ނިއުކާސަލް އިން ލިވަޕޫލާ އެއްވަރު ކޮށްފި

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ލިވަޕޫލް އެއްވަރުވެއްޖެ އެވެ.

ނިއުކާސަލްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ނިމުނީ ދެ ޓީމު 3-3 އިން އެއްވަރުވެގެންނެވެ. މެޗުގެ ފުރަތަމަ ހާފުގައި ނިއުކާސަލް އިން ލަނޑު ޖަހައި ލީޑު ހޯދިއިރު، ދެން ހުރި ލަނޑުތައް ފެނުނީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 35 ވަނަ މިނެޓުގައި ނިއުކާސަލް އަށް ލީޑު ނަގައިދިނީ އެލެގްޒެންޑާ އިސާކް އެވެ. ނަމަވެސް ދެ ވަނަ ހާފު ފަށައިގެން ފަސް ވަނަ މިނެޓުގައި ކާޓިސް ޖޯންސް ޖެހި ލަނޑުން ލިވަޕޫލް އިން ނަތީޖާ ހަމަހަމަ ކުރި އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މިޞްރުގެ މުޙައްމަދު ޞަލާޙު އެވެ.

ދެ ވަނަ ފަހަރަށް ނިއުކާސަލް އިން ލީޑު ނެގީ 62 ވަނަ މިނެޓުގައި އެންތަނީ ގޯޑަން ޖެހި ލަނޑުންނެވެ. ނަމަވެސް އޭގެ ހަ މިނެޓު ފަހުން ޞަލާޙު ވަނީ ލަނޑު ޖަހައި، ދެ ވަނަ ފަހަރަށް ލިވަޕޫލަށް ނަތީޖާ ހަމަހަމަ ކޮށްދީފަ އެވެ. އެ ލަނޑު އޭނާ ޖެހީ ޓްރެންޓް އެލެގްޒެންޑާ އާނޯލްޑް ތަނަވަސްކޮށްދިން ފުރުސަތެއްގަ އެވެ.

މެޗުގެ ފަހު ދިހަ މިނެޓުގެ ތެރޭގައި ލިވަޕޫލް އިން ވަނީ ތިން ވަނަ ލަނޑެއް ޖަހައި ފުރަތަމަ ފަހަރަށް ލީޑު ނަގައިފަ އެވެ. އާނޯލްޑް ތަނަވަސްކޮށްދިން ފުރުސަތެއްގައި މި ލަނޑު ވެސް ޖެހީ ޞަލާޙު އެވެ. ނަމަވެސް މެޗުގެ 90 ވަނަ މިނެޓުގައި ފަބިއަން ޝާ ޖެހި ލަނޑުން ނިއުކާސަލް ވަނީ ނަތީޖާ ހަމަހަމަ ކޮށްފަ އެވެ.

ނަތީޖާ އާއެކު ލިވަޕޫލް އެއް ވަނައިގައި އޮތީ މިހާތަނަށް ކުޅެފައިވާ 14 މެޗުން 35 ޕޮއިންޓާ އެކު އެވެ. މި ސީޒަންގައި ލިވަޕޫލް އިން ރަނގަޅު ނަތީޖާތަކެއް ނެރެމުން އަންނައިރު، ލީގުގައި އެ ޓީމު ވަނީ އެއް މެޗުން ބަލިވެފަ އެވެ. ދެ މެޗު އެއްވަރުވެފައިވާއިރު، 11 މެޗުން ވަނީ މޮޅުވެފަ އެވެ.