ނިއުކާސަލް، ލީގުގެ އެންމެ މަތީގައި ވާދަކުރުމަށް 5 އަހަރު ނަގާނެ: ޓްރީޕިއަރ
ނިއުކާސަލް އޮތީ 36 މެޗު ކުޅެގެން ލިބުނު 43 ޕޮއިންޓާއެކު، ތާވަލުގެ 13 ވަނާގައި
ނިއުކާސަލް ޔުނައިޓެޑްގެ ޑިފެންޑަރު ކީރަން ޓްރީޕިއަރ
އުނދަގޫ ހާލަތެއްގައި އޮތް އިނގިރޭސިވިލާތުގެ ނިއުކާސަލް ޔުނައިޓެޑް ޕްރިމިއަރ ލީގުގެ އެންމެ މަތީ ފަންތީގައި ވާދަކުރުމަށް އެންމެ މަދުވެގެންވެސް ފަސް އަހަރު ނަގާނެކަމަށް އެޓީމުގެ ޑިފެންޑަރު ކީރަން ޓްރީޕިއަރ ބުނެފިއެވެ.
އުމުރުން 31 އަހަރުގެ ޓްރީޕިއަރ ބުނީ މިހާރު ޓީމު އޮތް ހާލަތުން އަރައިގަނެ ލީގުގެ މަތީ ފަންތީގައި ވާދަކުރުމަށް ވަގުތު ބޭނުންވާ ކަމަށެވެ. އެގޮތުން ލީގުގެ އެންމެ މަތީ ފަންތީގައި ވާދަކުރުމަށް އެންމެ މަދުވެގެންވެސް 5 ނުވަތަ 6 އަހަރު ނަގާނެކަމަށް އޭނާ ބުންޏެވެ. ޓްރީޕިއަރ ބުނީ މިފަދަ ހާލަތަކުން އަރައިގަތުމަކީ ފަސޭހަ ކަމެއް ނޫން ކަމަށާއި، ނަމަވެސް އެއީ ކުރެވޭނެ ކަމެއް ކަމަށެވެ. މިސާލެއްގެ ގޮތުން ޓްރީޕިއާ ނެގީ މީގެ ކުރިން އޭނާ ކުޅުނު މެންޗެސްޓަރ ސިޓީއެވެ.
ނިއުކާސަލް ލީގުގައި އެންމެ ފަހުން ކުޅުނު މެޗުގައި ސިޓީ އަތުން ބަލިވީ 5-0ންނެވެ. މި ނަތީޖާއާއެކު އެޓީމު އޮތީ 36 މެޗު ކުޅެގެން ލިބުނު 43 ޕޮއިންޓާއެކު ތާވަލުގެ 13 ވަނާގައެވެ.
އައު މެނޭޖްމެންޓެއްގެ ދަށުން މަސައްކަތް ކުރަމުން އަންނަ ނިއުކާސަލް މަސައްކަތް ކުރަނީ ކުރިއަށް ހުރި ސީޒަންތަކުގައި ލީގުގެ ރަނގަޅު ހިސާބަކަށް ދިއުމަށެވެ. މިދިޔަ އަހަރު ނިމެނިކޮށް ސައުދީ އަރަބިއަން ޕަބްލިކް އިންވެސްޓްމެންޓް ފަންޑުން ވަނީ އެކްލަބު ގަނެފައެވެ.
