ޕޮގްބާއާ އެކު ލުކާކޫ ލޮސް އެންޖެލަސްގައި ތަމްރީން ހަދައިފި

މެންޗެސްޓާ ޔުނައިޓެޑަށް ކުޅެމުން އަންނަ ޕައުލް ޕޮގްބާއާ އެކު އެ ކްލަބަށް ބަދަލުވާނެ ކަމަށް ބެލެވޭ އެވަޓަންގެ ފޯވާޑް ރޮމެލޫ ލުކާކޫ ތަމްރީން ހަދައިފި އެވެ.

ރިޕޯޓްތައް ބުނާގޮތުން މި ސީޒަނަށްފަހު ޔުނައިޓެޑަށް ލުކާކޫ ބަދަލުވާނެ އެވެ. އެގޮތުން އޭނާ މިވަގުތު އެމެރިކާގައި ހުރީ މެޑިކަލް ހެދުމަށެވެ. އެހެންނަމަވެސް މީގެއިން އެއްވެސް ކަމެއް އަދި ކަށަވަރެއްނުވެއެވެ.

ގާތް ދެ ރަހްމަތްތެރިން ކަމަށްވާ ލުކާކޫ އަދި ޕޮގްބާ ލޮސް އެންޖަލަސްގައި ތަމްރީންތައް ހަދަމުންދާ ފޮޓޯތައް އާންމުވެފައިވާއިރު، ގިނަ ބަޔަކު ބުނަމުން އަންނަނީ މިފަހަރު ލުކާކޫ ޔުނައިޓެޑަށް ބަދަލުވާނެ ކަމަށެވެ.

ޔުނައިޓެޑުން ރެއާލްގެ ފޯވާޑް ހަމޭސް ރޮޑްރިގޭޒް ހޯދުމަށް މަސައްކަތްކޮށްފައިވާއިރު، އެ ކްލަބަށް ރެއާލް އިން ހުށަހަޅާ އަގު ބޮޑުވެގެން އެކަމަށް އެއްބަހެއް ނުވެއެވެ. ހަމޭސް ވިއްކާލަން ރެއާލް އިން އެއްބަސްވެފައިވަނީ 90 މިލިއަން ޕައުންޑު ކަމަށް ރިޕޯޓްތައް ބުނެއެވެ. އެހެންނަމަވެސް ލުކާކޫ ވިއްކާލަން އެވަޓަން އިން ވަނީ 75 މިލިއަން ޕައުންޑަށް އެއްބަސްވެފައިކަމަށް ރިޕޯޓްތައް ބުނެއެވެ.

ސްކައި ސްޕޯޓްސް އަށް ދާދި ފަހުން ދިން އިންޓަވިއުއެއްގައި ޗެލްސީން ހޯދުމަށް މަސައްކަތްކުރަމުން އަންނަ ލުކާކޫ ބުނީ އޭނާ އާއި އޭނާގެ އެޖެންޓަށް ދެން ވާން އޮތް ގޮތް އެނގޭ ކަމަށާއި، މާގިނަ ދުވަސްތަކެއް ނުވެ އެކަން އެންމެންނަށް އެނގިގެންދާނެ ކަމަށެވެ.

ލުކާކޫ ވަނީ އެކިފަހަރުގެ މަތިން އެވަޓަންއާއެކު އޭނާގެ އެއްބަސްވުން އިތުރުކުރުމަށް މަޝްވަރާކޮށްފައެވެ. އެހެންނަމަވެސް ރިޕޯޓްތައް ބުނާގޮތުން ލުކާކޫ ބޭނުންވާގޮތަށް އަދިވެސް އެވަޓަންއަށް އެއްބަސްވުން ނެހެދެއެވެ.

ރިޕޯޓްތައް ބުނާ ގޮތުން އުމުރުން 23 އަހަރުގެ ލުކާކޫ ޗެމްޕިއަންސް ލީގު ކުޅުމުގެ ފުރުސަތު ހޯދުމަށް އޭނާ ކުރިޔަށް އޮތް ސީޒަނަށް އެހެން ކްލަބަކަށް ބަދަލުވާނެ ކަމަށް ވަނީ ބެލެވިފައެވެ.

ޗެލްސީން 2014 ވަނަ އަހަރު އެވަޓަންއަށް ބަދަލުވި ލުކާކޫ ވަނީ ވެސްޓްބްރޮމް އަށް ވެސް ކުޅެފައެވެ. ޗެލްސީއާއެކު ދެ ސީޒަން ހޭދަކޮށްފައިވާ ލުކާކޫ ވަނީ އެ ޓީމަށް 15 މެޗު ކުޅެދީފައެވެ.

މީގެ އިތުރުން އޭނާ ވަނީ މިހާތަނަށް އެވަޓަން އަށް ކުޅުނު 219 މެޗުގައި 104 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ ބެލްޖިއަމް ޓީމަށް ކުޅުނު 57 މެޗުގައި 20 ލަނޑު ކާމިޔާބުކޮށްފައެވެ.