ބާސެލޯނާގެ ކުރީގެ ކެޕްޓަން ލިއޮނެލް މެސީ ކޮންމެ ވެސް ދުވަހަކުން އަދި ބާސެލޯނާއަށް ދާނެ ކަމަށް އުންމީދު ކުރާކަމަށް އޭނާގެ ބައްޕަ ޖޯޖް މެސީ ބުނެފިއެވެ.

މި ސީޒަނުގައި މެސީ ވަނީ ބާސާ ދޫކޮށް ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށް ބަދަލުވެފައެވެ. ގިނަ ދުވަސްތަކަކަށްފަހު މެސީ ބާސާ ދޫކޮށްލާފައިވަނީ އެ ކުލަބުގައި މަޑުކުރެވޭނެ ގޮތެއް ނެތުމުންނެވެ. މެސީ އަކީ އެ ކުލަބުގެ ތާރީޚުގައި ވެސް އެންމެ ގިނަ ލަނޑު ޖެހި ކުޅުންތެރިޔާއެވެ. އޭނާ ވަނީ އެ ޓީމަށް 520 މެޗު ކުޅެދީ 474 ލަނޑު ޖަހައިފައެވެ. އަދި މެސީ ވަނީ ބާސާއާއެކު ސްޕެނިޝް ލަލީގާ 10 ފަަހަރު ކާމިޔާބުކޮށްފައެވެ. މީގެ އިތުރުން 7 ފަހަރު ކޮޕާ ޑެލްރޭ އަދި ސުޕަ ކަޕް ކާމިޔާބުކޮށްފައިވެއެވެ. އަދި 4 ފަހަރު ޔުއެފާ ޗެމްޕިއަންސް ލީގު ކާމިޔާބުކުރިއިރު، ޔުއެފާ ސުޕަ ކަޕާއި ފީފާ ކުލަބް ވޯލްޑް ކަޕް 3 ފަހަރު ކާމިޔާބުކުރިއެވެ.

މި ސީޒަނަށްފަހު މެސީ ޕީއެސްޖީ ދޫކޮށްލާނެކަމުގެ އަޑުތައް ފެތުރެމުން ދަނިކޮށް ބާސާގެ ރައީސް ބުނީ މެސީ އަނބުރާ އެ ކުލަބަށް ގެނައުމުގެ ވިސްނުމެެއް ނެތް ކަމަށެވެ. ނަމަވެސް ބާސާގެ ކޯޗު ޒަވީ ހެނާންޑޭޒް ބުނީ މެސީއަށްޓަކައި ބާސާގެ ދޮރު އަބަދު ވެސް ހުޅުވިފައި ހުންނާނެކަމާއި، އެ ކުލަބުން މެސީއަށް އަބަދު ވެސް މަރުހަބާ ކިޔާނެ ކަމަށެވެ.

ޓުވިޓާގައި ދައުރުވަމުންދާ ވީޑިއޯއެއްގައި ފެންނަ ގޮތުން މެސީ ބާސާއަށް ބަދަލުވެދާނެތޯ އޭނާގެ ބައްޕަ ޖޯޖް ގާތު އެހުމުން ބުނީ ކޮންމެސް ދުވަހަކުން އެކަން ވާނެ ކަމަށް އުންމީދު ކުރާ ކަމަށެވެ.

މެސީ ޕީއެސްޖީއަށް ބަދަލުވެ މި ސީޒަނުގައި ވަނީ އެ ކުލަބާއެކު ފްރާންސް ލީގު ހޯދައިފައެވެ. މެސީ މިހާތަނަށް ޕީއެސްޖީއަށް ކުޅެދިން 25 މެޗުގައި ވަނީ 6 ލަނޑު ޖަހާފައެވެ. މެސީ ވަނީ އޭނާގެ ކެރިއަރުގައި 7 ފަހަރު ބެލެންޑޯ އެވޯޑު ހޯދާފައެވެ. އޭނާ އަކީ އެ އެވޯޑު އެންމެ ގިނަ ފަަހަރު ހޯދި ކުޅުންތެރިޔާއެވެ.