އޮޅުވާލައިގެން ނަގާ ފައިސާ ގިނަ ފަހަރު ޖަމާކޮށްފައި ހުންނަނީ އަތޮޅުތެރޭގެ އެކައުންޓުތަކަށް ކަން ތަހުޤީޤުތަކުން ފާހަަގަކުރެވިފައިވާ ކަމަށް ފުލުހުން ބުނެފިއެވެ.
ރާއްޖޭ ޓީވީގެ ފަލަ ސުރުޚީ ޕްރޮގްރާމުގައި މާފަންނު ޕޮލިސްގެ އިންސްޕެކްޓަރ އޮފް ޕޮލިސް އިބްރާހިމް ހަސަން ވިދާޅުވީ އޮޅުވާލައިގެން ފައިސާ ހޯދުމުގެ މައްސަލަތަކުގައި އާއްމުކޮށް އަތޮޅުތެރޭގެ ބޭންކް އެކައުންޓަކަށް އެ ފައިސާ ޖަމާކޮށްފައި ހުންނަ ކަން ފާހަގަކުރެވިފައިވާ ކަމަށެވެ. ތަހުޤީޤުތަކުގައި ދެކުނާއި އުތުރުގައި ވެސް މިގޮތަށް ފާހަގަ ކޮށްލެވޭ ރަށްތަކެއް އެބަހުރި ކަމަށް ވެސް އޭނާ ފާހަގަކުރެއްވިއެވެ. ނަމަވެސް އެ ރަށްތަކާ ގުޅޭ އިތުރު ތަފްސީލެއް އިބްރާހިމް ނުދެއްވައެވެ.
އޭނާ ވިދާޅުވީ 2020 ވަނަ އަހަރުގެ ލޮކްޑައުންއާއެކު އެކި ގޮތްގޮތުން އޮޅުވާލައިގެން ފައިސާ ހޯދުމުގެ މައްސަލަތައް އިތުރުވިކަން ފާހަގަކުރެވޭ ކަމަށެވެ. އޭގެ ގިނަ އަދަދެއްގެ މައްސަލަތައް ފުލުހަށް ހުށަހަޅާފައިވާއިރު އޭގެ ތެރެއިން ބައެއް މައްސަލަތުގައި ފައިސާ އަނބުރާ ހޯދިފައިވާ ކަމަށާއި އަތޮޅުތެރޭގެ އެކައުންޓްތަކަށް އޮޅުވާލައިގެން ހޯދާ ފައިސާ ޖަމާކުރުމުގެ ސަބަބުން ތަހުޤީޤުތައް ކުރިއަށްގެންދަން ދަތިތަކާ ދިމާވާ ކަމަށް ވެސް ވިދާޅުވިއެވެ.
އިބްރާހިމް ވިދާޅުވި ގޮތުގައި 2020 ވަނަ އަހަރުން ފެށިގެން އޮޅުވާލައިގެން ފައިސާ ހޯދުމުގެ 15 ޓްރެންޑެއް ފާހަގަކުރެވިފައިވާއިރު މި ފަހުން ބޭނުން ކުރަމުން ދަނީ ފަސް ޓްރެންޑެކެވެ. އޭގެ ތެރެއިން އެންމެ ފާހަގަކޮށްލެވެނީ އެޗްޑީސީގެ ނަމުގައި ފްލެޓް ލިބިއްޖެ ކަމަށް ބުނެ މީހުން އަތުން ފައިސާ ހޯދުމުގެ މައްސަލަތައް ކަމަށް އޭނާ ވިދާޅުވިއެވެ.
މި ދުވަސްކޮޅަށް ބަލާއިރު ފަސް ވައްތަރެއްގެ ޓްރެންޑެއް މިއަންނަނީ. އޭގެ ތެރޭގައި އެންމެ ބޮޑަށް ފާހަގަވެފައިވަނީ އެޗްޑީސީގެ ނަންމަތީގައި ފްލެޓް ވިއްކަން ނުވަތަ ބިން ވިއްކަން އިއުލާން ކޮށްގެން. އަދި އެކި ފަރާތްތަކުގެ އެކައުންޓް ހެކްކޮށްގެން ފައިސާ ހޯދާ މައްސަލަ، އޭގެ އިތުރުން ފޭސްބުކްގެ އޯޓީޕީ ހޯދައިގެން ފޭސްބުކް މެދުވެރިކޮށް އާއްމުކޮށް މުއާމަލާތްކޮށްފައި ހުންނަ މީހުންނަށް ގުޅައިގެންނާއި ރައްޓެހިންގެ ނަމުގައި ފައިސާ ހޯދާ މައްސަލަތަކާއި ޑޮލަރު ވިއްކާ މައްސަލަތައް. އަދި އޭގެ އިތުރުން އަދިވެސް ކޮންމެ ވެސް ވަރަކަށް ސަފާރީތަކަށް ސަޕްލައި ކުރުމުގެ ނަމުގައި މަކަރާއި ހީލަތުން ފައިސާ ހޯދާ މައްސަލަތައް ހުށަހަޅާއިންސްޕެކްޓަރ އޮފް ޕޮލިސް އިބްރާހިމް ހަސަން
ގަލޮޅު ޕޮލިސްގެ އިންސްޕެކްޓަރ އޮފް ޕޮލިސް މުޙައްމަދު އިސްމާއިލް ވިދާޅުވީ އެޗްޑީސީގެ ނަމުގައި ފްލެޓް ލިބުނުކަމަށް ބުނެ އޮޅުވާލައިގެން ފައިސާ ހޯދާ މައްސަލަތަކުގައި ފްލެޓަކަށް ކުރިމަތި ނުލާއިރު ވެސް ފައިސާ ދައްކާކަން ފާހަގަކުރެވިފައިވާ ކަމަށެވެ. އެއީ ވަރަށް ބޮޑަށް ސަމާލުކަން ދޭން ޖެހޭ ކަމެއް ކަމަށާއި ކުރިމަތި ނުލާ އެއްވެސް ކަމެއްގައި މީހަކު ފައިސާ ހޯދަން ގުޅައިގެން ފައިސާ އަދި އެމީހާގެ ޒާތީ މައުލޫމާތާއި އެކައުންޓުގެ މައުލޫމާތު ހިއްސާ ނުކުރުމަށް އޭނާ އެދިލެއްވިއެވެ.
މުހައްމަދު އިސްމާއިލް ވިދާޅުވީ ގުޅައިގެން މަކަރާއި ހީލަތުން ފައިސާ ހޯދާ މައްސަލަތަކުގައި އެކެއްގެ ނަންމަތީގައި ގިނަ އަދަދެއްގެ ސިމް ނަގާފައިވާ ކަން ފާހަގަކުރެވިފައިވާ ކަމަށާއި އެ ސިމްތައް ގިނަ ފަހަރު ނަގާފައި ހުންނަނީ ގަވާއިދާ ޚިލާފަށް އުޅޭ ބިދޭސީއެއް ނުވަތަ ރާއްޖޭގައި ނެތް ބިދޭސީއެއްގެ ނަންމަތީގައި ކަމަށެވެ. މީގެ ސަބަބުން ތަޙުޤީޤު ކުރިއަށްގެންދާން ދަތިތަކާ ދިމާވާ ކަމަށް އޭނާ ފާހަގަ ކުރެއްވިއެވެ.
ބިދޭސީންގެ ސައްހަ މައުލޫމާތު ނެތި ނަގާފައި ހުންނަ ސިމްތަކެއް ދޫކޮށްފައި ހުންނައިރު އެ ނަންބަރުތައް ބޭނުން ކޮށްގެން މި އަމަލުތައް ހިންގާފަ ހުރޭ. އޭގެ އިތުރުން ވެސް ތަހުގީގައި އަޅުގަނޑުމެންނަށް ވަރަށް ބޮޑަށް ފާހަގަވޭ. އެކެއްގެ ނަންމަތީގައި ގިނަ ނަމްބަރުތަކެއް ނަގާފައިވާކަން. މީގެ ސަބަބުން ތަހުގީގުތަކަށް ދަތިވާއިރު، މިކަން ކުރާ މީހުންނަށް އެކަން ކުރަން ފަސޭހަ އެބަވޭއިންސްޕެކްޓަރ އޮފް ޕޮލިސް މުޙައްމަދު އިސްމާއިލް
ފުލުހުން ވަނީ މަކަރާއި ހީލަތުން ފައިސާ ހޯދާ މައްސަލަތަކުގައި ވީހާވެސް އަވަހަށް ބޭންކަށް ގުޅައި އެކަން ރިޕޯޓް ކުރުމަށް އިލްތިމާސްކޮށްފައެވެ. އަދި ފުލުހުންނަށް ވީހާވެސް އަވަހަށް އެ މައްސަލަ ރިޕޯޓް ކުރުމަށް ވެސް ވަނީ އެދިފައެވެ.
