ފަތުރުވެރިކަމުގެ ފަސްވަނަ މާސްޓަރ ޕްލޭން މި މަހުގެ ތެރޭގައި ލޯންޗުކުރާނެ: މިނިސްޓަރ މައުސޫމް
14 ޖެނުއަރީ 2023 | ހޮނިހިރު 10:18ފަތުރުވެރިކަމުގެ ފަސްވަނަ މާސްޓަރ ޕްލޭންގެ ފައިނަލް ޑްރާފްޓް މިހާރު ވަނީ ނިމިފައި
ޓޫރިޒަމް މިނިސްޓަރ، ޑރ. އަބްދުﷲ މައުސޫމް
ފަތުރުވެރިކަމުގެ ފަސްވަނަ މާސްޓަރ ޕްލޭން މި މަހުގެ ތެރޭގައި ލޯންޗު ކުރެވޭނެ ކަމަށް, ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ, އެންމެ ބޮޑު އިސްކަމެއް ދެއްވާނީ މާސްޓަރ ޕްލޭން ލޯންޗުކުރުމަށްފަހު އޭގައި ހުރި ކަންތައްތައް ކުރެއްވުމަށް ކަމަށެވެ. އަދި ލޯންޗުކުރުމާ ހަމައަށްވެސް އޭގައި ހުރި މަހްފޫމްތަކުގެ މަސައްކަތްތައް ކުރިއަށްދާނެކަމަށެވެ.
މިނިސްޓަރ އިތުރަށް ވިދާޅުވީ، މިއަހަރު އެންމެ މުހިންމު ކަމަކަށް މިނިސްޓްރީން ކުރައްވާނެ މަސައްކަތަކީ މީހުން ބިނާކުރުމަށް ކަމަށެވެ.
ޓޫރިޒަމް މިނިސްޓްރީން ބުނީ، ފަތުރުވެރިކަމުގެ ފަސްވަނަ މާސްޓަރ ޕްލޭންގެ ފައިނަލް ޑްރާފްޓް މިހާރު ނިމިފައިވާ ކަމަށެވެ.
ފަތުރުވެރިކަމުގެ ފަސްވަނަ މާސްޓަރ ޕްލޭން އެކުލަވާލުމުގެ މަސައްކަތް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އިފްތިތާހު ކޮށްދެއްވީ 2019 ވަނަ އަހަރުގައެވެ. އޭރު ޓޫރިޒަމް މިނިސްޓަރަކަށް ހުންނެވީ އަލީ ވަހީދެވެ.
އޭރު ޓޫރިޒަމް މިނިސްޓްރީން ބުނީ، އަލަށް އެކުލަވާލާ ޓޫރިޒަމް މާސްޓަރ ޕްލޭނުގެ ބޭނުމަކީ، ފަތުރުވެރިކަން ތަރައްގީކޮށް ފުޅާކުރުމުގައި ދިވެހި އަންހެނުންގެ ބައިވެރިވުން އިތުރުކޮށް، ދެމެހެއްޓެނިވި ގޮތެއްގައި ތިމާވެށި ރައްކާތެރިކުރުމާއި ތަރައްގީކުރުމާއި، ދެމެހެއްޓެނިވި ހަކަތަ ބޭނުންކުރާ މިންވަރު އިތުރުކޮށް، އަދި ދިވެހިރާއްޖޭގައި ހެދިފައި ހުރި، ޓޫރިޒަމާބެހޭ ގާނޫނުތަކާއި ގަވާއިދުތައް ހަރުދަނާކުރުން ކަމަށެވެ. އަދި ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް ކުރަންޖެހޭ ކަންކަން ދެނެގަތުމާއި، ފަތުރުވެރިކަމުން ލިބޭ ފައިސާ ދިވެހިރާއްޖޭގެ އިގްތިސާދުގައި ހިފެހެއްޓޭނެ ގޮތެއް ހޯދައި ދިރާސާކޮށް އަޅަންޖެހޭ ފިޔަވަޅުތައް ދެނެގަތުންކަމަށެވެ.
އޭގެއިތުރުން ފަތުރުވެރިކަން ކުރިއެރުވުމުގައި ދިވެހިރާއްޖޭގެ ސަގާފީ އަދި އާސާރީ ތަންތަން، ފަތުރުވެރިކަމުގެ ތެރެއިން ދިރުވައި އާލާކުރުން ކުރެވެން ހުރި ކަންކަން ދެނެގަނެ، އަދި ފަތުރުވެރިކަމުގެ ދާއިރާގައި ދިވެހިންނަށް ވަޒީފާގެ ފުރުސަތުތައް އިތުރުކުރުމާއި، ބޭނުންވާ ތަމްރީންތައް ދެނެގަތުމާއި ދިވެހިރާއްޖޭގެ ފަތުރުވެރިކަން ބޭރުގައި އިޝްތިހާރުކުރުމަށް ކުރެވެން ހުރި ކަންކަން ދެނެގަތުން މި ޕްލޭންގައި ހިމެނިގެންދާނެކަމަށް ޓޫރިޒަމް މިނިސްޓްރީން ބުންޏެވެ.
މިނިސްޓްރީން ބުނިގޮތުގައި ފަތުރުވެރިކަމުގެ 5 ވަނަ މާސްޓަރ ޕްލޭންގެ މައިގަނޑު މަގުސަދަކީ މަޝްވަރާއާއި ދިރާސާގެ މައްޗައް ބިނާކޮށް، ރާއްޖޭގެ ފަތުރުވެރިކަމުގެ މުސްތަގްބަލް ބައްޓަންކުރަން ބޭނުންވާ ސިޔާސަތުތައް ކަނޑައެޅުމެވެ. މި ސިޔާސަތުތައް ކަނޑައެޅިގެން ދާނީ ދެމެހެއްޓެނިވި ފަތުރުވެރިކަމަށް އަހައްމިއްޔަތުކަން ދެމުން ކަމަށްވެސް މިނިސްޓްރީން ބުންޏެވެ.
އެންމެ ފަހުން އެކުލަވާލި ޓޫރިޒަމްގެ މާސްޓަރ ޕްލޭން އެކުލަވާލާފައިވަނީ ކުރީގެ ރައީސް އަބްދުﷲ ޔާމީނުގެ ސަރުކާރުގައި، 2013 ވަނަ އަހަރުއެވެ. އޭރު ޓޫރިޒަމް މިނިސްޓަރުގެ މަގާމުގައި ހުންނެވީ އަހްމަދު އަދީބެވެ.
