ފަހަތުން އަރައި އާސެނަލް އިން ނިއުކާސަލް ބަލިކޮށްފި

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ ދެ ވަނަ އަށް ޖެހިލައިފި އެވެ.

ނިއުކާސަލްގެ އަމިއްލަ ދަނޑުގައި އާދީއްތަ ދުވެހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 2-1 އިންނެވެ. މެޗުގައި ނިއުކާސަލް އިން ލަނޑު ޖަހައި ކުރި ހޯދާފައި ވަނިކޮށް، އާސެނަލް އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި ނިއުކާސަލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ނިކް ވޮލްޓަމޭޑް އެވެ. އެ ލަނޑު ޖަހަން އޭނާާ އަށް ފުރުސަތު ތަނަވަސްކޮށްދިނީ ސަންޑްރޯ ޓޮނާލީ އެވެ.

މެޗުގެ ނަތީޖާ ހަމަހަމަ ކުރުމަށް އާސެނަލް އިން ކުރި މަސައްކަތް ކާމިޔާބު ކުރެވުނީ، މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށެވެ. ޑެކްލަން ރައިސް ތަނަވަސްކޮށްދިން ފުރުސަތެއްގައި އާސެނަލް އަށް ނަތީޖާ ހަމަހަމަ ކޮށްދިނީ މިކޭލް މެރީނޯ އެވެ.

އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލަނޑު ޖަހައިގެން އާސެނަލް ވަނީ މެޗުން މޮޅުވެފަ އެވެ. އާސެނަލްގެ މާޓިން އޮޑެގާޑް ތަނަވަސްކޮށްދިން ފުރުސަތެއްގައި، އެ ޓީމަށް އެ ލަނޑު ޖަހައިދިނީ ގަބްރިއެލް މަގާޅައެސް އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، އޭނާ އަށް ކުރެވެނީ ޤަބޫލު ކުރަން ވެސް އުނދަގޫ އިޙުސާސެއް ކަމަށެވެ. ޚާއްސަކޮށް ފުޓުބޯޅަ އަކީ އެކަހަލަ އިޙުސާސްތަކުގެ މައްޗަށް އެކުލެވިގެންވާ ކުޅިވަރެއް ކަމަށް އާޓެޓާ ވަނީ ބުނެފަ އެވެ. އޭނާ ބުނީ އެންމެ ބޭނުންވާ ނަތީޖާ، ފަހު ވަގުތު ލިބުމުން އެއަށް ވުރެ ބޮޑު އުފާވެރި ކަމެއް ނޯންނާނެ ކަމަށެވެ.

އިތުރަށް އާޓެޓާ ބުނީ އެ މެޗު އުނދަގޫ ވާނެކަން ކުރިން ވެސް އިނގޭ ކަމަށާއި، އެ މެޗާ ކުރިމަތިލީ އެކަންކަމަށް ފަރުވާތެރި ވެެގެން ކަމަށެވެ. އަދި މެޗުގައި އާސެނަލްގެ ކުޅުންތެރިންގެ ފަރާތުން ފެނުނީ ހިތްހަމަ ޖެހޭ ވަރުގެ ކުޅުމެއް ކަަމަށް ވެސް އޭނާ ވަނީ ބުނެފަ އެވެ.

މޮޅާއެކު އާސެނަލް ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ ހަ މެޗުން 13 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް އެންމެ ފަހުގެ ޗެމްޕިއަން ލިވަޕޫލް އަށް ލިބެނީ 15 ޕޮއިންޓެވެ.