ލިވަޕޫލް މޮޅުވެ، ލީޑުގައި

ނިއުކާސަލް ޔުނައިޓެޑް ބަލިކޮށް, ލިވަޕޫލުން ލީގު ޕްރިމިއަރ ތާވަލްގެ އެއްވަނާގައި ތިން ޕޮއިންޓްގެ ލީޑެއް ނަގައިފި އެވެ.

އިނގިރޭސި ލީގުގައި ނިއުކާސަލްގެ މައްޗަށް ލިވަޕޫލުން ކުރިހޯދީ 4-2 ނެވެ. މެޗުގައި ހަ ލަނޑުވެސް ފެނުނީ ދެވަނަ ހާފްގައެވެ. ދެވަނަ ހާފް ފަށައިގެން ހަތަރު ވަނަ މިނެޓުގައި ލިވަޕޫލަށް ލީދް ނަގައިދިނީ ސަލާހު އެވެ. އެކަމަކު އޭގެ ހަތަރު މިނެޓު ފަހުން އިސާކް ލަނޑުޖަހާ ނިއުކާސަލް އަށް ނަތީޖާ ހަމަހަމަ ކޮށްދިނެވެ. ލިވަޕޫލަށް ދެވަނަ ފަހަރަށް ކުރި ހޯދައިދިނީ ޖޯންސް އެވެ. އޭނާ ލަނޑު ޖެހީ 74 ވަނަ މިނެޓުގައެވެ. އޭގެ ތިން މިނެޓު ފަހުން ގަކްޕޯ ލަނޑުޖަހާ ލިވަޕޫލަށް ހަމަޖެހުން ހޯދައިދިނެވެ. 81 ވަނަ މިނެޓުގައި ބޮޓްމޭން ލަނޑެއް ޖަހާ ނިއުކާސަލް އަށް އުއްމީދެއް ހޯދައިދިނަސް, ސަލާހު ވަނީ އިތުރު ލަނޑެއް ޖަހާ ލިވަޕޫލަށް މޮޅު ޔަގީން ކޮށްދީފައެވެ. ފަހު ލަނޑު ސަލާހު ޖެހީ ޕެނަލްޓީ އަކުންނެވެ.

މިމޮޅާއެކު ލިވަޕޫލް އެއްވަނާގައި އޮތީ 21 މެޗުން 45 ޕޮއިންޓާއެކު އެވެ. ދެވަނާގައި އެސްޓަން ވިލާ އޮތީ 20 މެޗުން 42 ޕޮއިންޓާ އެކުއެވެ. އެންމެ ފަހުގެ ޗެމްޕިއަން މެންޗެސްޓަރ ސިޓީ އޮތީ 19 މެޗުން 40 ޕޮއިންޓާއެކުއެވެ.