އިސާކް ހޯދަން ލިވަޕޫލް އިން މަސައްކަތް ކުރަނީ

ނިއުކާސަލް ޔުނައިޓެޑަށް ކުޅެމުން އަންނަ ސްވިޑެންގެ އެލެގްޒެންޑާ އިސާކް ހޯދުމަށް، ލިވަޕޫލް އިން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ސްޕެއިންގެ ރެއާލް ސޮސިއެޑާޑް ދޫކޮށްލުމަށް ފަހު، އުމުރުން 25 އަހަރުގެ އިސާކް ނިއުކާސަލް އަށް ބަދަލުވީ 2022 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި އޮތީ ހަ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ.

އިސާކްގެ އެއްބަސްވުމުގައި ބާކީ ތިން އަހަރު އޮތް ނަމަވެސް، އޭނާ ބޭނުން ވަނީ ނިއުކާސަލް ދޫކޮށްލަން ކަމަށް މީޑިއާ ތަކުގައި ވަނީ ބުނެފަ އެވެ. އެހެންކަމުން ލިވަޕޫލް އިން އިސާކް ގެންނަން ބޭނުންވާ ކަމަށާއި، އޭނާ ހޯދުމަށް އެ ކުލަބުން މަސައްކަތް ކުރަމުން އަންނަ ކަމަށް މީޑިއާ ތަކުގައި ވަނީ ބުނެފަ އެވެ.

އެގޮތުން މީޑިއާ ތަކުގައި ބުނެފައިވާ ގޮތުން ލިވަޕޫލް އިން އޮތީ އިސާކް ހޯދުމަށް 120 ޕައުންޑުގެ ބިޑެއް ހުށަހެޅުމަށް ތައްޔާރަށެވެ. އެހެން ނަމަވެސް ރަސްމީކޮށް އެކަން ހުށަހަޅާނީ އިސާކް ވިއްކުމަށް ނިއުކާސަލް އިން އެއްބަސްވުމުން ކަމަށް ވެސް ބުނެފައިވެ އެވެ. އެގޮތުން މިހާތަނަށް ނިއުކާސަލް އިން އޮތީ އޭނާ ދޫނުކުރާ ގޮތަށް ކަމަށް މީޑިއާ ތަކުގައި ބުނެފައިވެ އެވެ.

ނިއުކާސަލް ގައި މިހާތަނަށް ހޭދަ ކުރި ތިން ސީޒަންގެ ތެރޭގައި އިސާކް ވަނީ އެ ކުލަބަށް ކުޅެދިން 109 މެޗުގައި 62 ލަނޑު ޖަހައިފަ އެވެ. ޚާއްސަކޮށް މިދިޔަ ސީޒަންގައި އޭނާ ވަނީ ނިއުކާސަލްގައި މޮޅު ކުޅުމެއް ދައްކައިފަ އެވެ. އެ ކުލަބާ އެކު އޭނާ ވަނީ ކަރަބޯ ކަޕް ވެސް ކާމިޔާބު ކޮށްފަ އެވެ.

އިސާކް އަންނަނީ ސްވިޑެންގެ ޤައުމީ ޓީމަށް ވެސް ކުޅެމުންނެވެ. އޭނާ ވަނީ މިހާތަނަށް ޤައުމީ ޓީމަށް ކުޅެދިން 52 މެޗުގައި 16 ލަނޑު ޖަހައިފަ އެވެ.