މެންޗެސްޓާރ ޔުނައިޓެޑަށް ބަދަލުވީ އިނގިރޭސި ޕްރިމިއާ ލީގު ކާމިޔާބުކުރަން ކަމަށް އެޓީމުގެ މިޑްފީލްޑަރު ޕައުލް ޕޮގްބާ ބުނެފިއެވެ.
ޕޮގްބާވަނީ އޭނާ އަލުން އަނބުރާ ޔުނައިޓެޑަށް އައީ ޕްރިމިއާ ލީގު ހޯދަން ކަމަށާއި ޕްރިމިއާ ލީގު ހޯދުމަކީ އޭނާގެ މައިގަނޑު އަމާޒުކަމަށް ބުނެފައެވެ. އަދި ޔުނައިޓެޑަށް ކުޅުމަކީ ކުޑައިރުއްސުރެވެސް އޭނާ ދެކޭ ހުވަފެނެއްކަމަށާއި އެކަން ހަގީގަތަކަށް ހެދުމުން ވަރަށް އުފާވާ ކަމަށް އޭނާ ބުންޏެވެ.
ޕޮގްބާވަނީ މީގެ ކުރިންވެސް ޔުނައިޓެޑަށް ކުޅެފައެވެ. އެހެން ނަމަވެސް ގަވާއިދުން ކުޅުމުގެ ފުރުސަތު ނުލިބުމުގެ ސަބަބުން އޭނާވަނީ 2012 ވަނަ އަހަރު އިޓަލީގެ ޖުވެންޓަސްއަށް ބަދަލުވެފައެވެ. އެހެން ނަމަވެސް އޭގެ ހަތަރު އަހަރު ފަހުން އޭނާވަނީ އޭރުގެ ރިކޯޑު ފީއެއްކަމަށްވާ 89 މިލިއަން ޕައުންޑަށް ޔުނައިޓެޑަށް ބަދަލުވެފައެވެ.
ޕޮގްބާ ބުނެފައިވަނީ އިޓަލީގައި އޭނަ ހޭދަކުރި ދުވަސްތަކުގައި ވަރަށް ގިނަ ތަޖުރިބާތަކެއް ލިބިފައިވާ ކަމަށާއި 2012 ވަނަ އަހަރު އޭނާ ކްލަބް ދޫކޮށްލީ އަލުން އަނބުރާ އައުމުގެ އުއްމީދުގައި ކަމަށެވެ. އަދި އަލުން އަނބުރާ ޔުނައިޓެޑަށް އާދެވުމުން ވަރަށް ހިތްހަމަ ޖެހޭކަމަށެވެ.
ޕޮގްބާ ވަނީ މިދިޔަ ސީޒަނުގައި ޔުނައިޓެޑުގައި މޮޅު ކުޅުމެއް ދައްކާފައެވެ. އޭނާވަނީ މިދިޔަ ސީޒަނުގައި ޔުނައިޓެޑާއި އެއްކޮށް ލީގު ކަޕާއި ކޮމިއުނިޓީ ޝީލްޑުގެ އިތުރަށް ޔުއެފާ ޔުރޯޕާ ލީގު ކާމިޔާބުކޮށްފައެވެ.
މިވަގުތު ޔުނައިޓެޑު އޮތީ އިނގިރޭސި ޕްރިމިއާ ލީގު ތާވަލުގެ އެއްވަނައިގައެވެ.
