1.6 މިލިއަން ފަތުރުވެރިން ރާއްޖެއަށް ގެނެވޭނެ: މިނިސްޓަރ މައުސޫމް
ގަދަ 10އެއްގައި އުޅޭ މާކެޓްތަކަކީ މުހިންމު މާކެޓްތަކެއް
ޓޫރިޒަމް މިނިސްޓަރ ޑރ. އަބްދުﷲ މައުސޫމް
މިއަހަރު 1.6 މިލިއަން ފަތުރުވެރިން ރާއްޖެއަށް ގެނެވޭނެކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ފަތުރުވެރިކަމުގެ ސިނާއަތަށް ޚާއްސަކޮށް 12 އެވޯޑެއް ދިނުމަށް ނިންމިކަން އިއުލާންކުރުމަށް ޓޫރިޒަމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ, ކުރިން އަންދާޒާކުރިވަރަށްވުރެ ރާއްޖޭގެ ފަތުރުވެރިކަން ދަށަށް ހިނގައްޖެ ކަމަށެވެ.
ރަޝިޔާ ޔޫކްރެއިން މާކެޓުން ދަށްވި ބައިވެސް މީގެ ތެރޭގައި ހިމެނޭކަމަށް ވެސް ވިދާޅުވިއެވެ. މިއަހަރަށް ޗައިނާއިން ވެސް ފަތުރުވެރިން އަންނާނެ ކަމަށް ބަލާފައިވާނެކަމަށާއި، ނަމަވެސް ޗައިނާގެ ބޯޑަރު ބަންދުކޮށްފައިވާކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ 1.6 މިލިއަން ފަތުރުވެރިން ރާއްޖެ ގެނެވުނަސް އެއީ ވަރަށް ބޮޑު ކާމިޔާބީއެއް ކަމަށާއި, ގަދަ 10ގައި އުޅޭ މާކެޓްތަކަކީ މުހިންމު މާކެޓްތަކެއް ކަމަށެވެ.
މިނިސްޓަރ މިހެން ވިދާޅުވެފައިވާއިރު ފަތުރުވެރިކަމުގެ ސިނާއަތަށް ޚާއްސަކޮށް 12 އެވޯޑެއް ކޮންމެ އަހަރަކު ދޭން ޓޫރިޒަމް މިނިސްޓްރީން ވަނީ ނިންމާފައެވެ. މިނިސްޓަރ ވިދާޅުވީ, މި އެވޯޑްތައް ދިނުމަށް ނިންމާފައިވަނީ ފަތުރުވެރިކަމުގެ ރަން އަހަރާ ގުޅުވައިގެން ކަމަށެވެ. މި އެވޯޑްތަކުގެ ސަބަބުން ފަތުރުވެރިކަމުގެ ދާއިރާއަށް އިތުރު ކުރިއެރުންތައް އަންނާނެކަމަށްވެސް މިނިސްޓަރ ވިދާޅުވިއެވެ.
މި އެވޯޑްތަކަށް ކުރިމަތިލުމުގެ ފުރުސަތު 1- 30 ޖޫންގެ ނިޔަލަށް ހުޅުވާލެވޭނެއެވެ. އަދި ޓޫރިސްޓް ރިސޯޓް، ޓޫރިސްޓް ހޮޓެލް، ޓޫރިސްޓް ގެސްޓްހައުސް އަދި ޓޫރިސްޓް އުޅަނދުފަހަރު، މިއިން ކޮންމެ ކެޓަގަރީއަކުން ޖުމްލަ މާރކްސް އެންމެ މަތިން ހޯދާ އެއްވަނަ، ދެވަނަ އަދި ތިންވަނަ ފަރާތަކަށް އެވޯޑެއް ދެވޭނެއެވެ. މި އެވޯޑްތަކާގުޅޭ ކްރައިޓީރިއާ މިނިސްޓްރީގެ ވެބްސައިޓުގައި ޝާއިއުކުރެވިފައިވާނެއެވެ.
