19 ވަނަ މަޖިލީހުގައިކަމަށް މަޖިލީހުގެ އަމީންއާންމު މައުލޫމާތު ދެއްވާފައިވާކަމަށް އޭނާ ވިދާޅުވިއެވެ.
ޙަސަން ލަތީފް ވަނީ އޭނާގެ އަމިއްލަފުޅު ޚިޔާލުވެސް ހިއްސާ ކުރައްވާފައެވެ. އެގޮތުން މަޖިލީހުގެ ވަޓްސްއަޕް ގްރޫޕަކީ އެއްވެސް ހިފެހެއްޓުމެއް ނެތި މެމްބަރުން ޙިޔާލުފާޅު ކުރައްވަމުންދާ ގްރޫޕެއްކަން ފާހަގަކުރައްވައި ޙަސަން ވިދާޅުވީ، އެ ވާހަކަތައް އާންމުވާން މެމްބަރުން ބޭނުންފުޅު ނުވެދާނެ ކަމަށެވެ. އެހެން ވިދާޅުވަނީ ވަކި މި މައްސަލައާ ގުޅިގެން ނޫންކަމަށް އޭނާ ވިދާޅުވިއެވެ.
ޙަސަން ލަތީފް ދެކިވަޑައިގަންނަވާ ގޮތުގައި އެކަމަކީ އެހެން މެމްބަރުންގެ މަސްލަޙަތުވެސް ހިމެނޭނެ ކަމެކެވެ. ވުމާއެކު، ކޮމިޓީން ނިންމުމެއް ނިންމައި، މަޖިލީހުގެ ވަޓްސްއަޕް ގްރޫޕުގައި ދެކެވުނު ވާހަކަތަކެއް ދޫކުރުމަކީ އެންމެ ރަނގަޅު ގޮތްކަމަށް ދެކިވަޑައިނުގަންނަވާ ކަމަށް އޭނާ ވިދާޅުވިއެވެ.
އެހެންނަމަވެސް، ތަހުޤީޤީ އިދާރާއަކުން ބޭނުންވެގެން ބުނެފިނަމަ، އެ މައުލޫމާތު ދޫކުރުމަށް މަޖިލީހަށް ނިންމިދާނެކަމަށް ދެކިވަޑައިގަންނަވާކަމަށް އޭނާ ވިދާޅުވިއެވެ.
މި ބައްދަލުވުމުގައި އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ، މަޖިލީހުގެ ވަޓްސްއަޕް ގްރޫޕަކީ ތަފާތު އެކި ބާވަތުގެ ވާހަކަތައް ދެކެވޭ ގްރޫޕެއް ކަމަށެވެ. އެގޮތުން ގްރޫޕުގައި ބޭއަދަބީ ބަހުން ވާހަކަ ދެއްކެވުމުން މެމްބަރަކު ގްރޫޕުން ވަކި ކުރެއްވިކަންވެސް އޭނާ ފާހަގަކުރެއްވިއެވެ.
އެހެންނަމަވެސް، މެމްބަރު ޝަހީމް ހުށައަޅުއްވާފައިވާ މައްސަލައިގައި އޭނާގެ ފުރާނައަށް ނުރައްކާ ވެދާނެ ކަމަށް ބަޔާން ކުރައްވާފައިވާއިރު، އެއީވެސް ކޮމިޓީން ބަލަންޖެހޭ ކަންކަން ކަމަށް ބިގޭ ވިދާޅުވިއެވެ. އެގޮތުން މިއީ މިއަދު އެއް މެމްބަރަކަށް ދިމާވި ކަމެއް ނަމަވެސް، ކޮންމެ މެމްބަރެއްގެ ސަލާމަތާއި ރައްކާތެރިކަމަށްވެސް ސަމާލުކަން ދޭންޖެހޭކަން އޭނާ ފާހަގަކުރެއްވިއެވެ.
އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) އެހެން ވިދާޅުވެފައިވާއިރު، ރައީސް ނަޝީދު ހުންނެވިފަދަ މަޤާމެއްގައި ހުންނެވި ބޭފުޅަކު އެފަދަ އަސާސެއް ނެތް ވާހަކަފުޅެއް ދެއްކެވުމަކީ މެމްބަރު އަނދުން ހުސެއިންގެ ފުރާނައަށްވެސް ނުރައްކަލެއް ކުރިމަތިވެގެން ދިއުމުގެ އިހްތިމާލު އޮތް ކަމެއްކަމަށް އަނދުން ހުސެއިން ހުށައެޅުއްވި މި މައްސަލައިގައި ވިދާޅުވެފައިވެއެވެ.
ބިގޭ ދެއްކެވި ވާހަކަފުޅާ ގުޅިގެން މެމްބަރު ޙަސަން ލަތީފް ވިދާޅުވީ، މެމްބަރުން މެސެޖު ކުރައްވާނީ އެ މެސެޖެއް އާންމުވެދާނެކަމަށް ބައްލަވައިގެން ނޫން ކަމަށާއި، މެސެޖުތައް އެގޮތަށް ދޫކުރެއްވުމަކީވެސް މެމްބަރުންގެ ޙައްޤަށް އުނިކަމެއް އައިސްދާނެ ކަމެއް ކަމަށެވެ.
ޙަސަން ލަތީފްގެ އެ ވާހަކަފުޅަށް ތޮއްޑޫ ދާއިރާގެ މެންބަރު ހަސަން ޝިޔާން ވަނީ ތާއީދު ކުރައްވާފައެވެ. އޭނާވެސް ވަނީ ތަހުޤީޤީ އިދާރާއަކުން އެދިއްޖެނަމަ އެ މައުލޫމާތު ފޯރުކޮށްދިނުން ރަނގަޅުކަމަށް ވިދާޅުވެފައެވެ.
މެމްބަރު ޝިޔާން ވަނީ މިއީ ސިޔާސީ ގޮތުން ކުޅުއްވާ ޑްރާމާއެއްކަމަށްވެސް ވިދާޅުވެފައެވެ.
މެމްބަރު ޝިޔާން ވަނީ މެސެޖުތައް ދޫކުރުމަކީ 3 ވަނަ ފަރާތެއްގެ މަސްލަޙަތު ހިމެނޭ ކަމެއްކަމަށް ދެކިވަޑައިގަންނަވާކަމަށް ވިދާޅުވެ، ހަމައެކަނި ތަހުޤީޤީ އިދާރާއަކުން އެދިއްޖެނަމަ އެ މައުލޫމާތު ފޯރުކޮށްދިނުމަށް ފެނިވަޑައިގަންނަވާކަމަށް ހުށައަޅުއްވާފައެވެ.
މެމްބަރު ޝިޔާންގެ އެ ހުށައެޅުއްވުން ކޮމިޓީން ފާހެއް ނުވިއެވެ. ވުމާއެކު، މެމްބަރު ޙަސަން ލަތީފް ވަނީ އަނެއްކާވެސް ކޮމިޓީގެ ލަފަޔަކާއި ގުޅޭގޮތުން މެމްބަރުންނަށް ވާހަކަދެއްކެވުމަށް ފުރުސަތު ދެއްވާފައެވެ.
ކޮމިޓީގެ މުޤައްރިރު ތަކުރާރުކޮށް ސުވާލު ކުރެއްވުމުންވެސް ކޮމިޓީގެ މެމްބަރަކު އެއްޗެއް ވިދާޅުވެފައެއް ނުވެއެވެ. ވުމާއެކު، އަންގާރަ ދުވަހުގެ ބައްދަލުވުންވެސް ނިމިގެން ދިޔައީ އެ މައްސަލައަށް ވަކި ގޮތެއް ނުނިމިއެވެ.
