މެންޗެސްޓަރ ސިޓީއާއެކު މަޝްވަރާ ކުރަން މެންޗެސްޓަރ ޔުނައިޓެޑްގެ މިޑްފީލްޑަރ ޕައުލް ޕޮގްބާ ބޭނުން ނުވާ ކަމަށް ރިޕޯޓުތައް ބުނެފިއެވެ.
އިތުބާރުހުރި ކުޅިވަރު ނޫސްވެރިޔާ ފަބްރީޒިއޯ ރޮމާނޯ ކުރި ޕޯސްޓެއްގައި ބުނީ މެންޗެސްޓަރ ސިޓީއާއެކު ޕޮގްބާ މަޝްވަރާ ކުރަން ބޭނުން ނުވާ ކަމަށެވެ. އޭގެ ބަދަލުގައި އޭނާ ކުރިން ކުޅުނު ޔުވެންޓަސްގެ ބޯޑާއެކު މިއަދު ޕޮގްބާގެ އެޖެންޓު މަޝްވަރާ ކުރާނެ ކަމަށްވެސް ފަބްރީޒިއޯ ބުންޏެވެ. ޔުވެންޓަސްއިން ޕޮގްބާ ހޯދުމަށް މަސައްކަތް ކުރާއިރު، އެންމެ ބޮޑު ސަމާލުކަމެއް ދޭނީ އޭނާއަށް ބޮޑު މުސާރައެއް ދޭން ކަމަށްވެސް ފަބްރީޒިއޯގެ ޕޯސްޓުގައި ބުނެފައިވެއެވެ.
މެންޗެސްޓަރ ޔުނައިޓެޑަށް ކުޅުމަށްފަހު ޕޮގްބާ ޔުވެންޓަސްއަށް ބަދަލުވީ 2012 ވަނަ އަހަރުއެވެ. ޔުވެންޓަސްގައި 124 މެޗު ކުޅުނުއިރު، އޭނާ ވަނީ 28 ލަނޑު އެޓީމަށް ކާމިޔާބުކޮށްދީފައެވެ. ނަމަވެސް އޭގެ ފަހުން 2016 ވަނަ އަހަރު ޕޮގްބާ ވަނީ އެނބުރި މެންޗެސްޓަރ ޔުނައިޓެޑަށް ބަދަލުވެފައެވެ. ޔުނައިޓެޑާއެކު ޕޮގްބާ ހަދާފައިވާ އެއްބަސްވުމުގެ މުއްދަތު ހަމަވާނީ ކުރިއަށް އޮތް ސަމަރ ޓްރާންސްފަރ މާކެޓަށެވެ. އެހެންކަމުން ފްރީ އެޖެންޓެއްގެ ގޮތުގައި ބޭނުން ކްލަބަކަށް ދިއުމުގެ ފުރުސަތު ޕޮގްބާއަށް އެބައޮތެވެ.
ޔުވެންޓަސްއާއި ޕޮގްބާގެ އެޖެންޓު މިއަދު މަޝްވަރާ ކުރާއިރު، ޕީއެސްޖީގެ ބޯޑުން ވަނީ މިހާރު އޭނާއާއި ބައްދަލުކޮށްފައެވެ. ޕީއެސްޖީއަށް ދިމާވެފައިވާ މިޑްފީލްޑަރުންގެ މައްސަލަ ހައްލުކުރުމަށް އެޓީމުން އަންނީ ޕޮގްބާ ހޯދުމަށް މަސައްކަތް ކުރަމުންނެވެ.
