ސިޓީ ތައްޓާއި ގާތަށް، ޑިބްރައިން 4 ލަނޑު ޖެހި

އިނގިރޭސި ޕްރިމިއަރ ލީގުގައި ވުލްވްސް ބަލިކޮށް މެންޗެސްޓަރ ސިޓީއިން މުބާރާތުގެ ތަށި ހޯދުމާއި ގާތަށް ޖެހިލައިފިއެވެ.

ރަށުން ބޭރުގައި ކުޅުނު މި މެޗު ސިޓީން ކާމިޔާބުކުރީ 5-1 ންނެވެ. މި ނަތީޖާއާއެކު ތާވަލުގެ އެއްވަނާގައި ސިޓީ އޮތީ 36 މެޗު ކުޅެގެން ލިބުނު 89 ޕޮއިންޓާއެކުއެވެ. މުބާރާތުގެ ތަށްޓަށް ދެން ވާދަކުރަނީ ލިވަޕޫލްއެވެ. މި އަދަދަށް މެޗު ކުޅެގެން ލިވަޕޫލްއަށް ލިބިފައިވަނީ 86 ޕޮއިންޓެވެ.

ވުލްވްސް އާއި ބައްދަލުކުރި މެޗު ސިޓީން ފަސޭހަކަމާއެކު ކާމިޔާބު ކުރިއިރު، ޓީމުގެ މެދުތެރެއިން ކުޅެމުން އަންނަ ކެވިން ޑިބްރައިން ވަނީ މެޗުގައި ހަތަރު ލަނޑު ޖަހާފައެވެ. މެޗުގެ ފުރަތަމަ ހާފުގެ ހަތްވަނަ މިނެޓުގައި ޑިބްރައިން ވަނީ ލަނޑެއް ޖަހާ ސިޓީއަށް ލީޑު ނަގައިދީފައެވެ. ނަމަވެސް އޭގެ ތިން މިނެޓު ފަހުން ވުލްވްސްގެ ހަމައެކަނި ލަނޑު ޖަހާ އެޓީމަށް ނަތީޖާ ހަމަހަމަ ކޮށްދިނީ ލީންޑާ ޑެންޑޮންކާއެވެ. އޭގެ ފަހުން، ފުރަތަމަ ހާފު ނިމުމުގެ ކުރިން ޑިބްރައިން އިތުރު ދެލަނޑު ޖަހާ ހެޓްރިކް ހެދިއެވެ. އޭނާގެ ހަތަރު ވަނަ ލަނޑު ޖެހީ މެޗުގެ 60 ވަނަ މިނެޓުގައެވެ. ސިޓީގެ ފަހު ލަނޑު 84 ވަނަ މިނެޓުގައި ޖެހީ ރަހީމް ސްޓާލިންއެވެ.

ލީގުގެ އެއްވަނައަށް ވާދަކުރަމުން އަންނަ ސިޓީ އަދި ލިވަޕޫލަށްވެސް ބާކީ އޮތީ ދެމެޗެވެ. ކުރިއަށް އޮތް ދެމެޗަށް ބަލާއިރު ހުރިހާ ގޮތަކުންވެސް ފައިދާ ބޮޑީ ސިޓީއަށެވެ. މުބާރާތުގައި އެންމެ ފަހުން ކުޅުނު ފަސް މެޗުންވެސް މޮޅުވެފައިވާ ސިޓީ އޮތީ ލިވަޕޫލްއަށްވުރެ ތިން ޕޮއިންޓު ކުރީގައެވެ. ގޯލުގެ ތަފާތުންވެސް ސިޓި އުޅެނީ މާ ކުރީގައެވެ. އަނެއްކޮޅުން މި ސީޒަންގައި ސިޓީން ސަމާލުކަން ދޭން ޖެހޭ އިތުރު މުބާރާތެއް ނެތެވެ. ނަމަވެސް ލިވަޕޫލްއަށް ޗެމްޕިއަންސް ލީގުގެ ފައިނަލަށް ސަމާލުކަން ދިނުންވެސް މުހިންމެވެ.