އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ބަލިވެ، އާސެނަލް ލީގު ތާވަލްގެ ހަތަރު ވަނަ އަށް ވެއްޓިއްޖެ އެވެ.

ނިއުކާސަލްގެ އަމިއްލަ ދަނޑުގައި ހޮނިހިރު ދުވަހުގެ ހަވީރު ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. އެއީ މެޗުގެ ފުރަތަމަ ހާފުގައި އާސެނަލް ކޮޅަށް ލަނޑު ޖަހައިގެންނެވެ. ނިއުކާސަލް އަތުން ވީ ބައްޔާއެކު، ލީގުގައި އެންމެ ފަހުން ކުޅުނު ތިން މެޗު ވެސް އާސެނަލް ނިންމާލަން ޖެހުނީ މޮޅެއް ނުހޯދި އެވެ. ތިން މެޗުން އެ ޓީމަށް އެންމެ ޕޮއިންޓެއް ލިބިފައިވާއިރު، އެއީ ލިވަޕޫލާ ދެކޮޅަށް ކުޅުނު މެޗު އެއްވަރުވުމުންނެވެ.

މެޗު ފަށައިގެން ރަނގަޅަށް ކުޅެމުން ދިޔަ ނިއުކާސަލް އިން އާސެނަލް ކޮޅަށް ލަނޑު ޖެހީ 12 ވަނަ މިނެޓުގަ އެވެ. އެ ލަނޑު ނިއުކާސަލަށް ޖަހައިދިނީ އަލެކްސަންޑަ އިސާކް އެވެ. އެއީ ނިއުކާސަލްގެ އެންތަނީ ގޯޑަން ތަނަވަސްކޮށްދިން ފުރުސަތެއްގައި އިސާކް ޖެހި ލަނޑެކެވެ. އޭގެ ފަހުން ވެސް މެޗުގައި ނިއުކާސަލް އިން ލަނޑު ޖަހަން ފުރުސަތު ތަނަވަސްކުރި އެވެ. އާސެނަލް އިން ވެސް ވަނީ ލަނޑުގެ ފަހުން ކުޅުން ރަނގަޅުކޮށް، ނަތީޖާ ހަމަހަމަ ކުރުމަށް މަސައްކަތް ކޮށްފަ އެވެ. ނަމަވެސް އެ ޓީމަށް ލިބުނު ފުރުސަތުތައް ނިންމާލެވޭ ގޮތެއް ނުވި އެވެ.

ބައްޔާއެކު އާސެނަލް ހަތަރު ވަނައިގައި އޮތީ މިހާތަނަށް ލީގުގައި ކުޅުނު 10 މެޗުން 18 ޕޮޮއިންޓާ އެކު އެވެ. ފަސް މެޗުން އާސެނަލް މޮޅުވެފައިވާއިރު، ތިން މެޗު ވަނީ އެއްވަރުވެފަ އެވެ. ނިއުކާސަލް އަތުން ވީ ބައްޔަކީ، މި ސީޒަންގެ ލީގުގައި އާސެނަލް ބަލިވި ދެ ވަނަ މެޗެވެ.