ފްރާންސްގެ މިޑްފީލްޑާ ޕައުލް ޕޮގްބާއަށް ވޯލްޑް ކަޕް ކާމިޔާބު ކުރެވޭނެ ކަމަށް ކްލައިޑިއޯ މަކެލޭލޭ ބުނެފިއެވެ.

ޕޮގްބާ އަންނަނީ ފްރާންސްގެ ގައުމީ ޓީމާއި މެންޗެސްޓާ ޔުނައިޓެޑުގައި މުހިންމު ރޯލެއް އަދާކުރަމުންނެވެ.

ނޫސްވެރިންނާ ވާހަކަ ދައްކަމުން މަކެލޭލޭ ބުނެފައިވަނީ ޕޮގްބާއަށް މިހާރު ގައުމީ ޓީމުގައި ލީޑަރެއްގެ ރޯލު އަދާކުރުމުގެ މުހިންމުކަން އިގޭނެ ކަމަށާއި އަދި އޭނާއަކީ އެ ޒިންމާ ނަގަން އެންމެ އެކަށީގެންވާ ކުޅުންތެރިޔާ ކަމަށެވެ. ހަމައެހެންމެ މަކެލޭލޭ ބުނެފައިވަނީ ޕޮގްބާއަކީ ފިޒިކަލީ އަދި މެންޓަލީވެސް ފުރިހަމަ ކުޅުންތެރިޔެއް ކަމަށާއި އޭނާއަކީ ގޯލު ޖަހައި އެހެން ކުޅުންތެރިންނަށް ފުރުސަތު ތަނަވަސް ކޮށްދިނުމުގެ ފުރިހަމަ ގާބިލްކަން ލިބިފައިވާ ކުޅުންތެރިޔެއް ކަމަށެވެ.

މަކެލޭލޭ މިހެން ބުނެފައިވާއިރު ޕޮގްބާގެ ކެޕްޓަން ކަމުގެ ދަށުން ފްރާންސްގެ 20 އަހަރުން ދަށުގެ ޓީމުން އެ އުމުރުފުރައިގެ ވޯލްޑް ކަޕް ކާމިޔާބު ކުރިއެވެ. އެ މުބާރާތުގެ އެންމެ މޮޅު ކުޅުންތެރިޔާއަށް ވެސް ހޮވުނީ ޕޮގްބާއެވެ.

މަކެލޭލޭ ގަބޫލްކުރާ ގޮތުގައި 2018 ވަނަ އަހަރުގެ ވޯލްޑްކަޕް ފްރާންސްއިން ކާމިޔާބު ކުރަން ބޭނުންނަމަ ޕޮގްބާ މުހިންމު ދައުރެއް އަދާކުރަން ޖެހެއެވެ. އޭގެ އިތުރުން މަކެލޭލޭ ބުނެފައިވަނީ ފްރާންސްގެ މިހާރުގެ ގައުމީ ޓީމުގައި ވަރަށް ގިނަ މޮޅު ކުޅުންތެރިން އެބަ ތިއްބެވެ. އަދި ޒުވާން ގިނަ ކުޅުންތެރިން ޓީމުގައި ހިމެނިފައިވުމަކީ ޓީމަށް ލިބޭ އިތުރު ކުރިއެރުމެއް ކަމަށް އޭނާ ގަބޫލްކުރެއެވެ.

މަކެލޭލޭ ވަނީ ފްރާންސްގެ ގައުމީ ޓީމަށް 71 މެޗު ކުޅެދީފައެވެ. އަި އޭނާ ވަނީ 2006 ވަނަ އަހަރުގެ ވޯލްޑް ކަޕް ފައިނަލްގައި ފްރާންސް ތަމްސީލްކޮށްފައެވެ.