ޝަންގްރިއްލާގައި އޮތް ސަރުކާރުގެ ހިއްސާ ދޫކޮށްލުމުގެ މަސައްކަތް ފަށައިފި
މާކެޓް ވެލިއުގައި އެސެސްކޮށްފައި އަގުހަދަފައި ދޫކޮށްލެވޭނެ
ޝަންގްރިއްލާ - ސަރުކާރުގެ ހިއްސާ ދޫކުރުމުގެ މަސައްކަތް ވަނީ ފަށާފައި
އައްޑޫ ސިޓީގައި އޮންނަ ޝަންގްރިއްލާގައި އޮތް ސަރުކާރުގެ ހިއްސާ ދޫކޮށްލުމުގެ މަސައްކަތް ފެށިގެން ކުރިއަށްދާ ކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުންނެވެ. ދާދި ފަހުން ފަތުރުވެރިކަމުގެ ގާނޫނަށް ގެނައި އިސްލާހު ރައީސް ތަސްދީގު ކުރެއްވުމާއި ގުޅިގެން، ޝަންގްރިއްލާގައި އޮތް ސަރުކާރުގެ ހިއްސާ ދޫކޮށްލުމަށް ކުރަމުން އަންނަ މަސައްކަތާއި ގުޅިގެން މިނިސްޓަރު ވިދާޅުވީ މިކަމުގައި ދެ ދިމާއަކުން މަސައްކަތް ކުރިއަށްދާ ކަމަށެވެ. އެގޮތުން ޝަންގްރިއްލާއިން އިންވެސްޓްމަންޓަށް ގެންނަން ޖެހޭ ބަދަލެއް ގެނެސް ރިސޯޓް ހުޅުވުމުގެ މަސައްކަތް ކުރިއަށް ގެންދާ ކަމަށާއި، ސަރުކާރުގެ ފަރާތުން ހިއްސާ ދޫކޮށްލުމުގެ މަސައްކަތް ވެސް ކުރިއަށްދާ ކަމަށެވެ.
އަދި ފިނޭންސް މިނިސްޓްރީން، މާކެޓް ވެލިއުގައި އެސެސްކޮށްފައި އަގުހަދާފައި ހިއްސާ ދޫކޮށްލެވޭނެ ކަމަށާއި، އެކަމަށް ބޭނުންވާ ގަވާއިދު ހަދައިގެން ފިނޭންސް މިނިސްޓްރީން ސަރުކާރުގެ ހިއްސާ ދޫކޮށްލުމުގެ ބައި ކުރިއަށް ގެންދާނެ ކަމަށެވެ.
އައްޑޫ ސިޓީގެ ޝަންގްރިއްލާ ރިސޯޓުގައި ސަރުކާރުގެ 30 އިންސައްތަ ހިއްސާ އޮތުމާއެކު، އެ ރިސޯޓް ނުހުޅުވި ގިނަ ދުވަސްވެގެން ދިއުމުގެ ސަބަބުން ސަރުކާރަށް ބޮޑު ބުރައެއް އުފުލަން ވަނީ ޖެހިފައެވެ.
30 އިންސައްތަ ހިއްސާ ބަދަލުކުރުމުގެ މަސައްކަތް ކުރުމަށް މަޖިލީހުން ޓުއަރިޒަމް ގާނޫނަށް ގެނައި 10 ވަނަ އިސްލާހުގެ އަލީގައި ޓުއަރިޒަމް މިނިސްޓްރީން މަސައްކަތް ފެށި ނަމަވެސް އެ ފޯމިއުލާގެ އަލީގައި އެ ރަށުގެ ސައިޒް ބޮޑުކަމުން 80 މިލިއަން ވަރު ޝެއަރ ބަދަލުކުރުމަށް އަރައެވެ. އެހެންކަމުން ޓުއަރިޒަމް ގާނޫނަށް ގެނައި 11 ވަނަ އިސްލާހުގެ ދަށުން 30 އިންސައްތައް ހިއްސާ އައްޑޫ އިންވެސްޓް ޕްރައިވެޓް ލިމިޓެޑަށް ގަނެވޭނެކަހަލަ ގޮތަކަށް މަގުފަހިވެގެންދާނެއެވެ.
މި އިޞްލާޙުން ގެނެސްފައިވާ މައިގަނޑު ބަދަލުތަކުގެ ތެރޭގައި، ޓޫރިޒަމާބެހޭ ޤާނޫނުގެ ދަށުން ޖޮއިންޓް ވެންޗަރ އުސޫލުން ކުއްޔަށްދޫކޮށްފައިވާ ރަށްތައް ކުއްޔަށް ހިފާފައިވާ ކުންފުނިތަކުގެ ޙިއްޞާ ވިއްކާލުމުގައި މާކެޓް ވެލިއުއަށް ރިއާޔަތްކޮށް ހުރިހާ ފަރާތެއްގެ ވެސް ޙައްޤުތައް ހިމާޔަތްކުރެވޭނެ އުސޫލެއްގެ ތެރެއިން އެ ތަންތަނުގެ ޙިއްޞާގެ އަގު ކަނޑައެޅޭނެ ގޮތަކަށް މަގުފަހިކޮށްދިނުމާއި، ކައުންސިލުތަކަށް އެކަށީގެންވާ ޢާމްދަނީއެއް ލިބޭފަދަ ގޮތަކަށް މާކެޓް ވެލިއުއަށް ބިންތައް ކުއްޔަށް ދޫކުރުމަށް މަގުފަހިކޮށްދިނުމާއި މީހުން ދިރިއުޅޭ ރަށްރަށުގައި ކުއްޔަށް ދޫކޮށްފައިވާ ބިންތަކުގެ ޙައްޤުތައް ބަދަލުކުރުމުގައި ހުއްދަދޭ ފަރާތަކަކީ ކައުންސިލުތައް ކަމުގައި ކަނޑައެޅުން ހިމެނެއެވެ.
މި އިޞްލާޙުގެ ދަށުން ދިވެހިރާއްޖޭގެ ޓޫރިޒަމާބެހޭ ޤާނޫނަށް ގެނެވޭ އިޞްލާޙުތަކާ ގުޅިގެން އެކުލަވާލަންޖެހޭ ގަވާއިދުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 6 މަސްދުވަހުގެ ތެރޭގައި ހަދައި، ދިވެހި ސަރުކާރުގެ ގެޒެޓުގައި ޝާއިޢުކުރަޖެހެއެވެ.
އަދި މިނިސްޓްރީން ހުއްދަ ދީގެން ފަތުރުވެރިން ބެއިތިއްބުމަށް ރަޖިސްޓަރީކޮށްފައިވާ ޓޫރިސްޓް ހޮޓާ، ޓޫރިސްޓް ގެސްޓްހައުސް އަދި ޔޮޓް މެރީނާތަކުގެ ހިންގުމުގެ ހުއްދަ މި މި އިޞްލާޙުގައި ބަޔާންކޮށްފައިވާ ގޮތަށް މި އިޞްލާޙް ޤާނޫނަކަށްވެ ޢަމަލުކުރަން ފަށާ ތާރީޚުން ފެށިގެން 12 މަސްދުވަސް ހަމަވާ ތާރީޚުގެ ކުރިން ބަދަލުކުރަންޖެހެއެވެ. އަދި، އެފަދަ ތަންތަން ހިންގުމަށް މި އިޞްލާޙަށް ޢަމަލުކުރަން ފެށުމުގެ ކުރިން މިނިސްޓްރީން ދޫކޮށްފައިވާ ހުއްދަ އެ މުއްދަތު ހަމަވަންދެން ދެމިއޮންނާނެކަމުގައި ވެސް ބިލުގައި ބަޔާންކޮށްފައިވެއެވެ.
